Tunai Kalaymyo lam Thuthang pawlkhat

Tunai Kalaymyo lam Thuthang pawlkhat

GAMDANG PAN KAWLGAM HONG CIAH SIA PAWLKHATTE’ HUNNEIHNA:-

1. Sia Khup Khan Thang Taithul pen a mikang lawmte khat tawh i gam
hong ciah ah Tedim leh khua tuamtuam pawlkhat ah va hawh uh hi. Amau
geelna leh lunggulh thu ahih leh i gam khantoh na’ng mailam ah bangcih
mapan ding cihte Mikangpa in zong hong lunglut mahmah cih kiza hi. A
daikdiakin Saizang khuagei a Vanleng tual a om theih nading lampi bang
om hi leh hong vaihawm pih nuam hi, cih zah dongin kiza a, kizoppih
pen khauhpai tuak mawh het lo ahi hi.

Tuaban ah i gamsung khantoh nading sum tawh zong hong panpih nuam cih
kiza hi. Amau geel sawt tam lo-in ciah kik pah uh hi. Hih Sia Khup
Thang makaihna mah tawh Nelson tanu te Tedim hong hawhpih uh a, CMBC
huang ah a kilam thak ahi, Nelson topa te phawk tawh na VIP zintun inn
pi zong etpih kawm hi.

2. USA mah panin Revd Khai Khaw Pau (khualui Dimlo) zong khua hong
ciah a, EBC khawk khawmpi ah thugenpi sem cih kiza hi. Amah zong
zandiak mahin ciah kik khin hi.

3. Revd Billy Sian Gen Kam (a) Billy Kampi zong a Pa’ hong nusiat
nungah hong ciah masakna hi a, vanleng tual ah mi tampi in dawn uh hi.
A pa (REvd Dam Khan Hang) han ah mual bawlpha dingin vaipuak nei zong
ahi hi.

4. Tu nunglam deuhin Tg.Mung Tul Sai (Saipi) zong ninei dingin hong
ciah a, Mopawi a bawl khit uh ciangin USA lam zuan kik ta, cih thu
kiza hi.

5. Tulsa, USA panin Pa Pau Sum Thang (Pau Sum) zong innlam vanin hong
ciah a, kha khat khawng hong tam khit ciangin a nasepna Tulsa lam mah
khu vingvengin leng kik ta hi.

6. Sia Sum Do Thang zong ZBCM gambup khawmpi Leilum, Tedim ah sim
dingin hong ciah hi. A dangdang zong omlai kha in cin, keima phawk
teng kong genna ahi hi.

KAWLGAM PAN GAMDANG ZIN SIA PAWLKHAT:-

7. Revd Tuang Khan Kap (a) Kappu pen a beisa December kha sungin
Portland, USA ah lam zuan a tuni dong tam lai hi. A paina bulpi ahih
leh Portland a om eimite’ biakinn kong honsak ding a, a sap uh cih
kiza hi. Siapa hong tuntunna ah na vaimuak ciat un, a kum zong tampian
ta a, na a naksep mahmah, a panpih taak Sia hoih khat ahi hi.

8. Revd David Go Lian Sum (a) David Suum zong USA ah va kileh zel cih
thu kiza a, a paipaina ah thapiakna nei kawikawi thei, cih thu kiza a,
i lungdampih hi.

9. Evan. Pau Gin Lian (Leipi BC) leh a pawlte mi 4 Malay ah
khamtheih-guihtheih lam tawh kisai cialpi bawlin va pai uh a,
cidamtakin Kalaymyo hong tun kik khit phet un a pawlpi, Leipi BC Hall
pi-ah mikangte tawh nitak thum sung cialpi bawl suak uh a, lawhcing
cih kiza hi.

10. Revd Kham Suan Go (Mualhoih Khamno) Galilee A.G zong Malaysia a
om Zomite lomomna, misia tampite’ omna lakah guihtheih-khamtheih panin
a suahtak theihna dinguh lunggulhna leh amaute’ i sapna tawh va pai a,
lawhcinna tampi kimu khia, cih kiza hi. Amah tudong omlai hi.

11. Revd Kham Khen Tual (Assit.Ptr, AMC) pen Australia a pawlpite’
sapna tawh Seminar pia dingin a zinlaitak hi a, lawhcinna tuamtuam om,
cih thu kiza hi.

