Zindona ah theihhuai

Zindona ah theihhuai

Nisim in ih inn ah lengla (zinn) ki nei thei hi. Ih inn ah mi hong hawh kei lezong midangte kiangah lengla in i omthei hi. Laisiangtho sungah zinn do thalawp ding, zinn dosiam ding thupitak in hong hilh hi. Zinn deih ding zongh honghilh hi. Tuamahbangin Zomi te zong zinn le leng a do thanuam mahmah te i hihi. Tuaahihmanin zinn le leng do na ah theihding tampi om hi. Tuate lakpan neucik (tawmno) khat ngenkik ding hihang.

Zinn te Niangtui (tui) na piak ciangin

1. Hai siangthosak sitset masa in.

2. Na piak laitak in a hai na khuttawh khuh kei in. (hai a tunglam pan tuamsuk in tawi kei in)

3. Na khutme te khatpeuh a haisungah lutsuksak kha kei in.

4. Hai bil lam zinn pa lam ah koihthei lecin etlawm hi.

5. Hi thei leh kanglingliang in tawi in.

6. Zinn hong tung khawm minih hai kibang tawh na piakding ngaihsun in. (khat man hai tawh, khat pen phan haitawh cihdan hisak kei in)

7. Duhkeng a cihleh pia tantan kei lel in. A dang bang hongbawlsak ding ka hiam ci in dong kik zaw lecin hoih mahmah hi.

8. Zinn te in a dawtsiat khit deuh ciangin haihawm khawmkik pah in. A ciahkhit ciangh cikei in. Tuapen pilvai mahmah hi.

9. Zinn te in dawn lel incia ci in sabuai tung peuhah na piaknoppen koihziau ngeikei in. Zinn pa a manlah laitak a hihphial lezong ‘hiah na niangtui ding na koihsak ingh ei, na dawnsak o’ ci hamtang in. Kihilhseloh aa na kipiak pen ui te piakdan hi aa haivailua mahmah hi.

10. Moh tawh na piakkop leh a hihtheihlaiteng kuangsungah a moh tuamkoih sak in.

11. Na piaklai tak, na hopih laitak maitai hiuhiau se in.

12. Na zinn te tawmvei sungbek hong om a hihmanin khasia sak kei in. Naupangno te kampau hang nagawn in zinn te khasia thei a hihmanin na tate a pilsa in koihtawntung in.

Zinndo dingpen Pasian deih nasepkhat a hihi. Numei te hizawdeuh se a hihmanin inn nupi te nugak te in theihhuai mahmah hi. A dangtampi omlak pan in Niangtui piakzia bek a ngen i hihi.

Zinn do a siamte tungah Pasian in thupha hongpia dinghi. Lungdam! Siamsin Library