Kimpu leh Kimpi – 40
Thunget a tawp uh Amen a cih khit uh ciang a khuadak uh leh inntekpa Kimpu lu kun sa in na om a, a phot sawm uh hang a phong zo nawn kei uh hi. Innsung khempeuh dahna kahna khitui tawh kidim a, leitung kilumlet hi.
Tanu te in kuang hong la uh a, hankuang sungah a sial khit uh ciangin zanhak dinga hong pai nungak tangvalte in lasak a kipan uh hi. Zan thapai lasa in misi innkuante hehnepna hun a zang uh a, zing khuavak ciang nupi papi hong lut in nungak tangval tengin hanmual lamah hankhuk to dingin annek kham ciang a pai pah uh hi.
Nitak Ni tum kuan, ann huan hun, misi vui dinga akithawi laitak un Kimpu a zite, a tate leh nu leh pa, u leh nau, meltheih tengin hong naih khiukheu uh a, vaikhakna nunung penpen Pawlpi Pastor in a nei hi. Tua laitak in hankuang sungah balloon mutpuak sung pan huthe bang, bawng naakvang a liit om bawngin a phit lala bangin a ging khat hong om a, a et uh leh a misi uh hong naak kik lutlut hi. Lamdangsa lua in Kimpu tate in, “Ka pa a mit a hak veleh” ciin a mit a khoihsak sawm uh hi.
Kimpu hong thokik a, khuasung khempeuh kizeel pah in a za masasa in lamdang a sa uh hi.
Kum 20 a nuntakna kikhangkhaansak a, tua sung khempeuh mihing sep theihloh Pasian damsakna thu bekbek taangko in a vak kawikawi hi. Topa in thupha pia kik a, tu leh tate mel mu kim in innkuan nuam a suak uh hi. A damkik zawh a gen mun mahmah leh a tetci panna khempeuh ah a gen mangngilh ngeiloh khat om a, tua pen:
“Ka thuak gimnate khempeuh piangsakpa hong gawtna kasa a, kei ading a manpha na hizaw hi. Hauhna, minthanna, leh vangliatna te khempeuh van leh lei bawlpa loin a mawknapi hi a, tuate ka neih loh hangin ka lungnopna khat om hi; sihna pan hong phongkik ka Topa!”
Leitungah a khan-gual banlah mah tase leh, a hun nunung lamah ‘amanpha nuntakna’ mu kha ahih manin mi kamsia lak pan mi hampha khat suakkik hi. A muan Topa in a tu a ta khangah mi nuamsa vive suaksak a, vai khempeuh ah a lamzang mahmah uh hi.
:: BEITA ::
Hau Za Cin
Phuitong Liim
Comment piaknop aomleh...