Lennupa Falam te’n hong suhsawm thu azom ~ Dr. Dongno

Lennupa Falam te’n hong suhsawm thu azom ~ Dr. Dongno

Hih thu mikimin sim khin nai lo in athu tel kim nai lo ahih manin tuni aa i dinmun om zia kong zasak nuam hi. (Photo: Len Nupa Tedim gam, Kapteel oksuh sung ah om ahihna Kumpi zat gamlim)

Thupi ahih manin, Buannel acih uh Len Nupa pen No. 1. Tedim gam sung ah om hi. Pu Con Bik tung aa kilei na thu, zum lai thupite leh No. 2. Banghangin Falam -Hualngo te-in Buannel ci aa Tedimte-in, Len Nupa ci-in kong pan kik ding hi.

No. 1. BUANNEL kici LEN NUPA TEDIM GAM SUNG AH OM HI, FALAM GAM AH OM LO HI.

LenNupa (Buannel) Falam gam sung ah om lo hi. A nuai aa thute hangin LenNupa Tedim gam sung ah om ahihna thukipsa ahi hi.

1. Kapteel khua 1867 kumin kisat aa Ukpi Pu Thuam Thawng maang hi. Falam gam Tashon Ukpi, Pu Con Bik tung pan, sial 120 taangin, thau lawng 17, saiha kop khat, zam khat, dak bu khat, sial khat, zaangsial ahing khat leh Khuangleng hausapa tanu amat uh, Van Singii tawh Kapteel gam lei hi. Tua akilei Kapteel gam sung ah LenNupa omna, Ailam mual paisuak, Inbuk mual dong ahi hi.

2. Brigate Luife in 1910 kumin Kapteel gam khat vei bawlpha kik aa, “Pangding Mual, AiLam mual (LenNupa omna mual) huamin, pai sukin, Tuipi Lui dung zui-in Meitei gun sun suk hi” Teltuivon Zingsol Vol.2, p 19

3. APPOINTMENT ORDER OF CHIN HEADMEN UNDER PROVISION OF SECTION 5 of the CHIN HILLS REGULATIONS-1896, tawh Dy.Commissioner Lt. Colonel LE Burne-in, (Dated August 5, 1930) ni-in, Kapteel hausa Pu Thuam Thawng tupa Pu Thawng Khua Lian uk ding gam, jurisdiction, “ The ridge of Ailam mwell(Mual), to the source of Ailam Lui, (aka Lua Lui that is the water from LenNupa) then down Ailam Lui to its confluence with the Tuipi Lui to its confluence with the Manipur River.” ci-in siangtakin ciamteh hi. Teltui Zingsol Vol 2, p 18.

4. 1944 kumin Commissioner, Pu Thawng Cin Thang leh Mr NW Kelly makaihna tawh WW ll lai-in Sukte Independence Army (SIA) min tawh Japante a do lai un Tedim pan Meitei gun kantanin, “Kapteel gam LenNupa ah phual sat” ci hi. Pu T K Mang, Buannel pan LenNupa. TZ Vol.2

5. Commissioner Pu Tual Khua Mang, BA, BL. Advocate in, “ LenNupa icih gam minthang pen Pu Thuam Thawngin Falam Ukpi Pu Con Bik tung panin alei gam sung ah kihel hi” ci hi. 2012 Teltui Zingsol Vol.2 II

6. Sitni, Pu Lian Za Kam in ”Japan gal lai-in, Tedim Vuandok NW Kelly, Pu Thawng CinThang-te leh mi pawlkhat 1944 March 14 ni-in Kapteel gam LenNupa , tua pan SaEk ah H Q. phut uh hi” ci hi. SuangSuang Magazine p 152.

7. Pu Thuam Thawng tusawn, Leipi Church, Kalay, Senior Pastor Rev. Sian Za Mung-te-in LenNupa Tedim gam, ah om cih maantak thei uh hi.
TtZs pvi.

