Lebanon thupiang tawh kisai ka theihkhak sunsun

Lebanon thupiang tawh kisai ka theihkhak sunsun

Lebanon khuapi Beirut ah August ni 4 ni nitak lam ginneih loh laitak in apuakkham khat om a mi 73 si in 3,700 liam hi. New York Times in asi mi 100 val in aliam mi 4000 val hi ci hi.

Hih thu tawh kisai in Lebanon te’ Prime Minister ahi Hassan Diab in agenna ah: “Ton 2,750 bang apha ekleiza namkhat ahi Ammonium Nitrate te kum 6 val akikoihna godown apuakkham hi” ci hi.

US kumpi Donald Trum in agenna ah:

“Ka galkap mang te’n bel bomb namkhat kitam hi’n ummawh uh. Kisuamna namkhat hileh kilawm” ci hi. “Athuakkha khempeuh leh a innkuanpihta ding in thu ngetsak ung. Huh theihna aom leh ahuh ding in kigingsa in om ung” cih beh lai hi.

Lebanon te’ gambitna lam (General security service) ah alianpen ahi Abbas Ibrahim in bel: “Matthuak van kitamthei pawlkhat kikoihna inn apuakkham hi” ci hi.

2005 kum in hih Beirut khuapi laizang mah ah Lebanon te’ Prime Minister ahi Rafik al-Hariri mawtaw bomb tawh ki suamlum ngei hi. Tua thu The Hague leitung thukhen zum ah akisit lai in thu akidong bomb lam asiam mahmah Chris Hunter in agenna ah:

“A meikhu mel hoihtak ka etteh thauvui kihel in um keng. Bomb kitam hikei limlim” ci hi. Tuaban ah “Van tuamtuam koihkhawm leng akitam theimah hi e. Oxygen bung bek zong salua leh apuakkham thei hiven” ci hi.

August ni 4 ni mah in New York Times in agenna ah:

Hih apuakkham vante pen 2013 kum a Russia te’ tembaw khat in apuak hi ci hi. A tembaw nangawn uh nusia uh ci hi. Tua ban ah apuakkham pen 2 hi ci uh hi. Amasapen ginngaih lua khollo a anihna pen ngaih mahmah ci hi. Beirut pan tai 100 val agamlatna Cyprus nangawn pan kiza hi ci hi. Zinling 3.3 magnitude tawh kikim hi ci uh hi.

More: Lebanon aom US Embassy maiah Jerusalem vai hangin lungphona kinei

Hih puakkhapna hang in akim akiang a kikhol buhtang teng zong siamang khin a asialo sunsunte zong nektheih ding hinawnlo ci hi. Ka zakkhak sunsun hi ei. Lungdam, Mung Laan Thang (Tonzang, Zogam)