Tungzang khua ah tan 10 sang innpi (ake) mei in kang

Tungzang khua ah tan 10 sang innpi (ake) mei in kang

October 12, 2019 ni zan hun laitak 12Am pawl in Tungzang tan 10 sanginn pi (ake) mei in kang cih thu kiza hi. Hih meikatna ah laisinna sangkhan te kang tum in sia-innte zong tampi kisia hi cih thu kiza hi.

“Zingsang 12:30 Am hun in sanginn mei kang hi cih thu phone tawh hong ki ko khit phet ka gal et leh meikuang pen na lian lua khinta hi. Akipat pen 11: 30 PM (11- 10- 2019) hun kim hi kha ding in um mawh ing.

Kei zong Tuithang khua meiphelh zum phone ka setpah hi. Ahizong in meiphelh zum phone ngah zolo ka hihman in Tuithang Hausapa ka hopih hi. Tuithang hausapa in zong azanzan mah in meiphelh te na kaikhawm pah in hong kuan pheisak pah hi.

Meiphelh mawtaw hong tunma in khuasung ah dak teng tum ngei gai in khuasung tuilakna te bottat in mipi in mei ka na phelh uh hi.

Tuithang pan aa tai 3 kim akigamlatna Tungzang khua ah meiphelh mawtaw zingsang nai 2:00 Am (12-10-2019) hun kim pawl in hong tungta hi. Kamsiatna tawh pawlkhat na kangtumkhinta hi.

Akatna ahang pen tu in palik te le meiphelh te tawh ka kansan laitak uh hi” ci in Tungzang hausapa in Zingsol ah hong gen hi.

“Ko alum khin phone hong lut in `Sia ih sanginn mei kang´ cih hong kigen ciang ko zong ka innkuan uh adahlua ka ci uh ling keei in tua pan Siapa zong zingsang ai 1:00Am (12-10-2019) hun azan azan in Tungzang pai pah vingveng hi” ci in Tungzang sangsia pipa zi in Zingsol ah hong gen hi.

“Meikat kipatna pen Sianu Lia Lian inn sung pan hi aci om hi. Ahizong in Sianu Lia Lian tawh, kei tawh, adang sia pawl khat tawh Khuado sangkhak zang ding in Tedim ah mawtaw tawh aciah khia khawm hi ung. Ahang bel hong gencian thei keng. Pasian bek in thei inteh. Ahang bel Hausa te, palik te le meiphelh te tawh ka kansan laitak uh hi.” ci in Tungzang sangsia pipa in Zingsol ah hong gen hi.

“Sangnau pang te laisin nading pen pi 90 azai hall khan khat om in tua sung ah ahithei bang in sang kikahsak phot leh aci hing hausa te tawh kikum in laisinna khan ding ka kawm uh kul thei inteh.” ci in Siapipa in hong genbeh lai hi.

“Tungzang sanginn pi pen tan 10 sang (ake) angah zawh tukum tawh kum 4 acing hita in tu laitak laisin sangnaupang 480 om hi. Sangsia 28 om hi.” ci in Siapipa in Zongsol ah hong genbeh lai hi. Zingsol tanu te