TBA Tagah sang (TBA Orphanage Center) ~ Khup Khan Thang

TBA Tagah sang (TBA Orphanage Center) ~ Khup Khan Thang

TBA Tagah sang (TBA Orphanage Center, 1994) a kiphuat zawh kum 25 bang hong cita aa, tua hun sungah hamsatna tampi Pasian in gawlzawhna hong pia himah leh, lungkimlona a tuamtuam zong hong om tham hi. TBA in Department neu khat in nei hi. A kiphuat zaw kum 4 zong cingtak nailo in, siate pawl khat leh thu-um mi pawl khat in a min Child Care Center in khek ding hong hanciam pah aa, 1998 kum TBA GC (Rev. Cin Kam Chair person) meeting ah thu hong kisung pah hi. A hih hangin a inn lamte (Donor) deih a min, TBA Tagah Sang (TBA Orphanage Center) khekpah buatbuat ding makai pawlkhat thukim zo nailo in, kikhek lo hi.

Ahizongin, min khek nuamte taa tuanlo in, min khek ding nahanciam toto uh aa, 2011 kum TBC Triennial meeting Teeklui khua ah, gualzo tak in, Child Development Center ci-in, tua Tagah Sang min na khek uhhi. TBC in zong Department khat in nei hi. Tua Tagah sang simlo Child Development sep maban nei zo tuan samlo uhhi. Kum 2002 in, Paletwa Township PinChaung khua pan in, khetawh ni 11 pai-in, Khumi naupang 3 hih Tagah sangah hong om uh hi. Tua pan Tan 10 azawh uh teh, mi 2 Laisiangtho sang zomsuak aa, tu-in, Khumi lak ah Pastor sem uhhi. Ih hamphatna ah ei Zomi te’n, eipau siam Khumi pastor nei ihhih manin, Chin Zomi dangte sang’in, Paletwa Gam Khumi sungah, itna thuneihna ih nei zaw hi.

Banghangin TBA Tagah sang (TBA Orphanage) ki lam zenzen hiam cih thu a thei nuam zong om kha ding ahih man’in, Email tungpan kong khahkhia hi. A thu sau lua ahih ciang attachment tawh kong khah khia zaw hi. Topan a sim mi khempeuh Thupha hong pia ta hen. Lungdam. Khupkhan Thang Taithul (Norman, Oklahuma, USA.)

TBA Tagah Sang (TBA Orphanage Centre) – (The Then TBC Tagah Sang; TBC Orphanage Centre) [At Present TBC Child Development Center]

Pa Khup Khan Thang leh Nu Ciin Man Niang te nupa in Tagah naupang te kep nading innpi khat (TAGAH SANG OR TAGAH BAWDA) lamding lunggulhna nei uh aa, TBA General Secretary Rev. Thang Go Khup tung tawn in, TBA General Council tungah, TBA huangsungah tua Tagah Sang inn a’lam theih nading ngetna lai August 11, 1994 nimit tawh Singapore khua pan in, na khak uhhi. TBA pan phalna a kingah khit ciang in, 1994 November kha in Tagah Sang inn ding Pa Khup Khan Thang in gel aa, a lim (Drawing) Taang Go Sawm Khup suaisak hi. Adung asauna pi 64, avai azaina pi 16, Verandah pi 16×4 leh innpi tawh kizom pi 16×10 azai anbuk khat; atung inndawl pi 16×16 innpi dawl 2, Brick Nogging nalam uhhi.

Hih Tagah Sang lam nading veina hong kipatna in hibang ahihi. 1978 kum kiimpawl, Nu Ciin Man Niang Thaang- kai gam Theenzang, Kahgen, Vongmual lam sazian sit in a va pai kawikawi ciang in, a kem ding a khoi ding omlo Tagah tampi te leh tualniam naupang te a va muh ciangin, tua bang naupang te a’ding social wel- fare khat phuatsak zawh na ding veina (Passion) lainatna (Compassion) hong nei hi. Hih bangin apualam pan panpihna leh huhna aom kei leh hih naupang te in, a khang akhangin hihbang mah in piangkik piangkik “Tanta ya le” lel dinghi cih ngaihsun kha hi.

