GZA muhdan (Perspective) a tuamtuam ~ Pau Khat Suan

GZA muhdan (Perspective) a tuamtuam ~ Pau Khat Suan

Zomi u le nau,
A masa in na khat peuhpeuh/ thu khatpeuhpeuh i muhdan aki lamdan’ man in kitelkhialhna om thei zel hi. Ataktak in muhdan kibanglo hibek a, gawmkhawm siam in, khinkhai siam hile hang tua akibanglo muhna tuamtuam, ngaihsutna tuamtuamte mah in pilna leh khantohna lianpi i minam sung ah ong piangsak thei ding hi ci-in ka um hi.

Hih lai sung a ka at khempeuh GZA tawh kisai kei mimal muhna ( personal perspective ) ahi hi. Aman/ adik pawl omding a, ka khialhkhakna zong om kha ding hi. Muhdan akibanglo a om leh ong theisiam a, “kei’ muhdan hibanghi”… ci-a ngaihsut khop/kaak theih ding a iki gen ding, i ngaihsut khop ding leh i gawm siam ding ka lunggulhna kong gen masa nuam hi.

GZA tawh kisai thu patna

A beisa 2011 April kha in makaipi teng Singapore ah a khatveina thu kikupna nei uh hi. Tua thu kikupna pan in mailam nasepna ding Department 15 leh tua departmentte ah panmun len ding mimal ong sehkhia uh hi. Dec 14-17 sung department khempeuh pan in a hithei khempeuh paikhawm in, Kawlpi ah a khatveina GZA Khawmpi kinei hi. Hih thu khempeuh i theih ciatsa ahi hi. GZA General Secretary Dr. Chin Do Kham in zong, meeting thu pulakna khatvei ong hawm khia khin zo hi.

Ahih hang in kei mahmah a kipan akua mapeuh in GZA kipawlna tawh kisai kalsuan zia, sep le bawl zia, mapan zia leh vaihawm/geel zia tuamtuamte siangtak in i tel kei hi. Tua ahih man in kei mimal muhna ( personal perspective ) leh ka sandan tawm ong kuppih nuam kahi a, a lunglutte in zong no muhna nong kuppih ding uh ka lunggulh mahmah hi.

MIPI leh MAKAI PERSPECTIVE KIBANG LO

I. Zogam Mipi leh GZA ka muhdan

Zomite Kawlgam leh India gamsung mun tuamtuam bek hilo in leitung mun khempeuh, gam tampi ( tu laitak Gam 35; Dr, J.M Paupu ) iki thehthang khin hi. I gam le lei, i minam tawh ki gamla in, i khua i tui ki ngai mahmah ciat hi.Banghang hiam cih leh tu laitak a gamdang a tung Zomite pen khang masa ( First generation imigrant ) hipan ihih man in i lunglen ciang, i khuangaih ciang, i nuam ciang, i dah ciang….. na khempeuh/ hun khempeuh ah i gam, i khua itui, i u le nau kiphawk ciat hi. Haksat gentheihna leh dahna kahnate bek lunglen’na hilo in, nuamna, gualzawh lawhcin’na nangawn lunglen’na ong suak hi. Namdang Gamdang mite’ nopsak dan, khantohdan, pilna siamna leh neih le lam imuh ciangi gam i lei ah hici bang khantohna, zopsakna, khuasak ziate leh pilsinna, neih le lam …cihte bangci bang in ong tung thei ding hiam? bangci bang in i gam i khangto sak thei ding hiam? ei’n bangci bang leh koi mun ah mapang thei ding cih ki ngaihsun, ki lunggulh ciat ahi hi.

Tuamah bang in Kawlgam, India leh Zogam sung a a omlaite in zong, mite bang in nuntak khuasak leh pilsinna, hauhna, cidamna cihte khempeuh ah a sang zaw, a nuamzaw, a khangto zaw ding nakpitak i lunggulh ciat hi.

Tuabang hun laitak in, Biakna sung a i-muan, i-suan i siapite’ makaihna tawh GZA ci in, minam sung a huamkim zo ding kipawlna, mapanna lianpi khat ong din’ ciang Zogam leh leitung munkhempeuh a a-om Zomi khempeuh ki nuam mahmah a, a tung a i-gensa i lunggulh khempeuh ong masuatpih ding in ki lam-en ciat hi. Tuabang laitak in, GZA Siapite ii a khatveina thu kikupna ( Singapore ) pan in GZA ii ngimna bulpi “A Bucing Khantohna” cih i-zak sawnsawn ciang, GZA in bangci bang in ong mapii in, ong mualsuah pih ding hiam cih pen GZA tungpan a i lam-et lianpen leh i-theihnop, i-zaknop pen ahi hi.

GZA in panmun tuamtuam ah eimi sung pan mi muanhuai tampi mah kaikhawm in, sep leh bawl ding geel ding, semding cih bang in,….”ding, ding,ding……” bek hilo in, vaihawm pah ding, kipan pah ding, sempah – bawlpah ding…..“pah ding….pah ding“ …. cih a lam-en ihi hi.

Ih lam-et mah bang in GZA in,

1) Eimi sung pan apil, asiam, ahau, gam le nam a it tampi mah kaikhawm in, panmun tuamtuam ah guang in nasep ding ong kipan ahi hi.

2) Kawlpi ah a khatveina GZA Khawmpi bawl in, ong paikhawm thei khempeuh in gam le nam a’ding deihsakna, lunggulhna leh sepnopna takpi tawh ngaihsutna ki sungkhawm, kikum khawm, ki geelkhawm takpi mah hi. Tua ngaihsutna leh geelnate Khawmpi thu ciamteh lai-at te’n limtak in ciamteh uh hi.