8. Tedim AD zum khutnuai Land Record zum ah, Kumpi zat tawntung Tedim Myo-ne, gamlim sung ah LenNupa, Tedim gam, Kapteel ohsuh sung ah om ahihna ciantakin lak sinsen hi.

LenNupa pen Falamte’n Buannel ci uh hi. Bang hangin Buannel ci uh hiam cih anuai aa bangin tangthu i sut ding hi.

No. 2. LEN NUPA min, (Falam te’n Buannel), i ngahna tangthu:

Ukpi Pu Thuam Thawng 1867 kum pan Kapteel ah amaan ciangin, thahat galhang Pu Kai Tuah a galkap mang, Army General dingin koih hi. Ni khat Kapteel gam sungteng en kawikawi dingin Pu Kai Tuah anungzuite tawh apai leh mual dawn aa om mualkuam nopci khat mu hi. Tua mualkuam alaizang ah buannel khuk ciangciang thuk hi. Hih munhoih ah khua sat ding ngaihsunin, amin, Buannel phuak hi.

Kum simin thumvei ta va en kik uh aa, nikhat ni ciangin pasal thahoih mahmah khatin a laizang luitui kawi ngiu-ngeau aa luang sialsial gei ah sunsiah ne-in a om mu uh in pum mat uh hi. Pu Kai Tuahin,“ Ka khua uh ong do nuamin ka gam sung ong ensim hiteh. Ong that kei ningin sila-in ong khawi ning” ci hi. Tua pa-in, “Pute aw, ong man kei tapeuh uh. Kei Falam gam Bocungmi ka hi aa, ong do ding aa ong pai ka hi kei hi. Hih lai ah Dawi mangnu, Chawng Tin Leri Lalnu kiang gamsa ngen ding aa ong pai ka hihi” ci hi. Pu Kai Tuahin hehpihin ,” Tua ahih leh na sialtei ong pia-in” ci hi. Tua pa thuumthuumin atopna ah a temtawng apia hi.

Pu Kai Tuahin, “I kimat, i kithah hangin noptuamna om lo ahih ciangin, kilawmta ni; ikilawmtakna ciapteh nadingin hih lai mun i lawhna min kikhek ni” ci hi. Falam leh Lushei lamte lawhna, Len Nupa en la-in, ei lawhna Buannel amau kipia hi. Tua ni aa kipanin tuni ciang dong en hih munnuam, Len Nupa, ici aa, amau Buannel ci uh hi. Len Nupa cih ciangin, ‘Mual Nupa’ cihna ahi hi. Tu ni dongin Falamte-in akhiatna thei lo napi uh, Buannel ci uh hi. Mizo gam ah Zolai sang ah “Buannel Ramdai” thu kisin sak aa, Falam gam ah magazine khat, “ Buannel “Buannel Arsi” ci-in leh Mino’ ci-in laibu laibu thoh uh hi.

Tua ahih ciangin, Hih LenNupa pen Tedim gam sung aa om, i pu, i pate-in mihing pum khat leh vangil-te tawh akileisa leitang tung aa om munnuam minthang ahi hi.

A masa-in Buannel ici aa, Bocung pa tawh kilawmtakna kibawl ciangin, I lawhna ciapteh nadingin min ki khek aa, en Buannel icih amau tangin, amau Len Nupa ci hen atang ihi hi.

Tu-in Falam khua mite-in, Buannel acih uh, LenNupa pen, Falam gam sung aa om Buannel ci-in Reserved Forest sung ah matpongten dingin siau uh hi. Ngah hi nai lo hi.

Hih thu pen July 7, 2018 ni-in Falam Prospect Workshop kamkupna ah agen uh, Chinland Herald tadensa sung ah July 10, 2018 ni-in ong suak sak uh hi.

Ei lampan tulaitak akihanciamna hih bang ki nei hi.

A kizak phetin, lungkim lo-in, phone ka set kawikawi pah hi.

