Trump acin khitnung Hate Crimes 200 piangta hi ci

Trump acin khitnung Hate Crimes 200 piangta hi ci

Nov. 14, 2016: Trump President dingin Nov. 9 ni-in a cin’ ni a kipanin America gam sung mun tuamtuam ah minam kilang bawlna leh kihuatna hangin thukham palsat a, minam dangte tunga gamtatna “hate crimes” kici 200 val piang ta hi ci-in Southern Poverty Law Centre (SPLC) president Richard Cohen in Montgomery, Alabama ah USA Today newste kiangah gen hi.

SPLC in US sunga hate crimes piang tuamtuam ciamteh uh a, tu dong hekna (complains) 200 kingah ta hi ci hi. Ahih hangin Republicans spokesman in hih thu pen a hekte kuamah in ahihna uh a kician in kipulak lo uh a, tua bang hekna leh minsiatna dinga thu phuah tawm pen a kan ding dan zong om thei lo a, tua banga gamtatna om lo hi ci hi.

Trump deih loh ten lungphona khuapi tuamtuamte ah nei zom zel uh a, “Kei President Hilo Hi” (Not My President) ci-in a awng pawl leh laimal in gelh in a tawi pawl ten lungphona nei zom zel lai uh a, Electoral College kiteelna December 19 ciangin neih kik ding deihna in, min lakna (signature campaign) nei ngeingai uh a, suai million thum bang ngah ta hi ung ci-in kigen uh hi.

Hih bangin lungphona nei ten thangah kisa in a otot lai un House Speaker Paul Ryan in hih ki-ukna thak (new administration) nuai-ah kuamah a lunghimawhna ding leh patauhna ding uh om vet lo hi. America pen minam tuamtuam leh ngaihsutna tuamtuam leh ngeina tuamtuam neite teen khopna, kihuai khopna (pluralistic, inclusive society) gam hi a, tua bang mah hi den ding hi ci ci hi. Trump cin’ khit nungin hate crimes, racist graffiti leh sanginnte ah ah minam tawm/neute (minorities) thatang hat thu tawh kilausak/kiliamsak (bully) hi cih ngawhna leh news tuamtuamte genna thu a dawnna ah Paul Ryan in, “Tua banga gamta a om leh Republicans kicite gamtatna leh Republicanste gamtatna zia leh ngeina hilo hi.

Ko pen minam kideidanna leh sila a kineihna (slavery system) a beisakpa Abraham Lincoln’ partyte ka hi uh a, Trump in zong kei ngaihsutna bangmah nei ding hi,” ci-in gen a, Trump in phalna lai nei lo a, US gam-a teng (undocumented residents) million 11te President thak Trump in a gam uh-ah puak kik/sawk kik sawm hiam cih dotna a dawnna ah, “Ko tua bangin thagum zangin kuamah ka puak kik (deportation force) sawm kei uh hi,” ci-in dawng hi. -The Hindu/ Thang Khan Lian