Tua ban-ah ko baangkua sung mahmah ah zong ka upipa Kham Khan Mang in tano 4 nusia in leh ka nau Hang Khan Khai (Ekhai) zi Vung Lam Cing in tano 4 mah nusia in, 1991 kum in vangam ih Topa Zeisu angsung hong zuausan tak ciang un, tagah te khoiding kemding in Pasian in hong deih hi inteh cih veina (Passion) hong khan semsem hi. Bhutan gam pan Ka UNV contract ka man’ khit ciang in, Singapore khuapi zuan in, Construction Engineer nasep ka kipan aa, khol sunsun sum teng tawh 1994 ciangin Tagah Sang inn lam ding a kipan ka hi uhhi.

Hih Tagah sang inn lam ding leh tagah te kemin pattah ding ka ngimna uh a bulpi in; Ei Zomi te in meigong tagah te huh ding kemding leh pantah ding ihcih sang’sek in, ih paunak mahmah in “Tagah kikhual kum in vanpi a zangkawh” na ci sawnsawn hi. Tagah te zong ihgen ciangin hehpihna veina kammal zangh lo-in “Tagah lubawk” te ci-in simmawhna leh neu-et na tawh ihsam sese hi. Khuasung vai thuleh la lak ah ih hel kei aa, aomna mun tawh kizui-in “Meigong, tagah, daipam” te ci-in ihlo sawnsawn lai hi. Tua ahih ciangin, ei utthu leh iitel hilo, meigong, tagah naupang te ihkhua ihtui ah, mimal leh mipi te’n ih society ah eite mahtawh kibang in mihing hamphatna, (Human Right) liangko kikimna (Equality) a ngah theih nang’ leh ihsimmawh neu-et loh ding lunggulhna hi pha pen hi. Exo 22: 22-24, Deut 10: 18, Deut 24:17, Is 1:17, Ps 68:5, Ps 146:9, Prov15:25, Jer 22:3, James 1:27,

Hih Tagah sang inn lam ding ka ngaihsut nate uh, 1994 kum sia Dam Suan Mung (Mungtawng) U.S. pan hong ciahlam, Singapore hong baan ciangin, Bedok ka inn vuah hong hawh aa, Tagah sang lamding veina kaneihna uh kuppih na khat zong ka nei uhhi. Sia pa in zong a mah mimal mahmah tagah ahihna leh tagahte veina, tagah te kepna inn lamding hancianna a neina thu zong hong gen aa, Swedish te huhna tawh Yangon khuapi huamsung (Greater Rangoon) ah leitang acre pawlkhat lei-in, Tagahte pattah ding a sawmna te zong hong kumpih hi.

Tua bek thamlo, tutung California State khuapi khat ah, Sia Chin Do Kham in, Korea te kikhopna biak inn khat-ah thu genin; Ko kiangah Kawl Phonggyi te in a sang inn ah Zomi tagahte kaikhawm in, anvak, nikten puansilh pia in, leh anu apa te uh antang pia in a ta te uh ngenkhia aa, Phonggyi sang inn ah omsak hi. Kawl te biakna Buddhism tawh pantah uhhi. A hizongin tua nau pangte in a kimawl kawm un taakkung dawn khawng pan in, “Na thu sungah nop sa ing” cih la khawng sa vang vang veve uhhi. Cih agen leh tua Korea pawlpi te’n tua kikhopna hun sung in, sumpi huhna hong dongpah uh aa, dollar tul thum val hong ngah pah uhhi cih thu zong hong gen hi.

A hih zong in hih ko hanciam tagah sang in, midangte kiang pan huhna ngen aa, lam ding cih ngaihsutna hilo zaw hi. Eimah leh ei, pawlpi mi, thu-um mite in, eimau hanciamna (Self support) tawh lam leng, meigong tagah te, veina, lainatna leh ei neihsa ahihna, (Passion, compassion and ownership) kinei zaw ding aa, sauveipi kimaang (Sustainable) zaw dinghi cih ka-ngaih sun zaw uhhi.

Tuabekthamlo, hih tagah sang naupangte sang kongpi kikhak ciangin, a khua lam-ah ciahsak nawnloin, sangkhak sung kivak nading khutsiamna, (အသက်မွှေးဝမ်းကျောင်းပညာ, Vocational), masonry, carpentry, mechanic, puankhui, siamgat, an huandan cih te sinsak ding zong gelna ka nei lai uhhi.

