Tulaai Leitung Thuthang Tuamtuam Updates July 2, 2015

Tulaai Leitung Thuthang Tuamtuam Updates July 2, 2015

• Leitungbup Zomi kheempeuh in haaibang ingak ngeungau ahi Global Zomi Idol animasa July 2, 2015 ni in Tulsa khuapi FGA Biak Inn pi ah nuamtak in kizo ta hi. Australia,Myanmar leh USA gam pan Lia le Taangpaal leh Pa te in thalawp tak in dem uhhi. Tuni peen Matpiabuang kisinbuang khat a kibawl ahihi. Ladem kheempeuh lak ah thukhenlam te singlaai aphawng phadiak khatbek om ci uhhi. Azom July 3,4, ni nitaak nai 7:30 sim in kizom to ding ci uhhi. fga.com/live.tv

• Vietnam gaallaai a gaalkaaplui 2007-2012 dong Virginia state pan mipi teel palaaipi Mr Jim Webb kum 69 in US President 2016 kademding ci in July 2, 2015 ni in taangkokhia ta hi. Amah peen Democratic Party pan 2016 US President demding a 5 na hia Republican lampan bel 14 kigingsa sitset in om uhhi. US gam in kimakaihdan ahoih ikisam a adiak in gaalkaap lam,Thukhenna lam leh sum le paai zonnalam a masuan kician kisam ihihman in kongkithawi kuul ci hi.BBC

• US gam thukan FBI te in July 4,2015 US gam suahtaakni phawkna pawi sung US gamsung ah Mi Ngongtat ten alauhuai ngongtatna bawlkha theiding ahihman mipi kidawmsiam ding in July 2, 2015 ni in taangkokhia uhhi.Mi lomdeuhna aomkha Zomi te pilvaangciat ni.FOX

• Egypt gam Sinai mualtung a om Egypt gaalkaap phualpi akisimzawh nikhat July 2, 2015 ni in Egypt gaalkaap ten nasiatak in gaalbenna nei uha, migilo 23 thatlum zo ci in taangkokhia uhhi.VOA

• Bangladesh gam Dhaka khuapi ah Asia gamsung avelding a al-Qaeda migilo te saw makaai nih leh anautaang 10 July 2, 2015 ni in Bangladesh thunei te in Kaman uhhi ci in taangkokhia uhhi.VOA

• Nigeria gam khunglam Borno state Kukawa khua kiim teng ah Boko Haram migilo te baanluut in June 30 ni in mi 48 that uha, July 1,2015 ni in 97 that uh hi ci in Nigeria gam thunei te in July 2, 2015 ni in taangkokhia uhhi.BBC

• September 11,2001 kum WTC Innpi khamul sau zialzual ten Vanleengtawh aphuut laaitak thalawptak a meiphelhding a ataaimasa peen Camelo Mercado kum 63 in Cash X100 kici khuttawh akiatciauciau te July 2,2015 ni cimphawng akiatciauciau leh $5million pauh hi. Amah peen 2001 kum apmeiphelhna pan tuapdamlohna tawh anasepna pan akhawl nasep neilo khat ahihi. Nasepna khat peuh ah citak tak in seem leeng agah omveve. CNN

• Philippine gam Ormoc khuapi pan Tembaw khawlna pan akuankhia mi 189 apua Tembaw pi khat July 2, 2015 ni adinkhiat zawh sawtlo khat in kilumlet a, mi 38 si in 134 kihonkhia man in mi 17 mangthang laai ci in Philippine gam Red Cross ten gen uhhi. Hih Tembaw tung ah USA gammi 3 kihel a akihonkhia te lak ah thum un kihel citciat uhhi.CNN

• US Vanleeng hawlpalo Tuithe vanleeng ten Tunisia gammi IS migilo te makaaipi khat ahi Tariq bin Tahar al-Awni al-Harzi golum hi ci in Pentagon gaal phualpi pan July 2, 2015 ni in taangkokhia uhhi. Hih mihingpan peen IS te ading sumnasiak zonsak in gamdangpan gaalkaap ahonhon in kaihkhopsak ci hi.CNN

Lungdam
Thang Khawm Pauzomi