Malaysia, KLIA vanlengtual ki suamlupna vaitawh akiman numeikhat ki suaktasak

Malaysia, KLIA vanlengtual ki suamlupna vaitawh akiman numeikhat ki suaktasak

Malaysia, Kuala Lumpur International Airport (KLIA) sungah akisuamlum Kim Jong-nam vaitawh kisai in mat athuak numei 2 te lakah khat kisuak tasakta cih AP News pan kiza hi. Tua asuakta pen Siti Aisyah kici Indonesian gammi numeipen ahihi. Tuni Monday (March 11) ni in Malaysian Judge te’n athu vengta hi ci’n akhahkhiat uh ahihi. Prosecutors te genna ah athu pen kidotkik ahih manin, Siti Aisyah pen aki khahkhia hi cihciangbek genkhia uh a, adang athu akicing in bangmah pulakna omnailo hi.

Thukhenzumpi panin suahtakna akipiakkhit phetin Siti Aisyah pen manlangtak in Courtroom pan ki paikhiatpih a, amahzong lungdamlua in kapkapliang hi. Reporter te tungah agenna ah aki khahkhiatding pen theikhol hetlo in, zingsang thusitna zumpi ah aki paipihciang bekin katheipan hi ci’n genkhia hi.

Hongki khahkhiat pen lamdang kasa mahmah a, kalungzong adam mahmah hi ci’n genbeh hi.

Ahi zongin aki matkhoppih ahi Vietnam gammi Doan Thi Huong pen kikhahkhia nailo hi. Siti Aisyah pen aki khahkhiat khitciangin amahzong aki matkhoppih alawmnu kiangah paiphei in kikawikhawm uh a, kikahkah uhhi.

Indonesian Ambassador Rusdi Kirana inzong Malaysia kumpi tungah kalung dammahmah hi ci’n lungdamkohna nei uh a, Siti Aisyah pen tuni ahih keileh amanlang theithei in Malaysia panin Indonesia gamah ki ciahkhiat pihpahding hi ci’n genkhia hi.

Video: 26-year-old Indonesian, Siti Aisyah, who has been held for two years on suspicion of killing Kim Jong-nam, the half-brother of North Korean leader Kim Jong-un, was freed from custody on Monday. Shah Alam High Court judge Datuk Azmi Ariffin discharged Siti Aisyah without an acquittal after prosecutors said they wanted to withdraw the charge without giving a reason.

North Korea makaipipa ii asanggam ahi Kim Jong-nam aki suamlup pen 2017 February 13 ni hi a, tunidong mah asihna thupen kibuaipihlai mahmah hi. Kim Jong-nam pen Kuala Lumpur Airport panin Macau zuandingin vanlengtual ah aomlaitak numei 2 in amai ah VX Nerve Agent kici guza namkhat taatsak ahih manin, tuatawh asi ahihi. Aki taatsatzawh asawtlo Minute 20 sungin asiziau ahihi.

Kim Jong-nam pen North Korea gammakai Kim Jong Un ii asanggam khat ahihtawh hihpa kithahna vaipen leitungbup zeldikdekzo hi. Tuabek thamlo North Korea leh Malaysia gamnih kikal ahzong ki telkhialhna, buaina tampi piangsaktuam hi.

Kim Jong-nam ii amai ah guza ataatsak pen Indonesian Siti Aisyah leh Vietnamese Doan Thi Huong ahihi. Tua numei 2 te ii agamtatna khempeuh avekin CCTV sungahzong Video Record omhi. Ahi zongin tua numei 2 te’n hongkisawl hi ci uh a, amaupen ciamnuihbawl, Prank Show kizaihdan in a ngaihsun uh ahihi.

More: Kim Jong-nam kithahna vaitawh akiman numei nihte High Court ah kipuaksawn

Ahi zongin akhutsung uhah akipia VX Nerve Agent kicipen guza akhauh mahmah namkhat nahimawk a, thakhatthu in mi ahonpipi in athatlumthei “weapon of mass destruction” akici Chemical khauhmahmah namkhat nahimawk hi.

Hih numei nihte pen sihdan kipiatheiding in ki ummawh a, ahi zongin amau lampan in atheilo in, ciamnuihbawl Reality TV Show bangdan in akisawl himawk ahih manin, numei tepen mawh kisa hetlo uhhi. Sawltak #zomidaily