Mihing a kibawlna

Mihing a kibawlna

Pasian in mihingte a bawl ma in mihingte a bawldan ding ngaihsun masa hi. ‘Eima limlemel sun in mihing bawl ni. Tuipi ngasa te tung, huihlak vasate tung, nganhing te tung leh leitungaa a bokvak te khempeuh tungah ukna neisak ni’ a ci hi. Pian- 1:26.

Pasian in na a sep ma in ngaihsutna a neih masaklam kimu thei hi. A khuttawh a bawl ma in a lungsim sungah bawl (design bawl) masa hi. Koi ci bawl ding. Kua sunsak ding. Bangciang na a semthei in bawl ding. Vangliatna bangciang pia ding cihte teltak in na khentat in, a ngaihsutna sungah mankhin masa hi. Tuaciangin a lungsim sungaa bangin akimuthei mihing bawl pan hi.

Vangliatna zangkhia ni

Bangzahtakin nasep hanciam in, sunlezan in hauhna ding, pilna ding i zongphial zongin ih lungsim sungah muhdahna, lelhna, zawnna te i kepcing khakleh ki mavang ziahziah tuanlo thei ding hi. Tua pen leitung a ki bawl laipek aa a kikoih thusim ahihi.

Ih ngaihsutna a nit leh (a siantho kei leh) i nuntakna a nin ding hipah lel hi. I zawnlai tak mahin hauhna thu ngaihsun ni. I natlaitak mahin damna thu lung ngaingai ni. I haksat hun laitak mahin suahtakna thu ngaihsunsun lel ni.

Nopna vive ih lungsim sungah tengsak ni. Vangliatna tawh nasepna a hihi. Ih ngaihsutna bangaa i pian dingpen Pasian in hong phal hi. Pasian deihna ahihi. Pasian in tua ih ngaihsutna bangin hong bawl nuam hi.

Ngaihsutna lungsimkhamit (imagination) sungah a tawntungin nasep ding kisam hi. Mipilte teptehna ah zingsang lupna tungpan i thawhtung leh nitak i lupma minute 5-15 sungta i deih thu te lungngel in i mitkha ah luaisak den leng hoihpen hi ci uh hi. Tuahunlaitak in ihkhuakbu te nasep a khawllai tak, a tawlngak lai tak ahihi.

Dai dide aa om ih khutlekhe, i sisa te leh ih pumtung nate in na sem nailo ahihmanin i ngaihsut bangbang ih sungtawng dong lut pah hi ci uh hi. Zing i thawhtoh ciangin ih lungsim sungah ngaihsut ki cian khat koihpah lian ding cihna ahihi.

Tua lungsim sungaa nasepna pen vanglian mahmah aa Pasian pianzia a hihi. Na ngaihsut bangin hongpiang ding hi. Siamsin Library