Tedim labu thu ~ Pi Luan Za Cing

Tedim labu thu ~ Pi Luan Za Cing

La tawh kisai-in la nambat kibang lo, kammal kibang loin labu a tuamtuam I neih manin Tedim mite nopna dahna-ah la kisa khawm thei loin I lungsim kigawm loin kikaak tektek ahina thu, e-mail-ah ong suak zeelzeel ahi manin labu thu tawm kong telgen nuam hi.

• Tedim Labu I-na: 1914 kumin Sihzang pau-a kitei la dawng 24 a pha, ong suak hi.
• Tedim Labu II-na: 1918 kumin la dawng 100 a pha,
• Tedimpau-in ong suak a, tua labute-ah a teite min kigelh lo hi.
• Tedim Labu III-na:1923 ciangin la dawng 283 apha, labu ong suak a, tua lai-ah Cope topa mah makai hinapi,ama min gelh loin a huh mi giatte’ minna kigelh hi.

Tedim Labu IV-na: Tua Tedim labu sung a late ei pau in a cihnopna kitel lo lua ahi manin Hau Go in 1946 kum, Pasian nasep ong kipat ciangin kuama sawl loh, kuama guaih lohpi-in ama thu-in labu ong puah hi. Tua hun lai in biakna kipawlna cih bang om nai lo hi. 1948 ciangin America a pai ding hun tung a, a vekin zo siang man loin, zawhsa tawh zawh loh tawh khet dingin Yangon-a ABM Press-ah ap hi.

Tua pen Tedim Labu 4-na hi a, 1949-in ong suak khia hi. Tua labu IV-na a bawl ciangin a kizang late tei pha-in, a kisa ngei lo la pawlkhat la khia-in tua munah ama tei la thak hon khat guang a, ama tei thak a om lai teng a bu mong lamah behlapna-in nei a, a vekin la 295 ong pha hi.

S.T. Hau Go in 1948-1950 sung America-ah MRE va sin a, a man phet ciangin ong ciah hi. Amah’n M.Th. (kum 3 course) sin nuam hinapi-in I Sangmangte in amau khuan ciah ma a lap kik thei dingin deih uh ahi manin, kum 2 course ahi, MRE sin hi. Amah’n Laisiangtho tei ding a ngimsa ahi manin MRE course-a kisin kha lo, Laisiangtho tei nadinga kisam a sak, Systematic Theology, Greek, Hebrew cihte ama thu-in sinbeh hi.

1950 kum bei ciangin America pan ong ciah hi. Khamtung ong tun ciangin I Sangmangte lah a khuan ciah hun cing ta a, amah guak bek in Khamtung bup vanin, Tedim Baptist Association, Falam Baptist Association, Hakha Baptist Association, Hualngo Baptist Association, Zomi Baptist Convention phuanin ZBC Secretary sepna tawh kicinglah lua-in laitei peuhmah sem man lo hi.

Biakna lai tei dingin 1957 ciangin ZBC Secretary pan tawpin Mandalay-ah paisuk hi. “Laisiangtho tei ka kipat ma-in Tedim labu ka zawh baang teng zo pak vet ning,” ci-in Tedim labu tei a, zo dektak, khet dingin la dawng 109 zong ABM Press-ah puak khin ta hi. (America a pai ma a la thak a guante a aw tawh kithuah lo ahi manin kuamah in sa thei loin, na kizang lo lel hi. Amah America pan ong tun ciangin Sia Vul Za Thang, Sia Gin Khaw Thangte khawng tawh ko nupi papi teng mahin Choir-a ka saksak uh leh a ngaih lam ong kithei khia a, tua ciangin ong kizang pan hi.

Tua ahi manin labu I khet kik ciangin Tonic Solfa tawh thuah ni, ci a ka geelsa uh hi a, zo dekta-in tua bang a aw tawh thuahsa, a sample copy zong ABM Press-te in ko kiang le Sia Kam Khaw Thang kiangah ong puak khin ta uh hinapi, tua bang teng thei gegu mahin TBA-EC tawm kha-in, ‘Bangmah sem lo’ cih paulamin September 26, 1958 ni-in theih kholh lohin laiteina panin bingbakin tawpsak uhi.

Amah a kitawpsak khit ciangin Labu le Laisiangtho tei dingin Sia Kam Khaw Thang ki-ap hi ci-in thukhenna kibawl thithe hi. Sia Thang in a luite puah hi loin la 20 behlapin la 315 a pha labu 1963-in ong suak khia hi. Tua khit 1969 ciangin Tedim Baptist Christian Endevour Union-te ki-ap leuleu a, 1974 ciangin ong suak khia hi. Tua sungah zong a omsate ahi bangbangin kiguang a, choir ding a kiteite pawlkhat kiguan beh hi. Tua pen a tungah Tedim Labu kici napi, ZBC labu I cihcih pen hi. Tua ZBC labu sunga late a kitei pha hi loin a maan lopi mahin ahi bangbangin kikhen kik hi.

Hihte khempeuh pen a kiteisate a puah kik, Revised – Edition hi loin, tawm behlap-a a khen kik – Reprint bek ahi hi. Tua sungah Tedim Labu 4-na sunga khempeuh le Choir khawng a sak dinga Hau Go’ teite mah zong guang uh a, ABM Press-te mah in khen uhi. Tua khit zawh kuamah in la tei ding vai peuhmah kihawm nawn lo hi.

