Thuthak tomkim ~ The Tedim Post (14 July)

News In Brief: Thuthak tomkim ~ The Tedim Post (14 July)

Chin State, Mindat Khuapi ah Mindat College lam nading 2020-2021 Budget kumah MMK Million 4863.912(4 Billion val) ngah hi hang, ci-in Mindat Pyithuh Hluttaw palai Pu Nay Lin Aung in ama facebook tungah gen hi.

Guah tamluatna hangin Ayeyarwady gun khang gawp ahih manin Kachin State, Myitkyina Township leh Bamaw Township a om Khua pawl khat pan mi 700 bang inn leh lo nusia in kihem uh hi.

Social Media tungah July 18 ni-in Tan 10 laivuanna kithei ding cih pen thuman lo hi, ci-in Deputy Director General Dr Tin Maung Win in gen hi. 2019-2020 laisin kum Myanmar gambup Tan 10 laivuan Tein 9 val pha ci hi.

Kayar State, Loikaw Township ah Africa Vokpul natna hangin vok 180 val bang si ci hi.

Zusa honsih na muh uh leh Health Department Zumah amanlang thei pen in thu ih puak pah dingin MOHS in tangko hi. Zusa pan mihing ah akilawh thei natna nam khat kimu khia ci hi.

July 2 ni a Hpakan Township, Waika Khua suangmanpha khuk kicipna kisai vaisai mi 13 thu kibawl in 3 kiman khin ta ci hi.

2020 kiteelpi ading mee(vote) pia thei ding mimal sazian pen July 18, 2020 ni-in tangko khiatna nei ding hi, cih UEC tung pan kiza hi.

Myanmar gamah sang sia/siamah kisapna tam penpen khat ahi Kayin state ah Township 3 adingin tualsuak minam lai hilh sang sia/siamah 850 nasep pia uh hi, ci-in Kayin Minister Saw Bo Bo Wai Maung in gen hi.

Irrawaddy Division, Wakhema khua ah NLD party nasem Township Committee pan mimal 21 te bangmah dotna/kanna omlo in NLD phungpi pan khawl sakna lai pia ci hi.

Taiwan gamah kumpipa mi muan khat kumpi nasepte a encik dingin panmun piak sawm vai Taiwan Hluttaw ah kikupna a neih uh leh ngaihsut kibat lohna hangin kitot, kisel, kilai na piang ci hi.

COVID-19 natna khatvei hong nawk kikna hangin Sri Lanka gamah August 5, 2020 ni-in akibawl ding kiteelna bawlloh dingin tangko uh hi.

More: Sialtaang Tuinak leh Saizang ~ Tedim Municipal

July 14, 2020 ni Leitung bupah Covid-19 natna ngah Tein 130 val(13,132,491), asi Tein 5 leh lang val (573,869) leh adam kik Tein 70 val (7,293,385) phata hi. Source : 7day news, Eleven Media, Myanmar Times, The Voice Journal, DVB News.