Thuthak tomkim ~ The Tedim Post (26 Aug)

News In Brief: Thuthak tomkim ~ The Tedim Post (26 Aug)

Myanmar gam sungah Covid-19 natna ngah hong khang kikna hangin Chin State bup township lutna khempeuh ah cidamna lam kisitna August 26, 2020 ni akipan nei kik ding hi, ci-in Chin State Municipal Minister U Soe Htet in gen hi.

2020 Kiteel pi ah Chin State a mee kuang lui dingte lak pan thukhun tawh aki tuaklo candidate omlo hi, ci-in State Election Commission in gen hi. Tu tung kiteel pi ah Party 12 pan State Hluttaw palai mun dem ding mimal 98, Amyotha Hluttaw palai mun ading mimal 63 leh Pyithuh Hluttaw palai mun ading mimal 49, vekpi gawm mimal 210 dem ding uh ci hi.

Karean State, Hpa-an khuapi ah August 25, 2020 ciang tuikhanna hangin haksatna atuak mimal 2,100 val om hi, ci-in kumpi lam thunei ahi U Zay Htet Aung in gen hi. Tuikhanna hangin haksatna a tuak mipi te pen camp mun 7 ah koih uh ci hi.

Myanmar Galkapte in May 9, 2020 pan August 31, 2020 dong AA kipawlna loh siah mualmi thautawite tawh kido/kapna pen kakhawl phot ding uh hi, ci-in a tangkona aneih uh pen September 30, 2020 dongah khanto uh hi.

Rakhine State, Sittwe Township simloh Kyauk Phyu, Aan, Taung goh leh Than Dwei Township 4 te ah zong Stay at Home thukhun zuih dingin thunei ten tangko uh hi. Tulaitak Rakhine State ah Covid-19 natna ngah mimal 100 val ki behlap hi.

2020 kiteelpi ah mee kuanglui ding mimal pen party tuamtuam pan leh mimal ngiat a alui ding mimal gawm pen 6,500 val pha hi, ci-in thu nei ten gen uh hi. 2015 kiteelpi lai in mimal 6,038 in mee kuanglui uh ahi hi.

COVID-19 natna om sung Cidamna lam kipawlna in mipi 30 tungsiah omkhawm theilo ding cih thukhun pen Daw Aung San Su Kyi in palsat hi, ci-in U Nyi Nyi in thukhenzum ah thu abawlsawm pen Palik thunei ten hih ko hih theih thu hilo ahih manin ko thubawl theilo ding hi ung, ci-in gen uh hi.

Turkey gamah tuikhanna hangin mimal 7 in sihlawh in mi 10000 val bangin inn leh lo nusia kihem uh ci hi.

More: Tuni Zogam ~ Pu Go Sawm Khup

North Korea Kumpipa Kim Jong-Un sibup ahih manin gam vai tawh kisai vai khempeuh a nau nu Kim Yo-jong in vaipuak la hi, ci-in Korea media ten gen uh hi. Source : 7day news, , RFA, Eleven Media, The Myanmar Times, KhonumThung. Thukai khawm : Lia Lu Lun, Lia Shang Shang.