1975-in Hau Go zato lum a, a noptuam deuh ciangin la tei ding mah ong gen hi. Ke’n: “Hih la tei pen zekai mahmah ding, sum zong suakpak lo ding, sum tum nei het lo ihi teh dictionary na patsa pen zo masa lehang kumkhat sungin man ding a, tua khit teh la tei kipan zaw leeng,” ka ci hi. Amah’n: “Dictionary pen Manglai siam khatpeuh in hih thei ding hi. Ei mite in ‘la tei thei tampi om’ a cih uh hangin ke’n la tei thei ka mu nai kei hi.” Zong om pak lo ding hi,” ci-in a zato lupna tung panin la tei dingmah ong kipan teeiteei hi.

Nidanga a tei man nai lohte teipha-in a thak hon khat behlapin ong tei a, la dawng 504 a pha Xristian La, Tedim Kam 1987-in ong suak khia hi. Labu IV-na sunga ama teisa veve-te nangawn zong tawmtawm a kheel om hi. Tua Xristian Labu sungah summeet zonna-in a kineih theih loh nading le integrity (thumaan, cihtak, kiciatna) neih theih zawk nadingin Copyright thu cingtakin at hi.

Hih pen kiphatsakna hi loin a kammalte theizaw lopi-in kuamah in a kheel thopthop theih loh nading, Tedim mite in Tedim kammal maan tak tawh Pasian a biak theih nading a deihsakna, I mipihte a khualna mah ahi hi. Hih la 504 a pha Labu pen a meet la loin a beizah bek tawh K.50-in kizuak hi.

Xristian Labu ong suak baih ta ding cih a kitheih ciangin pawl tuamtuam pan mipawl khat in pawlpi min tawh ahi zongin mi khat min tawh ahi zongin sum zonna ahi diam, min zonna ahi diam, a phuakte’ cihnopna a tel loh ban-uah I Tedim kammal nangawn bul-tel khol lopi-in Hau Go’ teisa kammalte malkhat mal nih kheel, a masa pen nunungsak cih bang lel ngeel tawh, labu ong bawlciat uhi.

Hih labu thu-ah Hau Go in a khuak si a, kei khut tawh ka sep khiatsak vive ahi manin ka tel mahmah thu vive ong gen ka hi hi. Tua hi a, Tedim kammal hitaleh, a la phuakte’ cihnopna mahmah hitaleh bultel khol lopi-in Hau Go’ teisa kammalte tawmtawm kheelin labu kibawl zeelzuul ahi manin I late kisa khawm thei nawn lo hi. Tua tham loin Copyright thu a kitel nadingin Martin Luther in German pau a a phuah la, mi nih in Mangpau-a a tei tuakna uh zong Xristian La laimai xii-ah ong lak hi.

Mi teisa la khat, a kammal peuh lumletsak mawk ding hi lo a, a teite in amau hoihsak banga a tei ding uh ahi hi. Ka pasal hi ci a ka phatna hi loin, a Manglai hitaleh a Zolai hitaleh Hau Go telzah in a tel tam het lo dingin ka um hi. Hau Go in leitung min le vang, sum le paai lam-etna tawh a sep hi loin Pasian ading le Tedim mite ading deihsakna tawh a septe tel thei sang thei tek leeng kihampha zaw dingin ka um hi.

Tua banah a thupi mahmah khatah, Biakna lai simloh, eipau-in lai kigelh om lo ahi manin I Laisiangtho le I Labu sunga I kammal zatte a maan loh manin I laigelh zia, I kammal zatdan tu-in tampi hoi khin, pial khin ta cih, thei ka hi manin dah huai mahmah ka sa hi. Aituam vai, min zonna, sum zonnate peuhmah nusia-in I mipihte mah khualna le Pasian min zahtakna tawh na khempeuh vaihawm ciat ni.

La phuah, la tei, lai at, cih te pen mi khat peuh in a ut bang in a ut hun in phuak thei, at thei, tei thei uh hi. Ahi hang in tua peen a ma ngaihsut tawm tek tek ahih ding kul hi. Ei ngeina sung ah zong, khanglui lai a kipan tuni ciang dong mi phuah sa la khat, thu khat peuh midang khat in a ma’ phuah dan in a gen teh a phuak masa te, a at cil, a tei cil te kha sia hi. Thesis a ki bawl ciang in zong mi’ bawl sa peen etteh ding ki phal lo hi. Etteh sa a bawl lam a ki theih leh a ki theih ni ni in degree piak sa na ngawn a sang te’n dok kik hi. Ei mi sung ah hih bang thu peen doctorate degree ngah zong tam mah mah ta ihih ciang in kitel siam tek ding in um mah mah ing. Tua pen ‘plagiarism’ kici hi.

Hih bang gamtatna pen leitung gam khempeuh in zong deih lo a hih man in World Intellectual Property Organization (WIPO) in zong nak kham mah mah hi. Kawlgam zong WIPO ah member hi a Copyright Act zong a kinei mah hi. Ei theihna bang a tei ding hi a, mi teisa khat a mal tawmtawm kheel a, ei aa banga bawl ding hi lo hi. Leitung nasepna hi lo, Pasian nasepna lam penpen-ah hih bang lungsim nei pawlkhat I om manin la nambat kibang lo, la kammal kibang loin I labu kisa khawm thei lo, I lungsim zong kikaak semsem ahina tu-in kiphawk panpan ta ahi manin ka lungdam hi.

Tua bek hi loin I Laisiangtho le I Labute a kammal a maan loh ban ah Tedim kammal hoih teng zong maimang pianpian ta ahi manin lunghimawh huai mahmah ta hi. Pasian’ mai le mite muhna-ah zong ki-awi-huai I sa hiam? A cingzaw-in na theihnop uh leh ong zom lai ning. Pi Luan Za Cing, Mrs. S.T Hau Go (late)