Thuthak tomkim ~ The Tedim Post (07 Aug)

News In Brief: Thuthak tomkim ~ The Tedim Post (07 Aug)

August 5, 2020 ni Covid-19 natna ngah Case 357 pen Quarantine akikoihna Cikha Khuapi pan Tedim Khuapi, Zatopi ah nitak lam nai 3:45 hunin hong tungta hi. Amah pen India gam, Bangalore Khuapi pan hong ciah Tedim Khuapi, Myoma veng a teeng Kum 19 apha pasal 1 ahi hi.

Tedim Township ah High School leh Sub-High School akigawm sang 25 om lak pan sang 24 kihong khinta hi, ci-in Tedim Township Education Officer Sia Pau in gen hi.

August 4, 2020 ciang mee-sazian kisuanna ah a en mipi pen mee khia thei mimal lak pan 17% bang phakhinta a, mee-sazian manlohna hangin puahphat ding a ngen pen mimal 400,000 val pha khinta hi, ci-in kumpi thunei U Myint Naing in gen hi.

2020 Kum sungin Myanmar gam sungah Kum 10 cingkhin leh Kum 18 cingkhin Tein 3 leh lang te ading NRC Card (Matpongtin) kibawl sak khin hi, ci-in Union Immagration Minister U Thein Swe in gen hi.

July 27, 2020 ciang Myanmar gam sungah H1N1 natna nei mi 8 om hi, ci-in MOHS te tungtawn in kithei khia hi. Mimal 781 akisit na lakah mi 8 tungah a kimu ahi hi.

Mee-sazian suang hun pen amasa in July 25 pan August 7, 2020 dong ding hi, ci-in UEC in tangkona nei himah tase leh mee-sazian ah aki khial tamluatna hangin ni 7 ki behlapto in August 14, 2020 dong khanto ding cih kiza hi.

21 Century Panlong Khawmpi ah mualmi thautawi NCA suaikailo kipawlna 8 lakpan AA te simloh kipawlna khatteh makai 2 ta khawmpi kah dingin sapna kinei ding hi, ci-in tavuan neiten genna nei uh hi. NCA thukimna suaikailo mualmi kipawlnate in KIA, UWSA, NDAA, SSPP, KNPP, TNLA, MNDAA leh AA te ahi uh hi.

Lebanon gam, Beirut khuapi a piang puahkhapna hangin dahpihna lahna in France gam, Paris khuapi a om Eiffel Tower pi pen August 5, 2020 nitak lampan meimitna tawh lakkhia uh ci hi.

COVID-19 hanga sihna athuakte ading dahpihna lahna in Brazil gam, Sao Paulo khuapi ah mawtaw leh hawlin tai 1 val paina August 5, 2020 ni-in nei uh hi, cih thu kiza hi. Hih hun sungah mawtaw bebek 250 val bang kihel ci hi.

Lebanon gam, Beirut Khuapi a phuahkhapna hangin Lebanon kumpi tungah UK in Sterlin Pound Million 5 ka huh ding uh hi, ci-in UK Foreign Minister Dominic Raab in gen hi. Tuni ciang misi 135 valin aliam 4000 val khinta hi.

South Korea gamah ni 44 sung guahciinna hangin mi 16 val bang si a, mi 11 mang in mipi 1600 val bang inn leh nusia in kihem uh hi.

More: Democracy thupha leh Tedim khantohna ~ Rev. Nang Lyan Kap

August 6, 2020 ni Leitung bupah Covid-19 natna ngah Tein 180 val(18,851,834), asi Tein 7 val (708,540) leh adam kik Tein 100 val (11,394,076) phata hi. Source : 7day news, , Eleven Media, Myanmar Times, DVB, Irrawaddy, IPRD Tedim.