UNHCR vai thuthak: Chin State sungpan Refugee te 2019 kumbeidongbek UN Card tawitheiding

UNHCR vai thuthak: Chin State sungpan Refugee te 2019 kumbeidongbek UN Card tawitheiding

Tuni Wednesday (June 13) ni in Community Lianson Unit (CLU) te makaihna tawh Malaysia UNHCR huangpisung aom New Building Conference Room ah Meeting kinei hi.

Hih Meeting pen “Chin Community Based Organizations (CBOs)” ci’n Chin State huamsung aom kipawlna tuamtuam ahi ZAM, ZRC, CRC, ACR, FRO, DAI cihte leh Fellowship makai, Pawlpi makai, Khua makai cihtebek atuamngiat in akisam ahihi.

Myanmar gampan in Refugee gambel in aom minamdang Myanmar Ethnic Group tuamtuamzong tampi om himahleh, Chin State huamsung aom kipawlna tengbek atuam vilvel in UNHCR te’n Meeting asap uh ahih manin, bangthu om hidinghiam ci’n ki lunglut mahmah hi.

Tualeh UNHCR Officer te’n anuai abangin zumvai thupulakna hong neikhiamawk uhhi.

Chin State huamsung pan gambel Refugee khempeuh pen 31 December 2019 ciangbek UN Card tawikhuan kipiading a, tuakhitzawh UN Card tawikhuan omnawnloding, Renew ki bawlthei nawnloding cimawk hi.

Hihpen Chin State huamsungpan mikhempeuh 31 December 2019 ciangbek Refugee in ki ciamteh laiding, tuakhitzawh Refugee in kiciamteh nawnloding cihna ahihi. Hihpen Chin State Refugee khempeuh tawh kisai ci uh a, tuni akipan 2019 kumbeidong Myanmar gamsung ciahkiknading in ahun kha 18 sung hongki piahi ci’n pulakkhia uhhi.

Abeisa in aki buaipih mahmah 2013 Card tawite, 2013 kumma Card tawite cihbang in kikhenna bangmah omtuam nawnloding a, ahi zongin Card Renew khempeuh anunung penpen 31 December 2019 ciangbek Card Renew kibawlsakding cihi.

31 December 2019 khitzawh UNHCR zumpi in Chin State pan Refugee tepen buaipih nawnloding, tavuan lanawn loding, amautawh kisaina omsak nawnloding citamawk hi.

Tua ahih manin 31 December 2019 khitzawh UN Card tawikhuan aomnawnloh banah Chin State Refugee tetawh kisai in zato vai, sangvai, kimat kihenvai khempeuh UNHCR tawh kisaina bangmah omnawnloding ci uhhi.

Chin State Refugee tepen Myanmar gamsung aciahkik hunding tuni akipan kha 18 (kumkhat leh alang) ahun apia uh hi a, tuakhit ciangin aciahnuam te ciah, aciahnuamlo Malaysia gamsung ah aomsuak teitei nuamte omthei a, ahi zongin UNHCR tawh bangmah kisaina omnawnloding citamawk uhhi.

Hihvai pen tuni UNHCR Meeting ah Officer te’n agenkhiat hi a, Chin State sungpan Refugee gambel te’n atheihkim mengmeng nadinguh lunggulh uh ahih manin, asawtlo in kikhopna biakinn tuamtuam ahzong Pastor te’n agen kawikawisak nadingun kivaikhak uhhi.

UNHCR Officer te’n Chin State sungpan Refugee te Myanmar gamah bangmah buaina lianpi omlo in ciahkiktheilel cihzong hongthei uh a, tungsiah panin thukhentatna aomsa bangin Malaysia UNHCR Officer te’n zaksakna hong neikhiata uh ahihi. Asawtlo in Community kipawlna tuamtuam pan makaite leh Fellowship biakna makai te’nzong mipi tungah hihvai tawh kisai in akicianzaw in zaksakna hongnei khading uhhi. Sawltak #zomidaily