Myanmar galvanleng khat ahawl akisin laitak kia, ahawlpa si

Myanmar galvanleng khat ahawl akisin laitak kia, ahawlpa si

Myanmar galvanleng “Air Force” khat tuni Tuesday zingsanglam 10:15am hunpawl in Bago Region, Taungoo ah kia cih kiza hi. Tua Myanmar Air Force sungah atuangpen ahawlpa Pilot bek hiding kici a, ahawl akisin laitak in atuahsia kici hi.

Taungoo vanlengtual panin tai 3 bang agamlakna ah vandawn asanna 500 Meter asangin alenlaitak in akia kici hi.

Myanmar Defence te pulakkhiatna ah aset siatna om ahih manin, vanleng pen akia hi ci’n genkhia uhhi.

Vanleng akiat ciangin Rescue Team te’n delhpah uh a, vanleng asiacip zong mukhia uhhi. Vanleng hawlpa Pilot pen aset asiat ciangin Parachute tawh lengkhia himahleh liamna honkhat ngahhi. Tua aliamma tengtawh Taungoo khuasung aom Military Hospital ah kipuak a, ahi zongin asawtlo in si cihi.

Tua galvanleng pen Sen te bawlkhiat Chinese-made Chengdu F-7M hiding inzong ki ummawh hi. Vanleng kiatna ahangpen athu hoihtak aki kanciansan laitak ahihi.

Myanmar gamsung ah galkap vanleng “Military Plane” tepen tuahsiathei zelzel hi. Nungkum June 2017 sung inzong galkap leh a innkuanpih te apua galkap vanlengkhat kia in, mi 122 takin sihlawh uhhi. Andaman Sea kici tuipi sungah akiasuk hi a, vanleng sungah atuangkha Military Personnel leh a innkuanpih khempeuh avek in asikhin uh ahihi.

More: Kachin khuasung mite athatlum Myanmar galkap te kum 10 thongkiading thukipia

Tuazawh asawtlo September khasung in Rakhine State sungah galkap vanlengkhat kialeuleu hi. Tua galkap vanleng pen Yugoslav-made kici a, Training Jet khat ahihi. Asungah atuang vanlenghawl akisin Pilot 2 te’n sihlawh uhhi. Sawltak #zomidaily