Idol kammal azang Pasian nasemte hizaw ~ Sia Do Khup
“Idol (milim) bia kei un” kong cih phetun idol kammal a zang khin ka hi uh hi. Ahih hangin idol bia lo kahih manun kisuang lo hi ung. “Idol bia kei un” Kammal bek, “Zomi idol” Kammal bek
ZOMI TEN BIAK DING IDOL NEI ZO PAK KEI NI (Zatlaan khat hong gelh ing, hun tawm pia a sim kul ding)
“Amah in amaute’ tung panin kham saangin, sumtui sunna sungah sungin, a kisung bawngno khat bawlsak a, tua ciangin mite in, “Israel mite aw, hih pen Egypt leitang panin note hong paikhiatpih to na pasian uh!” a ci uh hi.” PAIKHIATNA 32:4 TDB
IDOL BAWL DING VAI THU KIKUPNA (August 29, 2019, Thursday)
THANGNO: I biak ding idol khat bawl leng hoih na sa uh hia guai.
MIPI: Hoih sa mah hang ei.
THANGNO: Tua aih leh Lai Siangtho sungah kham (suai) tawh kibawl ci aih ciangin i khi, i bilbah, i taute piakhia ciat ni ei. (Mipi maisuah hong kikhel diandian ta hi.)
PA HAU: No a makai ten pia masa phot vevua leh
THANGNO: Bang ko a vaihawm tawh a sep tawh a piak tawh thuah zo kei nung ei, tua bang aih leh tawp kik ni ei.
PA KHUAL: Ngal hapak sa tum kik lo ci ei, vaihawm sa khawl lo ding, ei piak kul lo, gamdang ah Zomi tam mahmah fund zong ziau ding.
MIPI: Pa Khual cih hoih lian ei, Pa Khual mah thukhual ei.
PA ENG: Gamdang a ten zong a mawk ngah uh hi kei veh aw, kei bang US ka pai lai-in a nasep dan uh ka muh teh bangmah ngen ngam keng, Ei zong pia masa lopi a huhna nget ding kei thukim keng ei.
PA HANG: Nang, Pa Eng Zomi langpang thah ut maw? ……. (Pa Eng lau lua ling keuhkeuh….)
PA ENG: A ci khial hing ei lawmte, no cih ahoihzaw mah hi ei.
FUND ZONGIN KUA PAI DING
PA HANG: Thangno pen kei tapa ahih man a ong phum hi kengin makai a thuphuang masa ahih teh, amah paisak leng hoih nasa uh hia?
PA ENG: Sum vai aih teh kimuan lohna hi kei in amah guak a pai ding kei thukim keng ei. (Pa Hang heh lua, leng phei Pa Eng tawlmet lian)
PA HANG: Nang kheeikhaai in a cik a cik a, ko pata nong langpan den keei mahmah, tuni na sihni hi ei.
(Mipite dah lua phelh ngeingai phelh zo liailiai sam, Pa Thuam heh lua)
PA THUAM: Meeting khawng a nong kilai uh na mai uh zum lo maw, Pawlpi kumcin delegate sa nahi uh maw, gialgual geuh.
MIPI: Tua aih leh Thangno leh Khualpu paisak ni ei.
IDOL DINGIN BANG PEN ZANG DING
THANGNO: Idol cih kammal bek pen kibia theilo ahih ciangin bang idol zang leng hoih na sa ua? gen ciat vou leh!
ZONU: Pasal ten nong ngek bawl tuam khak uh leh VAPHUAL lim mah zang ni ei guai;
PA LET: Tua vasa bia cih limlim Zo ngeina ah om ngei kei, biak cih gen thadah a sa kine hizaw lai..
PA KHEN: Zomi ihih ciang Zo kammal mah kihel leh hoih incin, ganhing dangte min ahlah Zo kihel lo aih ciang ZO VOK idol bawl ni ei.
NEMNO: Tua Vok biak ding laizang ko SDA te thukim kei nung ei.
LUNPI: Idol i biak taakin SDA ihi nawn ding maw, mihai..
NEMNO: Aw! aimah ve, Tapidaw ding mah kisasa lai hang ee.
PA KAM: Mihing in ganhing bia cih limlim kei thukim lo, ganhing bia ding nong cih teitei uh leh si leh nai kisuah ding hihang ei thei vou!
MIPI: Awi leh!
THAWMTE: Zomi sungah Mang masa pen Saizang khuasat ka Pu uh Mangsum bia ni ei guai.
GUITE: Cih laizang ko zong Lamzang khuasat Guite Mangsum nei ung ei,
SUKTE: No a te maimai biaktaak kei in, ka pu uh Khan Thuam aih kei leh Kam Hau khat zawzaw bia ni ei.
GUALNAM: Tua laizang Kam Hau gal khempeuh a dal ka Pu uh Eng Tuang biak taak zaw ei, Eng Tuang om kei leh Tedim khua ah mang kei nu ciai.(Amau pu ciat koih nuam kitawng kikawk ziahziah ta)
COMPUTER: Tawmvei a ngaihsut khit teh…. Tuate zang ding ihih leh amaan (photo) ong lak vou leh tua hileh bek kibawl thei in ciai.