3) Khawmpi pai khempeuh zong tha ngah mahmah sa in innlam ciat ki zuankik a, inntek mipi in zong nakpitak tha kingah hi.

4) Tua Khawmpi sung a thu le la ki geel khempeuh khat khit khat kisem to pah zatzat ding in i lunggulh ciat a, tuamah bang in i lam-en ciat hi.

Ahi zong in, kei’ mimal muhna ah, tuni ciangciang, sep le bawl ding geelsa khempeuh pen Department makai te’n Siapite’ sawlna/thupiakna a ngak hiam, ahih kei leh ahang dang bang hiding hiam kithei lo a, sepkhiatna kimu nailo ahi hi. Tuabang a Department makaite’n ong patloh hang Siapi te’ ngaihsutna ah Department tuamtuam te’n amau tawh kisai munte ong panpah ding a lam-en uh a, sawlna piaksawn kikkik ding kisam sa nawnlo uh ahi tam ci-in zong ka ngaihsun zel hi. A min zo taktaklo thu ( kizopna dan ) khat omlai leh kilawm kasa hi.

Department makai te’n ong patloh ciang panmun len a kiseh ahih hang, a neulam a pangkha te’n lah kipat lunglung dan omthei phalo a, a awk keei na zong om hileh kilawm kasa a, zong hi takpi ding in ka um hi. Tuabang kawmkal ah makai leh panmun len pawlkhat leuleu amau’ panmun ah semlo in, amau tawh kisai masa lo mun pawlkhat ah ana kizen mahmah bang lah om kawikawi zel hi.

Hihbang teng hang in Mipi’ muhna leh lam-etna zah in vaihawmna, sep le bawlna cihte manlang zatzat phalo hi leh kilawm kasa hi.

II. Makai Siapite leh GZA ka muhdan

A khatveina Siapite’ thu kikupna Singapore ah a neihkhit uh ciang, a masa pen a Makaipi Rev Dr. Simon Pau Khan En in ong gen thu i-etkik ciang…

1) Hih kipawlna a min pen Global Zomi Alliance ( a tom in GZA ) kici hi.

2) GZA pen structural kipawlna hilo a, Movement ahi hi. ( GZA is not a structural organization. It is a movement ) ci-in ong tangko hi.

3) GZA ii ngimna in ” Zomite a bucing khantohna” hi. Tua a bucing khantohna i tun theih nading in tu-a a makai Siapi teng in ” Prophetic role” ong la ding ahi hi. Asem abawl taktak ding ahih leh mipi khempeuh ahi hi.

4) Kipumkhatna icih in nakhempeuh ah kibang cihna hilo hi. ( Unity is not uniformity ).

Hih thu teng bang i-et tak ciang I siapite’ dinmun, amau GZA a ngaihsutna uh leh amau le amau a kikoihna mun pen ei mipite’n GZA leh makai Siapite i koihna mun tawh kibang hetlo hi leh kilawm kasa hi.

Banghang hiam cih leh:

1) Kipawlna “ Alliance” ci in amin ong phuak uh hi. Alliance cih pen a omsa kipawlna tuamtuamte ngimna tupna khat masuan in semkhawm bawlkhawm ding a kipawlna, ma pankhopna hi bek a, a niampen/ grassroot level pan a kipawlna, kigawm khopna hilo hi.

2, 3 & 4 ) Tua ahih man mah in, structural organization hilo a, movement bek ahi hi. “A bucing khantohna” cih ngimna tupna lam zuan a a omsa kipawlna khempeuh ma patna, madawkna tawh mipi in pangkhawm ding cih ngaihsutna, geelna sung ah… sep le bawl ding khempeuh ah Siapite in Prophet/Kamsang dinmun la in…. ahih kei leh Pasian’ deihna tawh kituak maw kituaklo cih limtak sittel in lam onglak ding…cihna ong suak hi. Amau mahmah ong makai pah keei ding cihna hilo hi.

Thu khupna

Tua ahih man in GZA leh GZA nasepna tawh kisai Siapite’ perspective leh ei mipi’ perspective kibanglo hi leh kilawm kasa hi.

Ka upmawh, a tung a kagen bang aman/adik ahih leh GZA min lian tawh nasepna amal mal a lawh ding cihbang om thei taktak lo ding ong suak hi. Ahih hang, hici bang a Pasian’ mizat Siapite’ makaihna tawh Minam leh Gam a’ding, Pasian’ a’ding ngimna kibang kikhat a ki pumkhat, ki thutuak diamdiam a i hihtheihna mun ciat pan ma i-pan’khop theih ding pen i minam ading in a manpha mahmah, a thupi mahmah leh a kisam mahmah ahi hi. Hihmun ah khut kilen a ma i pan’khop theih nak leh i minam, i gam leh Pasian’ a’ding a i sepkhopna ah i-ma zang in, i-dau pai ding hi ci-in nakpi tak ka lam-en hi.

Kei mimal muhna ahi hi. Kuamah tawh kikum kahi kei hi. Khat le khat i muhdan, i sandan kibanglo kha ding hi. Ei mipi nautangte bek hilo in, Siapite’ sung nangawn ah a ngaihsutna uh, GZA a koihna mun uh khat le khat kibang khinlo mai thei lai kha ding in ka um hi.

Tua ahihman in nang ngaihsutna tawh aki bat kei leh ong ngaisiam a thudam tawh na ngaihsutna nong theihsak kik ding in, hih lai asim mimal khatciat tung ah kong thum hi.

Note tawh kibang in Zomi leh Zogam itna sung ah…..

Pau Khat Suan
23 Mar 2012