Myanmar – China gamgi dungah buaina hangin mi 160 in sihlawhkhin

Myanmar – China gamgi dungah buaina hangin mi 160 in sihlawhkhin

Myanmar, Shan State sungah Kawlgalkap te leh Ethnic Groups thautawite buaina hangin, abeisa kha 3 sungin mi 160 in sihlawhkhin cih Tuesday ni in Senior Army Official khatin genkhia cih AFP pan kiza hi. Kawlgam sungah kilemna leh daihna omnai hetlo cihpen kilangh mahmah hi.

Abeisa 2016 November kha akipan China leh Myanmar gamgidung ah Kawlgalkap te leh Ethnic Groups thautawi te kikapna piangden a, asi bekbek 160 banah cimawhin galtai zong mi 20,000 valbang phakhin hi.

Aung San Suu Kyi makaih Government in kum tampisung abuaiden gamgidungteng kilemna aomnading hanciam himahleh Northern Shan State leh Kachin State sungteng ah kilemna leh daihna taktak omnai hetlo hi.

Myanmar Military inzong Ethnic Groups thautawite dopbawltuan hetlo in, galvanleng leh thaupi “Air Strikes & Heavy Artillery” nangawn tawh kapngekngek uhhi.

Hihthu atelcian mahmah Experts te genna ah 1980 kum khitzawh kikapna te lakah akhauhpai, anasia penpen hiding ci uhhi.

Kachin State sung bekbek ahzong 2011 kum khitzawh gamsung tualgal pianna hangin mi 100,000 val galtai in omkhin ci a, United Nations inzong Humanitarian Crisis lunghimawh mahmahta uhhi.

Myanmar Government inzong Peace Talks anihveina ahanciam laitak hi a, tuni March 01 (Wednesday) ni inzong Naypyidaw ah Aung San Suu Kyi leh UNFC (United Nationalities Federal Council) te ki mukhawmding uh cih VOA pan kiza hi.

Myanmar Peace Talks anihveina akithawithawi hangin, kilemna taktakpen omthei naihetlo kici hi. Aung San Suu Kyi in March khasung in Peace Process bangciciang hong tunpihdiam cih kilunglut mahmah leuleu hi. ZD Sawltak #zomidaily