Tong Luansiam Lia Zozam – 5
Zozam te zong Khuado Pawi bei zawh ni tam taam nawnloin a khua lam vuah a ciah ding uh hita hi.
Zingsang thobaih in, a van uh guang khin uh a, anne baih in kikhen dingin nisuak ciciai nuai ah a van teng uh tawh a ding khawm liliai uh hi. Innsak inn khang pan lawm leh gual, meltheihte in “Ciahta ding na hih uh leh hih na pua aw” ciin tuibuk, vaimim tang, taang tang, beli, balpi, cih bang hong puak uh a, a mangpha kikhak sung un ni hong suak to veva man hi. Khuasung khempeuh zing ni suak in hong taan khin ahih manin kong gal pan in zong a kimu theita hi.
Lianbawi zong a inn uh pan zingtho maiphiat dinga pangkhang pan a khuadak leh a gal ah Zozam te nuta hi leh kilawm tak galmuh a, a maiphiat sianga a et phat leh na hi mawk ahih manin amau kiang lam delh in a khedap zong bulh manlo in hong tai phei valval hi.
“U Lianbawi, ko na ciah ta nung ei. Cidam in i omna ciat ah Topa in hong kem hen maw”
“Zozam, taam lai le uh cin ka cih hiven; no lah ciah sawm teitei maw….”
“Taam taam ut mah hi ve ung, khua lam pan na sawt luata ding ahih cianga”
“Hong ngaklahte adingin bel sawtta mah ding aive. Na van uh tua teng maw? Kong kha dia?”
“Ngaklah zong om tuan kei… he, hiteng hi ei… ei bang peuh hong kha nuam kei ni cia…”
“Hong kha leng a heh thei khong om ding ahih cianga maw”
“A om tuanloh hang hong kha nuamkei ni cia”
“Ka puan va silh ning, ka khedap va bulh ning in, na khua tan uh hong kha pah ning ei…”
“Kong ciamnuihna hi u Lianbawi, hong kha kei o. No zong nasep ding hau nuteh. Kong maingap man bek hi”
“Phamawhlo pi, kikholhna peuh e… na khua uh pan ciah kik pah lel ning e, sawt hong tam kei ning, hong kha nuam limlim ing..”
“Aw, peuhmah kei ka maizum si e u Lianbawi”
“Kei, angtang kisa zaw peuhmah ing e Lia Zozam aw”
“U Khualbawi leh U Kambawi zong mangpha ka khak nop hiven”
“Amau bel tuni singphuk ding nei in zingsang tung a kuan khin hi in um ing… na ciah taktak ding uh thei leh hong kha nuam tak ding uh hiven maw…”
“Ni lah sang deuhdueh e, lah kipai khia thei mahmahlo, bangci khua kitungzo mawk dinghiam?
“Khua i tunzawh kei leh zong lampi a i giak mai kei dia maw Zozam, ei gel kizom lai leng”
“Ut kei vak teh, u Lianbawi aw.”
“Ka nu, ni sang lua ta hi lo maw, paita lo ding maw?
“He, hilua ei, paita mah ni ei.”
“Pute, khuapihte khempeuh aw, lungdam mahmah ung. Nong itna te khempeuh uh ka ngaihsut ciang no khua ah Khuado siim pen ko Khua ah nungkum a nong siim uh sang cihtaak sazaw ung. Mai kum ciang noh nong siim kik hun uh ahih manin cidam a kimuhna ding thungetna ah kiphawk ni. Tung Pasian in kum pha, hun pha hong musak kik dingin i thungetna ciat ah kiphawk ni. Na vekpi un na mangpha un”
“Na mangpha un. Paita ding na hih uh leh na pai mengmeng un. Tuni khuapha, nisa pian ahih manin na Khuado sa puak khawng uh lampi ah a uih man kha ding hi….”
“Himah ei, lungdam ei. ”
“Tangvalte in “Uih pian vitvit leh kihat zaw” ci uh hilo hia”
……ha ha ha ha………..
(zop lai ding)
Hau Za Cin
Phuitong Liim
Comment piaknop aomleh...