Tedim Khuapi Huam-a USDP’ Guul-lungtang

Tedim Khuapi Huam-a USDP’ Guul-lungtang

Sanggamte,
2015 Kawlgam Kiteelna vaai internet-ah zaanggam vaai hitaleh khamhgam vaai hitaleh kigelh zihziah-a, Kawlgam sung-a Kawl gammite-a kipan a-Zomi mahmah-zong amau’ panna ciatciat-ah pang gipgep lel-uh, kuakua-in bangbang gen taleh amaan leh akhial khentel theihna, khentel ngamna, khentel-a amaan zuihna cih lungsim limlim a-omlohlam kilangh mahmah-hi.

Tumah-a kithuzaaktuahna pan-in:

Laaitui Khua-ah (amin gelhdah ni-in) saangsia aseem naute khat-in ZCD-tawh hunbawlna-ah hunzeek panmun nana la-a, aziingteh Tedim-a Myone thuneite’ kiang pan-in theihngawhsakna (warning) pia-pah giap mawk-hi. Myone thuneite USDP’ salkhawi vive hi-a, hih-pen thuneuno khat hi-in, apualam-ah akigen ngamlo thuneihna-tawh lauthawn-a kumpite’ ukcip kiteelna suak kha-mawh loding dinmun ahihi.

Atung-a thu-tawh kizuui-in, Chin minpua limlimbel Zogam-ah gen vetkei ni-in, NLD leh ZCD te-nih bek thuneihna-tawh lauthawnna azanghlo party kinei cihna ahihi. ZCD I-cihteh amimal-a kilemlohna: Pu Cin Sian Thang amudah, Pu Gin Kam Lian amudah amimal-in I’ om phial zong-in minam I-cihcih ZOMI-ah I’ luangkhawm takpi-hiam, Zomi gun/vun asilh, asung-ah Chin veve I-hihiam cih hong kilat nading thupiang (event) lianpi-khat I’ maai-ah hong kikhung himai ta-hi.

Kumpi’ party, kumpi’ khutzat party, Laimi’ naakpheh party cihte-ah I’ hun minute khat piakding nangawn naakpi-a apaammaih ahihi. Tua party min-tawh kuangluui I’ mipihte pilzong pil kha-mah ding-a, hau-zong hau kha-mah dinghi, ahizong-in amau’ hauh behlap nading lel-tawh mipi I’ buai khaak lohding naakpi-in ngaihsut-huai mahmah-hi.

Kiteelna-pen cidam leh siangtho tak-a alawhcin ding lamet a-om khollo kawmkaal-ah hih hunhoih lammanpha liantak-ah namdangte-in “Zomite luangkhawm mawk veh-e” ci-a mitmuh-in hongtheih nading, ei mahmah-zong “kiphiilphiil kawm-in luangkhawm thei mawkmah vehang-e, bang kihtaakding om ahia” ci-a thasaan phatkiik nading akigen zolo hunhoih ahihi.

Siamna (skill), muhlehtuah (experience) tampi neih khitna, hauhna leh phungcinnate mitsuan masalo-in, ahi-liiliai pimah, Zomi-ah luangkhawm lehang, minam makaaite vaaihawm siamlo-in alamzing dik hongzuih keileh alamzing maan pulaak, thusung, innkuan thukum-in kikum, kipuahto, pangkhawm, tua hileh Zogam-ah akua namdang-in thu hongnei thei tuanding hilo-hi.

Gensa mahbang-in zaanggam-ahzong NLD-in ngah henla, gaalkaap kumpi-in thuneihna piakhia phial mahleh-zong Zomite’ lametna tuazahpi-in hong kisot hathat peuhmah loding muhsa-a koihding kisam-hi. Federal Union agenpi DASSK bek hi-a, ama’ thu bek-tawh akalsuan theilo ding-in Kaw-Hmu Kuam-ah meékuang luuisak lelmawk-hi. Mualmite’ theih gige-pen “Federal Union cih kammal Kawlmi limlim-in Separatism-in ngaihsun” cihthu ahihi. Tua hileh Zogam mualdawn pan-a minam-ah luankhop nading sang-in NLD I-cih phanphan tepawl ahimahding ahihiam cih I-theitel pahding uhhi.

Minam ciat-in amau’ minam minpua party ciat-tawh hong ngahkim henla, tua MP khempeuh leh Amyotha MP, Nationalities MP teng-tawh hong kikop lehzong “Federal Union” 60%-zong hinaai lohi. Democracy-zong Myanma Nii, Myanma Hann acih bang-in Myanma Nii, Myanma Hann Federl Union khawng-zong honghi mawklo dinghi. Tuaciang-in akitom ngam Wa, Kachin, Shan, Karen cihte honghi ding-a, amau’ thautang leh sisan ziak-in Self-determination khawng hongngah phialle-uh ei peuhmahbel ahicipi kihi tosuak lelding dahhuai mahmah-hi.

Zomi gun (skin) asilh-a asilhbek teng-in suahkhiat vet-in aneek-in nana ne-ciat, lungtang thagui ciangdong nana luutsak kimciat henla, bangbang apiang zong-in ZOMI-ah luangkhawm peuhmah photphot lehang Zomi abawl Pasian-zong lungdam kha-mawhlo ding-in lamen hihang! Deihdaan akidanleh akibat nading haanciam ciatni!

Zomi Pasian’ Thupha!

Zokhai