2015 Kawlgam General Election ziakai loding

2015 Kawlgam General Election ziakai loding

Kawlgam ah 2015 kumbeikuan in General Election bawlding in akigelsa hi a, aki gelsa hun aom mahbang in kibawlding hi. Bangmah ziakai nading omlo hi ci’n Kawlgam kumpi thunei te’n taangko khia uhhi.

“Myanmar Union Election Commission” ah Chairman asem ahi Tin Aye in hih Kawlgam General Election vaitawh kisai Yangon ah Political Party Members tetawh aki muhkhopna ah genkhia hi cih AP News pan kiza hi. Tin Aye genna ah Kawlgam General Election akibawl ciangin International leh Local Observers ki samding a, tuate in Election hunsungteng encik theiding uh cihi. General Election dingpen maikum 2015 October khabeikuan ahih keileh November kha kipat lampawl hiding cihi.

Gen. Than Shwe in Kawlgam thuneihna aletcipzawh General Election khatbeibek ki bawlpan hi. 2010 Election hunlai in galkap kumpi tawh akizom Party in gualzawhna hong ngahkhia uhhi. Tua hi a, maikum General Election ahzong galkap kumpi sungpan makai te mahin ngahding cih ki genhiauhiau hi. Ahi zongin galkapmang te’n zawhngaplo uh ahih manin Election pen ziakai khatheiding cih thuleng kigen kawikawi hi.

Tuahang in “Myanmar Union Election Commission” Chairman asemlaitak ahi Tin Aye in maikum General Election pen gelnasa aom mahbang in ki bawlding hi ci’n a taangko khia ahihi.

Myanmar Opposition Leader Aung San Suu Kyi inzong 2015 Election pen suaktatak leh thumantak in asepding uhleh ahunlap in abawlhuai hi cih genkhia hi. ZD Sawltak