B. KAWLGAM SUNG ZOMI SIAPI TE’ KHUALZINNA & KHAWMPITE:-

12. Revd Dr Jacob Kham Khan Mung (a) Jacob Mung (CLC, Ygn,) leh a
naseppih ahi, Sia Thawn, Sm.Lian, Sm.Vung leh Piangpi tawh Kalaymyo
lam hong zin uh a, Tedim EBC khawmpi a kihel khit uh ciangin Yangon
aom, amau Lai Siangtho sangpan a mansa, Tamu te Sm.khat in naupang
pantahna sang thak khat aphuatna ah honsakna pawi bawl dingin zingsuak
uh a, tua khit ciangin Yangon lam zuan kik uh hi.

(Hih CLC, Ygn. in Printing Offset a thak sitset khat nei ta uh a,
Laibu leh lailam tawh kisai a bawlnuamte in phawkhuai cih deihsak thu
i kihawmsawn nuam hi. A cihna uh a, mun dangdangte in laibu, Journal
tampi a bawl leh a percent danin la ta leh hih sai te in copy 50 leh
tulkhat a lak dan uh a percent kibang ci ahih manin mailam ah i
mipihte’ hamphatna khat ahih gigena phawk huai ding hi).

13. Revd Dr Go Chin Zam (a) Zambawi (O.M, Myanmar) leh a zi a ta le
sanggam pawlkhat te pen March kha beikuan a kipan Tedim gam ah hong
zinto uh a, a munmun ah Seminar piakna leh cialpi bawlnate nei
kawikawi uh a, Topa’n lawhcinna tampi pia, cih kiza hi. Sia Zambawi
pen a zi, Sianu Manbawi (Hongkong), a naupa Sia Khai, Janpan te Siamah
khat, Hongkongte Siamah khat leh a Music tum khat uh tawh hong kithuah
to uh hi.

A masa-in Tedim Section Khangno Khawmpi pen Phunom Dimzang khua ah
tunga, tuatak ah sunhun thusinpihna leh nitaksim cialpi bawlna tawh
thuah a, mipi tangtai thei tek mahmah uh, cih a kihel khate in gen
ciat uh hi. Nek-le-dawn lam bang bel genvetna om kei, nasia lua uh
himai, ci uh hi.

Tuateng mankhit phet mahin Thuklai Section Khangno khawmpi ah
thusinpihna leh hanthotna pia-in pai a, tua panin a pianna Tungtuang
ah zan khat tamin va pai to uh a, hunbawlna thupitak mahin neihpih
kawikawi cih thu kiza hi.

Kalaymyo hong tungsuk uh ciangin nung kigin ni nitak hun Agape AG
(AMC) khangno hun ah a naupa, Sia Khai in hanthotna pia a, nu-le-pa
neilaite, nu nei lai (or) Pa neilaite leh nu-le-pa nei nawn lo
khangnote in nu leh pa te’ tungah thupha dawh ding, thupha bawl ding a
manphatna cihte gen a altar call in mipi khempeuh ki-ap zihziah a, hun
manphatakin kizang thei hi.

Dr. Zambawi in nung Nipi Ni zingsang hun pen Tahan Tuiphum Biakinn ah
hunzang hi. Thawhkik Nipi ahih manin thawh kikna i vangliatna thu mah
gen a, “A thawhkik khit cianga a kammalte” cih thu-lu tawh gen a, mipi
in tha kingah mahmah hi. Kei zong ama hunzat ding ka theih teh ka va
delh to vingneng a, kihel tak kasa mahmah hi. A nitak kik ciangin a
naupa, Sia Khai in AMC, W.M hun ah hunzatna nei kik a, Monday ni-in a
innkuanun Yangon lam zuan kik ta uh hi.

14. Revd Cin Khan Thang (a) Pastor Thangpu (Hallelujah A.G, Monywa) te
innkuan in zong hih hunsung mahin Bethel A.G, Tedim ah Crusade bawl uh
a, lawhcing mahmah cih kiza hi. Sia Thangpu le azi, Sianu Khen Cing,
Singapore panin a tapa, Pasotr Kimpu, Yangon panin a tapa, Sia Sangpi
leh Lasa siam pawlkhat pai uh hi. Pastor Kimpu Kawlgam hong zin sungin
a naunu, Pastor Khawmnu in a pawlpi makaih pak cih thu kiza a, a
innkuan vua mapang khawm thei diamdiam, ettehhuai leh a hampha innkuan
ahi uh hi, cih kigen ciat hi.

