ZCCM in misi vui ding (Malaysia)
Min: : Tg. Thang Kap Lian Thang
Kum: : Kum 17 (?)
Khua: : Pang Zang
Sihni: : 16th June 2014
Vui Ni: : 17th July 2014
A mun: : Tamalok, Perak Sate, Malaysia
A hun: : 2pm (Local time)
Sihna thu tomno;
Sanggam pan Thang Kap Lian Thang pen Pang Zang khuapan in Pa Zam Khan Pau (Si khin) le Nu Thang Do Cing te sungpan in hongpiakhia hi. A pa pen Catholic thu um mahmah khat hi a, a neulai pek in hong nusiakhin hi. A nu pen damlai in khua ah innkuanpih thak khat tawh aom a hihi.
Sanggam pan pen neulai pek akipan tagah khat a hihman in Tagah sang khat (a omna kisan theilo) ah om in kum 17 hongcinkuan teh bangbang a hizong in ci in a it mahmah a Pa naupa ii deihsakna tawh Malaysia hongpai a hihi.
Tuahsiatna;
Kawlgam pan in Malaysia hongpai in Malaysia gamsung hongtun khit lampi ah hong tuanna mawtaw kibung in mi 5 sang in a tawmlozaw sih khat hong sihsan pah uh hi.
A luang hawmpen Tamaloh zatopi ah kikoih in palik case ahihman in sauveipi tak a luang kikiohcip hi. A luang pen kilathei ta ding cih thu honggin ciang in ZCCM pan Upa lah a hi ZAM palaai a hi Sia Tuang Puu in vaphaamding in hong kithawi hi. Palik case a hihman in baihlo a hihman in vaiteng geelgeel laitak in a luanghawm pen a pianna khua Pang Zang ah a pianna pa ii biakna a hi Catholic ngeina tawh kivui cih thu kiza leuleu hi.
Tua a hihman in ZCCM hong kiko in ZCCM pan vaiteng kihawmsak in leitang ah a kivuidong mah kibuaipih hi.
Klang vengah om Tuipi khua hausa pa le misi pa ii sanggam nu (Nu kibang in Pa kibanglo) aluang hongphaam kik leuleu in Palik te khutsung le Kumpi zato pan aluang lakkhiat theihnang in a kisam a hi, sanggam taktak cihna ah sitteelna si sitna zong kibawl in DNA kisit in a si uh ki unau a hihman in a luang lakkhiat theihna phalna kingah ta hi.
A etteh huai #Aunty Catherine#
Hih vaiteng khempeuh ah hong buaisak Malaysian Catholic thuzui a um mahmah Pi Catherine in KL ah Tuipi Hausa, Misi pa sanggamnu le Sia Tuang Puu te hong dawn zel, Tamalok ah paipih zel, hong kha kik zel cihdan in man nget hetloh a ma mawtaw tawh vai kisamteng khempeuh Palik zum, Kumpi zum le Zato te sun le zan cilo in hongbuaipih den in zingteh a vuina ding a kisam hanmual leitang na leng hong vaihawmsak sawnsawn lai hi.
Sanggam pa luangpuak nang in a kisam Zato pan hanmual dong misi luang pua mawtaw na leng manlaak loh in hongsaapsak lai sawnsawn hi. Bangzahta in lungdam huai hiam aw!!
Ama omna pen Kuantan khuapi pan hi in Zomi Catholic thuzui bekthamlo Zomi te in Kuantan or tua kuamteng ah nuntakna mual hongliapsan khempeuh kei ii theih teng bang hong vansak gai hi.
Bangbang a hizong in Catholic sungah thuzui mi suahna a hi Tuisawpna (Baptism) ngah nailo himah tase le Catholic ii ngeina mah tawh hun bawlna le hanmual ah a luang kiphuumsak ding a, thungetna le hunbawlna kinei ding hi.
Pawlpi lam pan Sia Simon Paumuan le Pa Augustine Mung in hanmual ah a luang thupha piakna le vuina va neihsak ding hi.
Adah akap a innkuanpih, sanggam u le nau te ading in thungetna ah phawkciat ni.
Comment piaknop aomleh...