PA SELDAI: Tua lai-in Camera cih bang om kei mihai, Computer ci a tua ciangciang theilo lawmlawm, na tuattuat kei ding maw.
COMPUTER: Computer ihi ta zong a, a kizaih ngei keeilo khat photo ki omsak thei sam lo hi veh aw…
SIAMPUPA: Kilai lawh dekdek un cin zumhuai, i pu i pate biak PuSa mah idol in bawl ziau ni ei.
COMPUTER: Pusa photo khat hong lak ve leh copy pak leng aive.
SIAMPUPA: Mihai Computer, pusa kuan mu ngei ai hia?
THANGNO: Buaihuai lua ta in i pu i pa ten Kamkei pen thupisak mahmah uh ahih ciangin Kamkei Idol bawl leng ee leh?
MIPI: A hoih a, a hoih kei zongin phamawh nawn kei, i tuttutna taw kham lua ta in khensat ziau vou, Kamkei hoih ci lel ni ei, cim ta hang ei. (Taw kham man leh Korea film leh Bawllung et hun ta ahih manin khensat ziau lel uh hi.)
IDOL KAMKEI KOIH NADING VAI
THANGNO: Tun eipawl in lah pia ngam khangin gamdang a ten sum hong piak zenzen a idol i bawl zawh zenzen leh koi ah koih leng hoih na sa uh hiam ou, meeting hi ei, na deihna mun ciat uh gen vou leh…
ZOLENGTHE: Bangbang ai zongin i khuapi Tedim mah ken hoihsa ing ei, kuaman a dang gen nawn se kei vou.
KHAWVONG: Tua bang a ki innpisak nading om tuan kei, Tonzang ding hizaw, Pu Hau Cin Khup khua hi.
CIKHUK: No Tedim leh Tonzangte na kiphatsak nading uh om tuanlo, tu dong Khazai zong na ngah zawh tuanloh pi uh, Myo citciat hihang kilamdang kei, Cikha hileh India lam sanggamte hong pai nading zong naizaw…
GOUCHINKHUP: Zomi hihang, unau hi hang cici napi uh cin vai na hawm ciangun Lamka lam hong phawk ngei kei uh teh, Lamka ah Setan biakna zong a omsa hi-in Idol koih nadingin kilawm penpen ei…….
TAI 9 : Ko kiang hoih pen ko zong Myo mah hi ung i kiklamdanna om kei, Zogam sang Kawlzang leh gamdang a om kitam zaw ta, tua teng adingin laizang pen Gamdang a i sponsor-te idol bia ding a hong pai ciang Kalaymyo ciang vanleng tawh ong leng thei ding, sponsor-te ading zong ngaihsun un maw, amau hehsak leng budget hong kia nawnlo ding ai aw.
TUITHANG: Ko zong no myo a kicite sangin inn tamzaw ung, ko kiangah koih ding…
LAITUI: Ko kiang ding hizaw, Mizogam pan idol bia a hong paite adingin lem pen lam tun pen
KAPTEL: Ko kiang zong Pu Songtheu khua hi in, New England veng khawng zong a omna hi, ko kiang ding hizaw….Sabuai tum geu..
( Buai dan kigen theilo, online live pan a ten zong amau khua ciat mah ci kheukho Facebook pan huih thau tawh kikap ziahziah, a meidawi tata facebook pan hangsan lua, ong that ning, na gawl at ning, ong vun hawk ning kici ziahziah………. meeting sunga omte kidinteh ta, kihon lai uh, tual leh gal zong kitel nawnlo, a nai om peuhpeuh kiban tup ziahziah, mitkhu bawk aw, nak siluang aw, dip hum a awn kheeikheei aw dim keei ta. Numeite zong kihumsam mat kipei, amai uh kiphuai khutcin ma san hek-hak geuh, puteekte nangawn ciangkhut tawh kisat ta…..Cingno nak heh lua, meeting sabuai tungah kah to, a nik a khuk ciang lemto, a veilam khut tawh a kawng len a ziatlam khut tawh mipi kawk gawp, awng beba… ngaih lua mipite bang a sam uh van lamah kituungto keei liang …..)
CINGNO: Thu kikum se kei leng a kilemzaw, thu kikum thei nailo minamte hilel hangin kikum nawn lo ding ….. na IDOL uh lah neih zo pak kei nucin, Kham leh ngun piak kullo, sum bei kul selo a, ama nuntakna hong pia a, a khawnkhong HEHPIHNA HOTKHIATNA hong pia Topa Jesu mah um lel ni-in a nungta PASIAN bek mah thuman takin bia zaw ni ei. “Zogam leh Zomite Topa Jesu adingin” (Nakpi takin a tangko veva khit teh) “A thukim tengin khut lam”
MIPITE: : “TAKKHEH, TOPA LEH A GAM ADINGIN”
(A vekpi un khut lam kik uh ahih manin idol vai buaina veng ta hi.) Sia Do Khup
Comment piaknop aomleh...