1995 kum March kha ni 10 ni-in, TBA leh CMBC sia teng leh Pu La Cin Khup te baangkua sung ulenau, tuleta teng tawh inn lamna ding mun ah, Mun aapna Thunget kikhop na khat bawl-in, innlam na kipan uhhi. Innlamna khem peuh Pu La Cin Khup in maakaih hi. Tua Tagah Sang Inn pen Brick Nogging in kilam hi. 1996 kum March kha sungin, Rev. Dr. Simon Pau Khan En maakaihna tawh kibawl Tedim kampau, Tapidaw sia khempeuh Khawmpi hun sung; March kha 12, ni-in, Rev. Dr. S Pau Khan En in innpi kong honna hong neihsak aa, maakai siapi teng in, Sanginn anungta Pasian tung apna hong neih sak hi. Tua hunpha ki bawl khit ciang in, Lawibual veeng Pu La Cin Khup inn ah kipai phei in, lungdam kohna ki khop hunkhat leh lungdamkoh ankuan umkhop na zong kinei suak hi.

Tua innpi lam bek hilo in, naupangte vanzat ding aphamawh; lupna, delphah (Mattress), puanbuu (Quilt), lukhap (Pillow), anhuanna uum leh beel, ankuang ankeu (Utensils), naipi (Wall Clock) akim-in, leisak lai hi. Electric mei zong laksa hi. Tui khol nading tui- bem (Reservoir) khat, numei pasal ekbuk zong lamsak hi. TBA in anhuanbuk khat lamsak hi. TBA in Tagah Sang Committee khat phuanin, Department neu khat in koih hi. TBA sia te leh TBA Tagah Sang Committee te in, Biakna le Upna, Minam le Kampau, Khua le Tui, Beh le Phung, Numei le Pasal deidanna omlo; nu’ le pa’ a sikhin tagahte, apa-in sihsan aa, a’nu pasal dang neihsan tagahté, anun’ sihsan aa apan’ zi-nawn neisan tagahte cih bangin, khatna, nihna, thumna khenin tagah naupang, numei 14 leh pasal 19 agawm 33 natel uhhi.

1997 Sang kong honciang-in naupang teng, tua Tagah Sang Inn ah om kipan ta uhhi. TBA in tua naupang teng ompih ding in Sianu Dim Don Vung tavuan pia aa, leh annhuan sakding Pu Thang Thawn Pau cialsak hi. 1997 kum Singapore pan innlam ka ciah un, naupang te puan ding Chinese Methodist Church te piak ippi nih puak in, leh ceiling zong kabawlbeh sak lai hi. 2000 kum ciang in numeino te hong golta ahih man’in, kisil buk ding Pa Tuang Gin Mang tung huhna ngetsak in kilamsak hi. Tualo a’nengneng phawkkhak pakloh tampi omlai ding hi.

Tedim khua ah inn khat lam nading aa ka kaikhopsa, sing leh suang ban ah, inn siikkaang teng zong tua Tagah sang-inn lamna in ki zangh pah hi. Inn aa mawtawpi leh Hilux tawh Kawlpi pan, sing, cement, van puak tha man teng leh mimal thaman teng kituat lo hi. Thu leh la ciapteh nang’ laibu pi khat leh sum leh paai ciapteh nang ledger bupi khat Singapore pan in ka puak uhhi. A detail aa tuatna aomloh hang, hih vai tawh kisai-in, Singapore Dollar S$ 15,000.00 kiim (Tul sawm le nga kiim) tawmpen in, bei dingin kituat hi. Tua hun in sum khekna S$ 1= Kyats 166.00 kiim ahi hi.

Hih TBA Tagah Sang in Khamtung gambup ah a masa pen Tagah kepna Sang-inn ahihi. Hih Sang-inn ah Tagah naupangte a ki omsak maa, 1996 kumpawl in, Lawibual vengah, Rev. Zam Khan Thang leh Sianu Man Khan Niang te nupa in, innsap in Tagah sang nahong uh hi. Ahihhang sawtvei zomsuak zolo uhhi. Tua hunpawl mah in; Sakollam veeng ah Sia Kai Cin Mang tenupa in, innsapin, Tagah Sang na hong uh aa, Sia Suan Za Lian (Phaiza) tenupa in Tahan ah Tagah sang na phuan uhhi.

