Singapore ah inntungkhuh sikkang zattang in Solar kizangta

Singapore ah inntungkhuh sikkang zattang in Solar kizangta

Singapore gamsung ah tukum May kha akipan khuasung mipi te omnading in akilam Public Housing Blocks te ah Solar Panels inntungkhuh vive kithuahding hi ci’n Housing and Development Board (HDB) te’n Friday ni in genkhia uhhi.

Inntungkhuh sikkang zattang in Solar Panel “Solar-ready roofs” zatsawm uh a, tua Solar te panin Electric meitha piatheiding ahih manin Energy tampimah phatuamsakding hi.

Tukum May kha khitzawh in alamthak uh Public Housing Blocks tepen Design athakzawdeuh ahih manin, Solar Panels tezong athuahdan lemzaw, baihzaw hi ci’n Press Release ah khahkhia uhhi.

Public Housing Blocks te ii atungkhum ah tuikholna Water Tanks, Water Pumps, Lift Rooms cihbang Essential Services te akizatkhit banah, mun awng 400 sqm tabang omlai ahih manin tuate ah Solar Panels vive athuahsawm uh ahihi.

Abeisa kumte ah akilam Public Housing Blocks tepen Solar Panel athuahdan lemtaklo in, Block khatah Solar Panel akithuahsak ciangin ni 40 sungbang hunbeithei hi.

Ahi zongin tukum May kha akipan akilamthak Public Housing Blocks tepen Solar-ready Roof ci uh a, Solar Panel athuahzia baihzaw in, ni 25 sungin inntungbup ki thuahkhinziau theita ci’n HDB te’n genkhia hi.

Tukum August khabei ciangciang Public Housing Blocks 18 te ah Solar-ready Roofs dingin kibawlkhin cihi.

Related: India gamsung aom Railway Station 7000 te ah Solar kizangding

Zogam ah Solar Panel khat neizoleng, sunsung in Battery kituanthei in, zanciang in meivak kitangsakzo a, nuam kisakhop mahmah hi. Inntungkhuh sikkang zattang in Solar Panel vive zangzoleng, nitangtha panin Electric amawkna in akingah hithiat dending hi a, nopmahmah dinghi. Tuani ciangin….. Sawltak #zomidaily