15. Kalay No.2 Section Khangno Khawmpi pen Singzung A.G ah kibawl a,
tuamun ah Tg.CK.Khai pen thugenpi dingin sam uh hi. Amah pen
khangnolai khat ahih hangin thugenna ah a kitamzat simta, Pasian’ hong
zatsak khangno khat ahih banah Lasak, Laphuah talent khat a nei leh
guitar, Keyboard cihte a tumthei khat ahih manin tulaitak khangnote’n
tha ngah pha diak uh ahi hi.

16. AMC (Agape A.G) Kalaymyo ah Leadership & Mission Conferece nei uh
a, Australia panin Pastor thum hong pai a, Kamphen dingin Yangon panin
Sia Peter Mangpu tawh hong kithuah to uh hi. Sun nih sung thusinpihna
leh nitak cialpina nei uh a, biakinn dim mahin thungai kipai den hi.

A hunawng khat sungin Sia Peter Mangpu in Singzung a Section 2 Khangno
khawmpi ah thusinna hunkhat pia a, tha kingah mahmah cih zong kiza hi.
Hunawng om man lo-in hun manpah tampi hong zang thei uh a suak hi.

17. Tunung a i gen Lai Siangtho buu hawmkhiatna a ban tawmkhat behlap
lai pai dih ni ei.

BSM te’ bawl ZIS te’ hong leisak, ZCLS tungtawn a kihawm khia Lai
Siangtho buu hi a, Tedim, Tonzang leh Cikha gam aa ding CMBC panin buu
688. Kawlzang lamteng aa ding AMC, Kalaymyo panin buu 412 a
kihawmkhiat ban ah “TAINGEN THUNGETNA MUAL” ah zat dingin buu 25
khenkhia uh cih kiza hi.

18. Zogam sung khantohna lianpi khat ahi, Motor lampi sialna tawh
kisai-in ZRDP te’ sepsan laitak ahi, Kawl Dimzang pan Taaklam leh
Taklam pan Khiangzang kikal teng a zik san laitak uh hi a, lampi zai
mahmah hi. taaklam pan khiangzang kikal seplaitak hi a, Khiangzang
khua lam neh suk mahmah ta hi. Hih lampi ah cycle nangawn a tun ngei
nai lohna lam thak kisat ahi hi.

ZRDP Pu, H.Vum Nang zong lampi nasepna vai-in Nyipidaw ah lokuan zel
hi. Mabante phawkpih ciat dih ni ei. A vei takpi a nasempa leh a kipan
khia masa pen pa kicithei ding ahi hi. Tua lo a mundang dang ah zong
amau satan ngahna ciat khamtung lam teng ah sem ciat uh cih kiza hi.
Ih gam khantohna gimnam tuam mahamah ta, cih ding ahih manin i angtang
hi.

19. ZICC khawmpi zong tulaitak Tahan BC ah a bawl san laitak uh hi a,
Siapi Enno a kipan Sia tuamtuam tamsim mah kihel thei uh, cih kiza hi.
Hih ZICC ah pen tuni ciang Tuiphum sung leh ZBCM sungpanin hunbit
Pasian’ nasem MC pan a tungsiah ngahsa teng ii kizopna cih kigen hi.
Mai Nipi Ni sunhun pen pawipi tuamtuam ah a pawlpawlin hong kikhen
ding uh a, thugenna nei kawikawi ding uh hi, cih thu kiza ahih manin
thungai nuamte in i kancian ding hi’n teh ci hang.

20. Dahpihna tawh kisai a tuamtuam omte’ sungah tunung lam deuh a hong
nusia khat ahi, Pa Munglek pen i groupmail te ah kisuaksak lo hi leh
kilawm sa ing. Mi pawlkhat in sih sia i ci diak ding hiam ah, kum khat
sungah tuabang teng piang, cih a na ciamteh tinten khawng ki-om thei
ahih manin hiah hong suaksak kik hi ning.

