Thailand ah numei khat Facebook Live akizaih kawmin tuisung ah tuaksuk

Thailand ah numei khat Facebook Live akizaih kawmin tuisung ah tuaksuk

Thai gamsung ah numei kum 18 aphakhin khat lei “Bridge” tungpan in atuahsuk laitak Facebook Live in khahkhia cih The Nations pan kiza hi. Hih thuthang pen Tuesday zingsanglam in thupiang hi a, Bangkok’s Rama 8 Bridge kici lei tungpan in tuisung ah atuahsukna Facebook Live akhahkhia ahihi.

Hih numeinu pen alawmpa “Boyfriend” tawh kitawng ahih manin, amahleh amah kisihbawlsawm, sinuamzaw ahih manin Rama 8 Bridge tungpanin tuisung ah atuaksuk kici hi. Ahi zongin Tuesday zingsanglam in atuakkhia pen Tuesday nitaklam 4pm hundong aluanghawm kimuzo nailo ahih manin, asihiam anungta laihiam cihpen kitheilo hi.

Tua numeinu ii aminpen “Nitaya” cihciang bektawh kipulak khia hi. Amahleh amah aki sihbawlma Facebook Live Video azaihsak dingin pasalkhat sumtawh cial cisawnsawn hi.

Tua numeinu pen zuzong khamtuak a, lungleng lungzuanla leh kikhenna “Break-up” la vive asaksaklam Video sungah ki muthei cihi. Tuakhit ciangin lei ii ataangban “Rail” tungah tuto in, zu dawnkawmkawm hi. Tuakhit ciangin Rail apualam ah kumsuk in, Chao Phraya River kici luisung ah atuaksuk ahihi.

Tuabang in agamtatna teng Smartphone tawh azaihsakpa pen numeinu atuahsuk takpi ciangin patau in Facebook Live Video azaihpen khawlbawl hi.

Hihvai tawh kisai in thunei te’n ageinai aom CCTV tezong etcianna nei uh a, tua numeinu pen amathu in atuaksuk ahihlam kiciantak in ki muthei cihi.

Khuasung avakkawikawi Patrol Police te’n agenna ah hih numeinu ii ID Card, Phone leh zuthawl khat kimu a, hihpen amahleh amah aki sihbawl, Suicide hiding hi ci’n genkhia uhhi.

Police te genbehna ah hih numeinu pen khasiattuak mahmah, kapkawmkawmsa in Soi Nakniwat panin Motorcycle Taxi Driver khat kawm a, hih Rama 8 Bridge munah apai cihi. Tuakhit ciangin tua Motorcycle Taxi Driver papen aval in sum Bt500 (RM61) piakbeh a, tawmvei hong ompih inla, Facebook Live Video hongzaih sakin ci’n cialbawl cihi.

Tua Video azaihsakpa ii genna ah Nitaya pen khasiattuak mahmah in, alawmngaih vaitawh anuntakna lungkimzolo cih kimuthei a, ahi zongin amahleh amah ki thahsawm cih bangmah hong genkhia hetlo hi ci’n thunei te tungah genkhia hi.

Tui sungah atuahsuk ciangin akiatsuk kamu a, damdam in tuisung ah tumsuksuak cihi.

More: Indonesia ah pasal khat aki gui awk (Suicide) laitak Facebook Live in khahkhia

Hih numeinu ii ameltheih Uncle khatin Police te tungah agenna ah Nitaya pen aomna Ranong Home panin apaikhiatzawh kum 2 bang phakhin a, a innkuanpih te’nzong aomna akician in theilo uhhi. Lawmngaih pasalkhat nei in, tuapa pen Computer Field ah nasemkhat cihciangbek a innkuanpih te’n theihpih uhhi ci’n genkhia hi. Sawltak #zomidaily