Theihloh kal kigammang thei ~ Lian Tuang
Sanggam Laituite khat Zangkong khuapi sung a vak leh gammang in ciah kik thei nawnlo hi. A cihna ding thei nawnlo ahih manin a zinte phone tawh hopih uh a, ong ciah kik thei kei ing,ci hi. A zinnu in tua leh koi ah om lian laitak na hia a cih ciangin sanggam pa in ken zong tua lian hi veh aw ka theih noh, tu laitak ka omna pen ken zong a thei nuam peuhmah hi ing ci zaw bilbel hi.
Hih thupiang pen a taktak in ciamnuih tawh a kibat hangin tu laitak ei Zomite dinmun etkakna dingin kilawm kituak mahmah ding tawh kibang ka sa hi. Leitung vai Gam vai minam vai ah tu laitak I dinmun pen ei le ei siam I kisa mahmah phial zongin a gammang a mialzawt dekdek dinmun tungta I hih lam tawmno khat kigen nuam hang.
1) Ahun zui in mi tawh kibangin buaipih tuamtuam kinei a, ahi zongin ei lam ciangin tuamkai pian den tawh kibang kasa hi. Idol cih khat tawh kibuai ngeingai a, en zong I buai pih mahmah hi. Mi dangte in lasakna minthanna pahtawina in zang uhi.Myanmar Idol platform zangin Pasian pahtawi uhi. En I hih leh laimal peuh siksan in kitot kitselna kiselphona in I zang lel hi. A thu kibang ahih hangin mi buaizia ei buaizia kilamdang tawh kibang ka sa hi.
2) Kumpi in khantohna le na khat peuhpeuh hoihtak sep theihna ding Data lakna banah Myanma gam sunga Sen le Vaite mi om zah a pholhkhiat nop manin 2014 kum census nasia takin bawl hi. Eimite in zong ngaihsutna ngimna hoih nam khat mah tawh sum le pai, tha le ngal tampi bei in Census vai ah thasanna kinei hi. Ahi zongin ei sung teng mah ah i ut le i ngim ahi hetlo kitelkhialhna, kinopmawhna le sisan naisan kisuahna ciang nangawn i tun lawh dektak kha zezen hi. Khat le khat ki it, kingai lua, gam le minam vei luatna hang ahih manin sia hi cih theih om sam lo hi.
Ahi zongin “Thu hoih mahmah dinga kisem ahih hangin no kiang ong tun ciangin a khasiathuai a lipkhaphuai a lunglenhuai nasep suak mawh hi” ci in maikhing ningniang sa in census makai khat in ong gen pen na ka sa mahmah hi. Midangte in Idol cih pen minthanna kipahtawina Pasian tung lungdam kohna, lungdam kipakna in a zat laitakin eimite in a kammal siksanin kitot kiselna in i neih lel tawh kibang ka sa hi
3) Minam vai gam vai ah kipawlna tuamtuam le party tuamtuam a om ciangin khat le khat tha kipiak ding pen ahi ding mah ahi hi. Ahi zongin tua kipawlnate in minam le gam a kem a zun a huai ding hi a, minam in tua kipawlnate a pua lenlan ding hi zenzen lo hi. Minam pen a lutang le pumpi a, kipawlna pen khut le khete ahi hi. Tua gel a kizom hamtang ding ahi hi. Ahi zongin lu pumpi le khutlekhete i bulh khialh loh ding thupi mahmah ding hi. Tua bangin I bulhkhialh leh mi bang lo I suak dinga mi dangte ciamnuihna kisuak ding hi. Khat veivei lu pumpi khut le khe bulh khial thei zel lehang kilawm ka sa hi.
4) Biakna lam le leitung lam ah pilna neite kiangah thu dong nuam loin thu I hilh nuam zaw pian sese hi. Amaute thupi sa loin sang kahkah in hai tektek I ci nuam zaw lai thei hi. Amaute thu genna le laigelhte khawng hoih tak simcian lo pi in puak bakbak in I dawng laklak nuam mahmah hi. Hih bangin a maute a pau ngam nawn lo dingin I bawl ziauziau hi. Amaute gam dai takin om dide uh a, a pau hang teng mah ciakciak paupau in atawpna ah a paupau teng a pil tawh kibang kik zezen hi. Hih zong tawm bek kiphuahhuai lo diam a ci nuam i hi hi.
5) Kumpi nasem za nei ulian I neih sunsunte( pension khin te zong ) it bawl zahtak bawl thudotbawl ding sangin hawmthawh, nopneh, zahpih bawlna lam ah ki thutuak zaw lehang hang kilawm kasa hi. Mi tul 100 a nei company khat ah panmun sang ngah ding a thubaihloh mah bangin kumpi nasepna sungah zong panmun sang ngah ding hamsa zaw tham lai hi. Amaute in a panmun tawh kizui in thuneihna tampi nei uh a, a tawlngak khit uh ciangin zong nasepna tungtawn in a thu theihna uh kibehlap toto lai ahih manin manpha semsem uh ahih lam phawkkha lo hi lehang kilawm ka sa hi.
6) 2015 kitel pi nungah ei le ei gualzo mahmah I kisa a, ahi zongin Chin State le Union level ah kumpi thuneihna a nei panmun taktak mun khat zong ngah kha lo I hih lam I kiphawk kha kei hi. Khua le tui sung phuahna le khantohna lam nasepnate ah zong ei le ei hampha kisa khop mahmah I hih hangin I ngah ding zah a kilawm bangin ngah kha het lo I hih lam phawk siam taktak lo hi lehang kilawm ka sa hi. A thuman a thudik pen cihna hi loin ngaihsutna I genna hi lel hi. Damdam in zom to zel ni. Liantuang
Comment piaknop aomleh...