Tedim AD (Vuandok pa) tung ah hih thu ka ko pah aa, tu-in MP te tawh ong vaan ding uh hi. Tua kawm kaal sungin, Tedim Youth Asso., Sakollam Y A, Zomi Youth Asso, Tedim, Tedim Mihbahte zong kizasak pah aa, Kawlpi ZYA te, Kapteel Hausa, Suangzang hausa, Heilei hausate, Tedim, leh Yangon Teeltui Kipawlna, GZA te leh ZCD president pa personal in ka contact hi. Amau zong ong awng tek ding uh hi.

Tu ni, July 25, 2018 ni-in Pyi-ne Forests zumah Falamte ngetna kankuat lai pawlkhat ki puak ta ding hi. Hih atung aa thute ki dapphah hi. Falam-te siauh lua pen amasa-in ki kankuat limlim phot ding ahi hi. Tua khit ciangin, Tedim gam aa om ahih ciangin, Tedimte lawhna min, official name, Len Nupa tawh Reserved Forest dingin Tedim Vuandok zum pan ki siau ding geelna ki nei hi.

Khatvei-in hihthu kong suahsak cil na ah “ Len Nupa Falam te’n ong Sut” ci-in ka suak sak hi. Ong sut laitak hi aa, ngah hi nai lo hi. Ei zong atung aa thu guipi teng siksanin Tedim gam LenNupa ahihna tawh akankuat ihi hi. Gam leitang hi ciapi pen Chin State, Bahu Nyipitaw dong ki khawl lo ding hi. UN dong kikah thei hi.

Kua maciatin hih thu lawp takin koikoi panin nong kikup pih nate uh hangin tha kangah uh hi. I pu i pate-in, “Inn mun lo gam khutpi cia zong kiphal lo hi” naci uh hi . Tu-in Zogam acre 12,000 takpi ong kideihgawh, ong sut nuam uh ahi hi. Zo gam sung ah om Len Nupa (Buannel) pen mihing pum khat leh tangh vangil man tampi tawh i leisa gam ahi hi. Tua bang aa deihgawh theih ding mun hi lo hi.

More: Tedim gam aa om Lennupa munhoih Falam te’n hongsut

Hih pen kikoih khong hi lo-in nasiatakin aki vaihawm laitak ahihna a-uk, akinte kong thei sak nuam hi. Na kikupna pepeuh uah hih thu nihte ( atung aa No. 1 leh No.2) refer, ‘kuukaa’ kawmin ong kikum un. Thubun muibun dingin ong kikum ciat un. No ngaihsut na hoihte zong ka deih uh hi.

Hih hanciamna adingin huhna, ngaihsutna ahi zongin, tua mun aa agim atawlte zat ding asum apaai huh zawhna aom ding leh ong thei sak un. Amau zong haksatna tampi kawmkaal ah Falam, Haka, Kawlpi ah tai kawikawi-in hanciamtakin sem uh hi. Mi aa aguk sak hi lo, ei neihsa ong ki sut nopna pen i ta kei ding hi.

Galkap kumpi hunin, i Zogam, Chin State, Sagaing Division-in damdamin ong eu toto hi. Thau muk ong kingat ahih ciangin kipau ngam lo hi. Tu, democracy hunin, midang hi lo i mipih, i vengte teekteekin Tedim gam sung leitang suh ong sawm uh hi. Galkap kumpi sangin suuk zaw lai hi. Muan ding nei kisa uh ahih hang ahi hi. Ahih hangin atung uah upadi om veve hi. Zahau (Zhou=Zo) ukpi Pu Thang Tin Lian maa, Tashon Ukpi Pu Con Bik tung ah i leisa gam minthang, Len Nupa ahi hi. Kuamah kihtak ding om lo hi. Hangsantakin, upadi tawh kizui-in ding khawm dingin kong zawn hi. Dr. James Dongno