Pa Loh Lam Mung (a) Munglek (Kum 34) CMBC pawlpi mi, Upa Dam Khua Zam’
tapa upen, Sm.Cing Khan Nuam’ pasal in March 13, 2015 ni-in Mualbem
gam panin Motor tuahsiahna tawh hong nusia cih kiza hi. Tua motor
tungah a tuangkhawm Monywa College Siamah unau peengte geel in zong
tuamun mah panin hong nusia cih thu kiza hi. Tuate zong Tedim mah ah a
innkuanpihte’ lungkimna tawh kivui cih kiza hi.

Hih Munglek pen tulaitak CMBC zintun inn nasiatak a kilam pen ah
Engineer a sem hi a, nasep limci tampi maban a neihlaitak ci uh ahih
manin Zomi khangno mipil khat mah a sumh zel hi hang, cih i kitheisak
nuam hi. Amah pen GTU, Kalay panin B.E a zo khin khat hi a, a zi pen
Sia Lian Tuang (Microwave Dept.) ii nau nu ahi hi. Amau ta pasal no
nih nei man bek uh hi.

21. Kawl Dimzang A.G te in Biakinn Thak Konghon leh Crusade thuah uh
a, Speaker dingin Gamlai a, Pastor Thang Lam Mung samin cialpi
bawlziah ziah uh a, lawhcing kisa mahmah uh cih thu kiza hi. A nipi ni
sunhun ah Kalay No.2 Section panin makai pawlkhat zong va kihel thei
cih thu kiza hi.

22. Zaayargyo Dum pen nungkum a kipan limbawl pha mahmah kik uh a, a
zo dek lam hita hi. A pangtuak a khaktan khit uh ciangin tui paihkhiat
nang bawl a, tu’n a nunnung pen ding a lui taw lam a khaktan uh
khaktan khin dektak ta a, tua zosiang le uh Kumpi’ geelbangin
September pawl ah meipia thei ta ding cih gelna leh lametna om hi.
Tulaitak VIP mei pen nikhat hal, ni nih hal cih danin hong pai a,
tuabek zong nuamtuam kisa mahmah hi. Meter Box zong kisiau thei ci a,
a nei nai lo mi tampi in lai phah ngeingai uh hi. Tulaitak Kalaymyo ah
Meter Box neisa pen innkuan 4000 pawl pha hi, ci-in meisailamte’n gen
uh hi.

23. Maikal sunga hong tung ding Kawlte’ tuibuah pawi pen tukum
Kalaymyo leh mun dangdangte ah a beisa kum sangin limtakin bawlsawm uh
a, hausa lam panin huhna sum khawng don sawn uh cih thu kiza hi. Hih
vai tawh kisai Zomi Times in deihsakna tak tawh mipi tung’ a genna ah
a pia nuamte’n pia in, a pia nuam lo te’n pia lo lel ding a, ahih
hangin siatna kam lam pau lo in, sum nei het kei ung ei, ci lel leng,
cih thu gen a, mipi in thupi sa mahmah hi.

Hih hunsung mahin Christian biakna tampite in biakinn ciat, ahih kei
leh gamsungah Campaign bawl a, khangnote makaih dingin geelna tuamtuam
kinei tek a, thupi kasa mahmah hi. I langpan ding a hi kei a, i kihel
het loh ding leh a mansiang dong i ta i nau te khuasung vak loh theih
theih ding hanthot ding hong thupi tek ding ahi hi. Topa’n Ama mite
Tuibuah pawi tuahsiatnate tawh hong kipelhsak tek ta hen.

NB: Ka laigelh pen tam sim tham kha-in cin, hong simsak tantan te’
tungah lungdam. Photo pawlkhat pen ka Card pua kha lo ka hih manin
hong khak thei vat lo suak ing. Thusuah te a ni a kha hong gelh nawn
keng, a kipelh khawng om kha leh cih hi-in, na theisiam un. (A
huampi-in March kha bei lam teng leh tuni ciang huam a sepnateng ahi
hi). Spell zong check nawn lo ka hih manin a deihna a kitel nak leh
hong na Amen sak ciat mai un, cih hong thuum ing. Ka Lungdam.

Thupuak,
Peter Khampu