Philippines ah ngawngtan athuak Germany gammipa luanghawm ki mukhiata

Philippines ah ngawngtan athuak Germany gammipa luanghawm ki mukhiata

Philippines gamsung ah IS migilo tetawh akipawl Abu Sayyaf te’n nungkalsung in Germany gammi a ngawng tansak uhhi. Tua ngawngtan athuak Germany gammipa luanghawm pen ki mukhiata hi ci’n Philippine Military te’n tuni Sunday (Mar 05) in genkhia uhhi.

Abu Sayyaf kici migilote pen Southern Philippines gamsung ah tualbial uh a, mi ommuang te sumtawh ki tatsak kikding in mawkmatmat uhhi. Abu Sayyaf migilo tepen “kidnap-for-ransom network” ci’n ki ciamteh a, sumzon nadingin miman in kitansak kikzel uhhi. Hih migilo te pen Al-Qaeda makaipipa Osama bin Laden ii khaicituhsa hiding in kigen hi.

Kum 70 aphakhin Germany gammi Jurgen Kantner zong amat khit uhciang in $600,000 tawh hong tankhia un ci’n tangko khia uhhi. Ahun aciangtan hunin ki tankhialo ahih manin a ngawng tansak takpi uhhi.

Aluanghawm pen Saturday ni nitaklam in Philippine galkap te’n Sulu Island akicihna tuikulhtung panin mukhia uhhi. Hih Sulu Island pen Manila khuapi panin 1000km bang agamlatna aom thautawi migilo te ukcipna tuikulh khat ahihi.

Philippines Armed Forces te’n amau gamsung ah akithat himawk ahih manin hanciamtak in aluanghawm azongkhia uh ahihi. Hih akithatpa pen ama piannagam ahi Germany ah hoihtak in vuina aki neihtheih nadingin aluanghawm kipuakding ci’n Military Spokesman Colonel Edgard Arevalo in genkhia hi.

Aluanghawm pen tulaitak in Sulu Island aom Military Hospital misi koihna Morgue ah kikem a, agamah puaktheih nadingin akisam daituamtuam te ki bawlsan laitak cihi.

Philippine President Rodrigo Duterte inzong Jurgen Kantner pen ahunlap in ki honkhiazolo ahih manin, Germany kumpi thunei te tungah Tuesday ni in thuumna nei a, athat ahi thautawi migilo tezong Philippines galkap te kapsakgawp hi.

Philippines gamsung Sulu Province leh Basilan Province sungah Abu Sayyaf Terrorists kici migilo te akigawm in 500 bang omding in ki ummawh hi. Tuate abengkhiading in Philippine President Rodrigo Duterte in galkapte asawlkhiat hi a, migilo te mi 5 bang kaplumthei uhhi.

Hih migilo kipawlna Abu Sayyaf tepen 1990 kumpawl in akipankhia hi a, thauhoih tuamtuam tawi in mimawkmat in sumtawh kitansak zelzel uhhi. Akipat khiatzawh uh sum Dollars million tampitak ngenkhinding uh ci’n Security Experts te’n genkhia hi.

Tulaitak zong hih Abu Sayyaf migilo te’n sumtawh tatsakding in akep uh Hostages mi 26 bang kemlaiding kici hi. Tualak ah mi 13 pen Vietnamese, mi 7 pen Filipinos, Duthch National khat, Japanese khat, Indonesian 2 leh Malaysian 2 cihbang ahi uhhi. Sumtawh tansak in akhahkhit uhzong mi tampi omkhin cih kiza hi. ZD Sawltak #zomidaily