Rev. Go Za Nang te nupa (azi Kam Khan Man tawh) in zong Kawlpi, amau pawlpi huang sungah Tagah Sang na phuan uhhi. Sianu Rev. Ngiak Za Dim inzong Thuklai khua ah Tagah kepna khat na phuan hi. Hih Tagah Sang tengin, Pateh (Mushroom) bangin kum khat sungin hong po ziazua uh hi. A hizong in, TBA tagah sang in 1994 kum akipan planning tawh hoihtak kivaihawm hi aa, a masa pen Tagah Sang-inn mah hong hi veve hi. A piandang na khat ah, hih Tagah Sang a phuan nupa (Couple) te, leh sianu in taneilo, tatawilo vive ahi uh hi.

Hih Tagah Sang kilam zawh kum 3 zong cingtak nailo in, TBA sia pawlkhat leh mi pawl khat te-in, naupangten “Tagah Sang naupangte” or “Tagahte” cih kammal tawh kilawh/kisap nasa lua (Feel) uh cin, naupang te a’ding kithukhual sak leh kiveeisak khem in, a min TBA Child Care Centre a, laihding/khekding na hancian uhhi. A taktak in, a innlamte min a’mangh nading ngaigsutna hi zaw hi. 1998 kum, December kha sung TBA General Council Meeting sungah zong TBA Tagah Sang min khek ding vai kikupna khat ki nei hi. Rev. Cin Kam Chairman sep ni khat hi aa, kei mimal in zong ka vah kah thei hi. Kei Tagah Sang-inn a’lampa veina (Passion) leh amin ka phuahna ahang hoihtak kagen ciangin, TBA GC in, a’min khekloh ding thukimna thukhensat na hong nei uhhi.

Singapore pan USA lam ka pai maa, 1998 kum November leh December kha sung, Yangon leh Tedim ah huhnuam saupi ka nei thei uhhi. Tagah naupang teng tawh zong ki kholhkhopna, ki mai-ngapna hun tampi ka nei zel uhhi. Sianu Don Ngaih Vung leh U.S pan hong ciah sia Pau, hong pai in, la tomno khawng hong sasak in, video hongzaih ziahziah uh hi cih lungdamna khawng hong ko uhhi. Tua mahbang in, adang Singapore pan hong pai sia Pau zong hongpai in video hong zaih cih lungdamna hong ko lailai uhhi.

Keizong bang deihna bang ngimna tawh, banghang hih naupangte tua sia te in video nazaih uh hiam? cih Sianu Dim Don Vung kadot leh a man’ zong thei keng hong ci hi. Tua semsem ciangin, tua bang video tawh kuan’ bang metbawlding, bangteng sem ding cih kitheilo ahih man’in, kei zong kalung hong patau pianpah aa, TBC Tagah Sang Committee phalna ngahlo or theihpihna omlo in kuamah in, hih Sangnaupang te Video azaihsak lohnang ka gen hi. Tua bang thu taangkona Signboard khat zong, Zolai, Kawllai Manglai tawk ki-at khat kei ipsung sawkin kabawlsak aa, TBC Tagah Sang ah kasuang sak hi. 2013 kum Tedim ka ciah kikpak uh ciangin tua signboard na om nawnlo zel hi.

Hih naupangte nek le dawn ding; anteh theipuam, mehgah mehteh, antang sathau besan saseh etc…, silh le teen ding: niikteen puansilh, pilsin nading: laibu laikung, apia milmal, pawlpi, kipawlna tuamtuam leh UNICEF etc…, gamdang pan, Zomite biakna pawlpi tuamtuam pawlkhat, mimal etc… tung lungdamna hihtak ah kiciamteh hi. Naupangte laitheih nading adeihsak Tedim Laisiangtho sangpan volunteer laihil siate zong lungdamna kicianteh hi. Tua tagah naupang te khuaneu pan hong pai uh ahih mah bang in, Tedim sangte ah alaisin te uh zuizolo uh hi.

CMBC siate leh Pawlpi hanciam natawh, Myoma Primary School leh Sakollam No.1 State High School te-ah hunval laihilna (Tuition) kikah sak hi. Myoma Primary sangah hunval kah Tagah Sang naupangte ei Zomi a sia te-in, sangnau pang dangte mahtawh kibangin sangsap (Tuition fee) na’kila hi. Sakollam No. 1 State High School aa kah Tagah Sang naupangte, a siapipa, U Mung Kio in sangsap (Tuition Fee) namaap hi. Tua Sang siapipa in Thantlang khuami ahihi.

