Myanmar Academy a ngahngei Actor khat vankham tawh kiman

Myanmar Academy a ngahngei Actor khat vankham tawh kiman

Myanmar Academy Award pahtawina a ngahngei khinsa Actor khat guihtheih khamtheih vankham zatui tawh Mandalay ah kiman cih DVB pan kizasawn hi. Tua Actor pa ii aminpen Naung Naung akici khat hi a, aminpi taktakpen Zaw Myo Naung ahihi.

Tuni (Feb 18) ni in Mandalay aom guihtheih khamtheih azongkhia palik te’n zingsanglam 10:30am hunpawl in amat uh ahihi. Tulaitak Mandalay, No. 2 Police Station ah akikep laitak kici hi.

Naung Naung pen ama omna innsung ah palik te’n vankham azon uhciangin lupna khekhuanlam aom siksingkuang a eng sunkhatpan vankham mukhia uhhi. Vankham amatkhiat uhpen ICE 0.8 gram, Pink Amphetamine 140 Tablets, Heroin 20 gram cihteng mukhia uh ci’n Mandalay Police te’n genkhia uhhi.

Actor Naung Naung pen Mandalay aom Film Production aneikhat ahi U Zaw Myit kici ii atapa hi a, Film khat akizaih masakpenpen tawh Academy angahkhat ahihi.

Naung Naung ii Academy ngahkhiatna Film minpen “Htar Waya A Linn Tan Myar” hi a, 2011 kum in Best Actor Academy angahkhia ahihi.

More: Mandalay ah palik te’n Pistol, thautang honkhat, vankham honkhat mankhia

Mandalay khuasung ah zanni inzong Police te’n inn 3 khawng buluh uh a, guihtheih khamtheih leh Pistol, thautang cihte tampi mankhia uh cihzong kiza hi. ZD Sawltak #zomidaily