International news: Trump kumpi in gamdang sangnaupangte tawh kisai athupiakna dokkik
Washington DC – July 14: US gam sungah Student Visa (F1) tawh a om sangnaupang peuhmah a pilsinna uh online bek ahih leh US gam sungah om thei lo ding uh hi, ci-in a beisa July 7 ni-in Trump Administration in a tangko pen tuni-in dok kik hi.
International Student te lungmuangtakin online vive tawh ahi phial zongin kuamah kimat kihen om lo ding, a gam uh zong ciah kul lo ding, cihna hi.
Trump thupiakna ahi online bek ahih leh gamdang sangnaupang peuhmah a gam uh a ciah uh kul ding, cih thu hangin University leh College khempeuh phial ah lunghihmawhna leh buaina lianpi piangsak a, Zomi student Visa tawh a om mi tampite leh amau tawh kisai kha khempeuh adingin zong lungnop mawhna tampi piangsak hi.
Hih thu piak ahih cil a kipanin Harvard University, Massachusetts Institute of Technology te leh USA gam sung State 18 pan thukhen mangte in hih bang thupiak pen thukhun zui-in piang thei lo hi, ci-in thukhen zumah thu bawlna lai phah uh hi.
Tulaitakin USA gamsungah gamdang pan pilna sinin a om mi million khat (Tein 10 val) hi, ci hi. Tuate lakah sangnaupang a tam pen gam 5 te hi bangin Institute for International Education (IIE) te in ciamteh uh hi.
- 1. China – 369,548
- 2. India – 202,014
- 3. S. Korea – 52,250
- 4. Saudi Arabia – 37,080
- 5. Canada – 26,122
Hih gam 5 te zomah Bangladesh, Brazil, Nigeria leh Pakistan te kihel uh hi, ci hi. Myanmar panin pilsin a pai sangnaupang tul leh zanga val pha dingin ki-um mawh a, Zomi student Visa tawh a om mi 20 kim pha dingin ki-um mawh hi.
More: Tedim leh COVID-19 ~ Siama Zam Cing
Covid-19 huhau in USA gam sungah College/University te in online bullhuh dingin khensat khin uh ahi hi. Covid-19 hangin nasep kuan ding maw kuan lo ding, sangnaupangte a ngei bangin sang inn ah pai ding maw pai lo ding, biakinn ah mipi kikhawm ding maw kikhawm lo ding, cih thu pen tulaitakin gen a lawh mahmah leh kinialna zong a piangsak thu khat hi, ci uh hi. Src: FOX News/ The Tedim Post
Comment piaknop aomleh...