Ki tehteh se dahni

Ki tehteh se dahni

Khangno khempeuh bek hilo mihing khempeuh pen miten hong phat pian,
hong pahtaak lam i ki theih ciangin ih sungah ei leh ei tehna khat ki
guan hihang. Tua tawh kampau in, gamta buatbuat kha thei hihang. Tua
ahih manin i ki zat theihna te, mi hong pahtaakna te Pasian in sauvei
hong zeeksaklo hi. A hangin ei leh ei in a lampi hucip mawk hihang.
Mi nuntakna zong a hoihlo lamlam in va tehtehna in innkim aa Uipi
saguh zong tawh ki banglel hi.

Henry Nouwen in, “Mi muhna tawh na thupina teh kei-
in,” ci hi. Na hihna dinmun leh na manneihna pen Khazih tawh na
kizopna tungah na ngak ciangin mite muhna ah a gina nasem na hi cih
kilang hi. Na ki zat theihna khat peuh Pasian tungah na ngat khak
keileh nang tangin midang a sanna lam ah paito ding hilel hi. Kei om
keileng piang kei unteh. Kei lo tawh…kei…kei…cih lungsimin ei
leh ei lungsim thongsung ah a ki khumkhum hihang aa, mite suahtakna a
piapia ki hizaw lel ngel hi.

Mitheih ding leh kipahtawi ding kul masa lo hi. Paul in, “Nang le nang
na kisial kha kei dinga, ahi zongin Topa’ thukimpihna bek mah
thukimpihna taktak ahihi ci hi(IIKor.10:18). Mi thu kimpihna a thupi
sakzaw, mi pahtawi ding ut luat manin mi nawng kaisak i hih khak ding
ki dawp huai mahmah hi.

Naupangno khat lian a ki sak pian ciangin a Nu tawh a din sanna ki
tehnuam uhhi kici hi. Tua bangin ki tehnopna lungsim i puak hun laitak
pen i picin nailoh laitak na hizaw hi. Mite tua cita in kei tuate
sangin miten hong pakta luata uh ei. Kei sep theih kuaman sem thei
kei…cih bang tuamtuam tawh ki tehna hong lut ciangin i picin nailoh
zia ki lang hi. Mi muhna ah na sia mahmah ding peuh a ut om zanzan hi.
Ken tua ka septeh miten hong sem ngeingei cizaw mah lai hihang. Ei
ngaihsutna bang miten a pualo ding peuh kisa thei hihang. Mi lungsim
hoih a puaktan ka puazo ding mah hiam? Mi picin tan, mite Pasian tawh
a ki zop tanmah ka ki zoploh phamawh hi cih lam-ah ki dem bawl henhan
lel leng bang zah takin Pasian lungdam dinga Zomite sungah a bucing
khangto lam bit semsem ding hi.

Zeisu tawh nu kibang, pa kibanglo James pen half brother hi napi
“Pasian leh Topa Zeisu Khazihnasempa” kici hi. (James1:1). Zeisu tawh
kinai semsem peuh leteh kisansak kisam lo hi. Ki liatsak ki samlo hi.
Zeisu lian khin hi. Muan huai khin hi. Heina peuhah Zeisu a ki hel
khak keileh mialna guam thukpi sungah a lut hita hang. Lungdam.

Thawn Tuang
May 15,2015
www.zomi-angvaan.blogspot.com