Thuthak tomkim ~ The Tedim Post (27 July)

News In Brief: Thuthak tomkim ~ The Tedim Post (27 July)

Irrawaddy guntui khang ahihman in Myanmar gam Upper area lamah mimal 25,000 val inn leh lo nusia in tui khanlohna mun zuan uh hi cih kumpi lam thunei ten gen uh hi. Myanmar gam sungah tuikhang hanga inn leh lo nusia te omna ding camp mun 78 om ci hi.

July 24, 2020 ni-in Myanmar gam sungah Township 5 in nisat penpen ni hi cih ciaptehna thak ngah hi, ci-in Khuahun lam tawh kisai kumpi thunei ten tangko khia uh hi. Tua township 5 teng pen Sagaing, Lapuatta, Koko Chun, Bawlakhe leh Moulmein te ahi uh hi.

2020 kiteelpi ah mee(vote) khia thei ding disable mimal 80,000 val om hi, ci-in U Myat Thu Win in gen hi. 2015 kiteelpi lai in disable mimal 30,000 val in mee(vote) pia thei uh ci hi.

Myanmar gam sungah Natgual(touhhkuii) natna hangin January kha pan July 4, 2020 dong a si mimal 27 leh natna ngah mimal 3,446 om ci hi.

July 23, 2020 ni-in NLD party in 2020 kiteelpi ah adem ding min hong suahkhiat zawh uh teh Mon State, Muhdone Township leh Bago Division, Paungti Township te ah mee kuanglui dingte deihlo uh ahihman in lungkimlohna lahna in suaikaihna nei uh ci hi.

State Counsellor Daw Aung San Su Kyi’ mi muan mahmah khat ahi U Soe Win in July 25, 2020 ni-in thakhat thu in hong nusia vat hi. U Soe Win pen tulaitak Aung San Su Kyi ading in security vaipuak a lak laitak ahi hi.

Philippines gamah July 25, 2020 ni nikhat sungin COVID-19 natna ngah thak mimal 2,019 leh a si mimal 20 om hi, ci-in Philippines gam cidamna lam kipawlna ten July 26, 2020 ni-in tangko khia uh hi. Tulaitak Philippines gamah COVID-19 natna ngah mimal 78,412 leh a si mimal 1,897 om ta hi.

Malaysia Prime Minister lui Najib Razak in a kumpi nasep hun kum 7 sungin Siah(Tax) apiak loh US Dollar Million 400 val apiak kik na dingin thukhen zumin thupia ci hi.

Covid-19 natna nei/neilo second 30 sungin aki sit thei ding setvan khat Israel company in abawl laitak ci hi. Natna kisit 80% diktakin sit thei a, amin ding Coronavirus Brea-thalyser ci uh hi.

Russia gam nisuahna lam, Khabarovsk Khuapi ah Kumpipa Putin deihlohna lungphona mi 10000 val in nei uh hi. Kumpi Putin mipi te deih mahmah ahi Administrator Sergei Ivanovich Furgal mithahna tawh mawhmat in thong akhum na hangin lungphona abawl uh ci hi.

Abeisa July 7, 2020 ni-in Covid-19 natna ngah Brazil Kumpipa Jair Bolsonaro in natna 4 vei akisitna ah natna om nawnlo hi, ci-in ama Twitter laimai tungah zaksakna nei hi. Brazil gam pen USA gam khitteh leitung bupah Covid-19 natna ngah atam pen 2 na ahi hi.

Germany gam, Wesel Khuapi inn tung khat ah vanleng neu khat kia ahihman in mi 3 in sihlawh uh a, mi 1 liamna ngah ci hi. Hih vanleng neu in mutpuak lengthei(Ballon)honkhat tawh kiphukha hi, ci-in akim a om ten gen uh hi.

July 26, 2020 ni Leitung bupah Covid-19 natna ngah Tein 160 val(16,100,905), asi Tein 6 val (645,482) leh adam kik Tein 90 val (9,289,876) phata hi.

More: Tedim gam, Thangkai kual, Tuivial Update

One Championship in July 31 ni pan October kha bei dong mipi a en omlo in MMA kitupna pawi te bawl ding a, TV channel pawl khat panin ettheih dingin ka gel ding uh hi, ci-in CEO Chatri Sityodtong in gen hi. Covid-19 natna hangin One Champhionship in abeisa March kha pan kitupna pawite akhawl bawl phot ahi hi. Source : 7day news, , Eleven Media, Myanmar Times, VOA, Irrawaddy