2002 kum in, Paletwa Myone, Palewa khua pan tai 57 a gamla, Pinchaung khua pan in, Khumi nau pang 3, Nan Shwe, Tun Naing, Thein Lwin te, hih TBC Tagah sang aa om dingin, khe tawh ni 11 hong pai uh hi. Nan Shwe, Tun Naing te in, tan 10 azawh ciang in, Tedim Theological College kah suak hi. Khumi sungah Biakna sia sem uhhi. Tu-in Paletwa gam Khumi lak ah Zomi te-in, Mission a nei ih suak hi.

Ahizong in, TBC Tagah Sang min khek nuamte taatuanlo in hancian veve uh ahih man’in, 2011 kum Tedm Baptist Convention (TBC) Triennial Meeting Teklui khua ah, tua TBC Tagah Sang min, Child Development Centre in na kilaih hi. Tua min khek nuam te in a min ding ngaihsun theilo uh ahih man’in, Rev. Smith Ngulh Za Thawng na dong uh aa, siapa in thunung thumaa theilopi hih ding hiam, a min ngaih mahmah “TBC Child Development Centre” na phuak hi. Banghang in, hih TBC Tagah Sang TBC Child Development Centre tawh khek nahi uhhiam cih ka kan ciang in, Rev. Smith Ngulh Za Thawng phuah ci in amah mawh kipua sak hi.

2015 kum March kha Tedim kapai ciangin hih minkhek vai tawh kisai sianu Dim Don Vung leh sianu Nian Ngaihh Niang kiangah kalung kimlohna ka gen hi. Amau zong sia dang teng kiangah na gen in, kikupna khat na’ nei kik uh aa, TBC Tagah Sang mah cih kik ding in ka khensat kik uhhi cih hong zasak uhhi. A hihzong in tuciangin officially laipai te, kamgenna te ah TBC Child Development Centre mah kici veve hi. Veina (Passion) lainatna (Compassion) kikimlo ahih man’in hici theimah inteh ka cih hi.

Tuhun ciangin Tedim khua sung bekbek ah zong, gamdang pan huhna dawh leh Pawlpi te huhna tawh kithuahkhawm, Tagah sang thum leh li bang ombeh lai hi.

Bangbang ahizongin, tua naupangte lakpan in, 2002 kum in Thang Kim Mang in tan 10 laihuan hong zo hi. Tu-in Nyipyidaw ah ki-ukna zumpi ah lai-at sem hi. Kap Suan Khual in Thuma Engineering College pan in B.E Civil degree hong ngah in, tu-in, Tonzang Township Municipal Engineer sem hi. USA gam-ah Zam Sian Khual Fort Wayne, Indiana, Thang Cin Suan Baltimore, Mary Land, Thang Khaw Mang Mary Land, Thang Sian Lian Tulsa, Oklahoma hong tung uhhi.

Vung Lam Cing a innkuanpih te leh anau Dal Sian Muang tawh Ottawa Canada natung uhhi. Australia gam tung zong pawlkhat om ci hi. Tagah sang aa, a gilo pa a kici pa in, Aizawl ah Bus hawl hi. Hih tagah naupang te in, akhua atui ah mi simmawh mi netniam ding te hihmah ta leh TBA Tagah Sang hong tunguh ciang in Topa Pasian in laamsang in Thupha pia aa, a’ khangual te hong ban in, taan kim’ uh hong suak hi. Jehovah Pasian in hih TBC Tagah Sang kemin cing tawntung ta hen. Amen.

“Pa” “Nu” ci a hong sam ding sungsuak ta (Biological Child) ka neih loh uhhang’ hih naupang teng in “Pa” “Nu” mah ci tangtang in hong sam uh ahih man’in ko nupa a’ding angtang, lungdam, lungkim, lungnopna leh “Kha” lungmuan na hong neisak hi.

Behlapna; Rev. A. Gin Za Vum (Dimlo/Yangon Sanchaung) in lawm, singkeu suak ding, sing tampi singhing a suah hi cie hong ci aa, hi kasa mahmah hi. (Sept. 3, 2019 Norman, Oklahoma, U.S.A.) Khupkhan Thang Taithul – Norman, OK 73072, U.S.A. (405) 409 0536 January 2, 2017