Tedim Khuamual Vaidawnna Talsuan Khuampi

Tedim Khuamual Vaidawnna Talsuan Khuampi

Tedim khualutna Saimual ah khuamual vaidawnna khuampi khat kiptak khauhtak kilamin kizo ta cih i zak manin leh a daalngo lim zong mukha i hih manin lungdam mahmah hang. Khuapi a lawm, hong khuapisuahsak thu khat ahih manin angtang kipak hang.

Lungdam i hih manin a nuai-ah lungdamna thu i pulak ding a, tua kawmin lunggulhna thute zong tawmno khat kalhelh nuam hihang.

1. Kawllai gelhzia a maan ngahkha i hih manin lungdam hang.

တီးတိန်မြို့ကကြိုဆိုပါ၏ leh တီးတိန်မြို့မှနှုတ်ခွန်းဆက်သပါ၏ cih pen Kawllai gelhzia a maan ahih manin lungkimhuai hi. Hih က leh မှ vai, Kawlte ngiat mipil pipi mah in a zatkhialh theih zel uh hi a, Kawllai a maan kep ding zat ding a deih Kawllai a siam mipilte’n a gengen uh teh a maan a kitheikik, a kizangkik hihtuak hi. Ei zong tu-a dan mahin zatsiam sawm ni.

2. Myanmar gam ahih teh Kawllai bulphuh pen ahi ding mah ci ni. Ahi zongin Tedim khuamual vaidawnna khuampi cih buang, talsuan ah Zolai kammal tawm kicing lai deuh leh deihhuai peuhmah hi. “DAMMAW” cih ciang bek hilo-in a tawmpenin khua min TEDIM cih ngiat tuang veuvau leh kilawm mahmah ding hi. Suan sawm lehang kumpi in zong hong phal lo samlo dingin um ing. A khuampi kiptuak khotuak ahih manin i lungdam a, talsuan laigual ahihleh laih kikkik theih lel ahih manin vaisaite in nong ngaihsut ding uh lunggulh hang.

3. Zolai zat ding i gen teh muhna toi vai lua i sak leh zong mailam ah gamdang mi khualzin khawng hong pai ziahziah ding cih muhkholh khualkholhna beekin kum leh tuipi maitang pan a sanna cihte gelhna ah Manglai zat-huai mahmah hi. Tedim, Chin State cih khawng dawksak ziau bek leng zong Zolai, Manglai a kihelsa hi pah hi. Hong geelpha dih un.

4. Khuampi kilamzia vai ah a khuam a zawl a taute limtak kiptak a kimaihsa ahih teh tuate ahi bangbang hi phot henla, a zepdan ahihleh geelphat-huai leh kilawm hi. Cimeel (colour) nam tampi kizang napi i mit ah lem zo taktak lo hi. Cimeel zatdan lepphat-huai a ci nuam hi hang. Gentehna pakin WELCOME leh DAM MAW (a langlam ah GOOD BYE leh MANGPHA) pen dau lua, mual lua, kilang lo lua hi. A kang tungah a naipak i zat mawk pen zong deihna dang khat om phial hiam cihnop-huai liang hi.

More: Thuthak tomkim ~ The Tedim Post (26 Sep)

5. Manglai “welcome” pen a kizoma kigelh kammal khat bek ahih hangin Zolai “dam maw” pen kammal khat hilo, dammaw hilo, dam leh maw a kihal ahih manin khuam pang ah mal khatta-in i gualhsukna ah DAM leh MAW kikal tawm beek halhuai hi.

Mawhsakna hilo, phunsanna hilo, hicileh a hoihzaw kha tam cih lunggulhna tawh lungsima suak bang siangtak pulakna hi. Lungdam, Pau Lian Mang