Tuunnu’ Suunni lungdeih sinthu ~ Zokhai
Lai Siangtho sung-ah a-omloh hang-in Ann Reeves Jarvis’ thupiitna atanu Anna Marie Jarvis-in naakpi-a apahtawi tham-in US Gamukte leh leitung mun tuamtuam-ah “Nu Pahtawi nading Ni” khat aphuutna tungtawn-in Nu-tawh kisai hunzat theihna kumsim-in akinei suak ahihman-in “Tuunnu’ Suunni”-ah sinlaai vabang hongphawng lungdeih sinthu khaubang hongsuut nuam-ing!
Nu neilaaite-in Nu pahtawi nading, lungdamsak nading citpiak tuamtuam, meelcikna tuamtuam, paak leh card tuamtuam-tawh abuai khengkhang laaitak-in Nu anei nawnlo zatam laai-ah keizong ka-kihel kha-a, ahizong-in thaneemna leh khuangaihna-in sehlo-in, “Kei’ tung-a hongbawl ding-a Pasian-in hoih asakteng acin ciang-a hong laaksak ahihi” ci-in ka-kizo thei-hi. Keimah bang-a Nu anei nawnlo, ahizong-in Nu’ angnuam pan-a akhangkhia khempeuh’ ading-in alungkimhuai ci-a saantheihna-in hong hehneem-hi.
Nu Pahtawi nading-in mi zatam abuai khengkhang hun-in ka’ sinlaai hongphawng mahmah thu-in;
Akhatna-ah: Tuunnu’ sakmeel amu ngeilo, Tuunnu’ nunkhum limtui dawn ngeilo, Tuunnu’ nau-awihla aza ngeilo, Tuunnu’ tongdam naubang asaang ngeilo sanggah ka’ laaizomte naakpi-in ka’ veipih-hi. Pasian-in Ama’ Hoihnaphapi hong guatsak ding-in thu ka-ngenhi.
Anihna-ah: Tuunnu nei-a, Tuunnu’ angnuam mahpan-in kiilbang khang teeisaam napi, Tuunnu’ nunkhum limtui-tawh kiilbang khang teeisaam napi Tuunnu meel-a thei nawnlo, Tuunnu’ luankhi maaimit asuan thei nawnlo, Tuunnu’ lungdeih paaibang a-pom thei nawnlo, ningzu aisa, guihtheih guú-in khuanggui khaubang akhih laaizom liangvaaite naakpi-in phawk-in kavei-hi. Amaute’ ading-in khuukdin-in thu ka-ngenhi.
Zomi Zogam giabang zuunding vabang apil, sumlubang suan vaaimaang’ minliante’n lung-in I-ngeel hiam-aw! Tuunnu’ albang dahna luankhi, laambang paakna luankhi-in Sianmaang-aw hong heii sak-aw! Tuunnu’ Vontawi, T. Zokhai (60 Narr-Maen Drive, Croydon Hills VIC 3136, Melbourne, AU)
Comment piaknop aomleh...