ZAM Thupuak :: 21 Jan 2018 (UNHCR Meeting tawh kisai zaksakna)

UNHCR Meeting tawh kisai zaksakna

January 18, 2018 (Thursday) 10am – 1:00pm dong UNHCR Conference Hall ah kumthak a ding a khatveina UNHCR leh Gambel palai te kimuh khopna kinei hi. Dotna donna leh thu tuamtuam Program Officer, CLU, OPI, RSC/ UNHCR vaisai ulian ten thugenna hong nei uh hi.

1. Senior Program Officer a hi Margarida in thu kong honna leh numei te thapiakna , kipawlna sung ah numei te tawsawn a mainawtsak ding pulakna leh refugee sangnaupang 50% bang sang kahlo a omte sang a kah theihna ding nu le pa leh kipawlna Makai,biakna sia te thapia in sangah khak sawm ciat ni cih te hong zasak hi.

2. OPI tawh kisai: A beisa kum mahbangin OPI in nong report na uh tawh kizui in camp ah vavehna cih te a a kisam bangin kikhelna omlo in kivan lai hi cih hong gen banah refugee te a UNHCR Card No.: a theilo tampi om ahihmanin a ID No. uh limtak a ciapteh ding uh thupi mahmah cihzong gen beh lai hi. UN Card No. a theinailo na om uh leh tumahmah in ciamteh by heart / lotngah pah un.

3. FRAUD tawh kisai: min kitaih I cih tawh kisai a leng khin a om hiam cih dotna tawh kisai in Officer te in a leng mimal zah a genloh hang lengmah hi cih tawh dawng uhhi.

4. Appointment tawh kisai: UNHCR pan a ni kiciangtan sa UN te tawh kimuh nang vai na neih leh kipelhsak mawkmawk kei un, pai hamtang un cih zong limgen hi.

5. DHS tawh kisai : February khasung hong tung ding in ki lamen a ,kal thum sung bang hong sem ding in gelna nei hi. DHS ahih leh a mau tangthu tawh kisai a hihman in a nunung / a masa ding pen bangmah kigen khol theilo hi ci uh.

*** Zomite tawh kisai – UNHCR vai, Ausi vai, Sangvai, Mat leh hen, nasep cihte a kipan vaikhat peuhpeuh na neih leh UN zum na pai ma in ZAM zum ah hong kuppih phot in. “ Sialtat nung a Sialdai kai cih pen ih khialh nonloh nang cihna hi.”

ZOMI NAM NI 2018 A DING NGETNA LEH LUNGDAM KOH NA

Malaysia a om Zomi ten kumsim a i bawl den i minam ni sawtloin hong tung ding hita hi. Abeisa kumte mah bang in tukum zong thupitak leh picing takin bawl theih na dingin 08 November 2017 in ZAM zumpi ah kimuh khop na kinei hi. Tukum zong nopcitak leh picingtak a i bawl zawh na’ng sum leh paai tampi hong kisam ahih manin ih septheihna ciat pan lawptak apang khawm liailiai dingin muanna lianpi tawh Zomi Nam Ni Committee kong zawn uhhi. Zomi Nam Ni adingin sum leh paai tam pi mah kisam a I pankhop ngeina bangmah in tutung zong Khua kipawlna te panin RM 200 leh biakna Pawlpite panin RM 300 tawh mapang khawm dingin I kizawn hi.

Zomi Nam Ni fund zonna in Lucky Draw zong kibawl a, khat ciang in RM 10 tawh pawlpi tuamtuam ah kila thei hi. Ih Mi Nam Ni pawipi bawl theih nading fund zonna ahih mahbangin a kua maciat in hanciam in la tangtang ni cih ih kizawn phapha hi.

• 1. MLPP Pawlpi RM300
• 2. Phunom Innkuan RM200
• 3. Vongmual Innkuan RM100
• 4. ZEM Pawlpi RM300
• 5. Mualbeem Innkuan RM200
• 6. Darkhai Innkuan-Malaysia RM200
• 7. Cikha Khua RM200
• 8. Tuilangh Khua Kiawplna RM200
• 9. Lunmual Khua Kipawlna RM100
• 10.  Ngalzang Khua Kipawlna RM200
• 11. ZAC Pawlpi RM300
• 12. Ngennung Khua Kipawlna RM100
• 13.  Tuidil Khua Kipawlna RM100
• 14. MZCC Pawlpi RM300

Zomi Cup 2018 GROUP KHENNA LEH MEETING KINEI DING

Zomi Nam Ni pahtawina kumsim i neihden Zomi Cup ki mawl hun ding hong tung ding hi leuleu ta hi. 2010 in Team (8), 2011 in Khua (19), 2012 in Khua (26), 2013 in Khua (40) Team (41), 2014 Khua (43), 2015 in Khua (32), 2016 kum in Khua 25, 2017 kum in Khua 22 bang kipha hi. Hi bangin Khua tampi tak kipawl khawm in Zomi khangno sungah kilawmtatna picing takin i neikhin zo hi.

Zomi Cup a (9) veina Group khenna pen 22 January 2018 (Monday) ni sun nai 1:00 in ZAM hall ah kibawl ding ahih manin Zomi Cup-2018 a kihel ding khempeuh in tua ni in pello nong pai kim nangun ih kiza sak khol hi. Min sazian a pianuam te in : 017 379 1327

2018 ZSM LAIBU KINGAH TA HI

Malaysia zomi Genvai Kipawlna (ZSM) 2018 a ding ki lut theita a, ZSM laibu te zong kila theita hi. ZSM lut man mi khat ciang kum khat ai RM 20 hi a, hih na lutnahang tawh ahamsa a dong tuak I mipih te a panpih, a dah a kap hun ah a khitui a nulsak na hi gige hi. Hih ZSM ah member na lutna in nang a ding a pia na hikei a, panpih na a kisam te a panpih na hi zaw hi. 2017 sungin zong tu ciangciang Zomi pih te luang (22) lei ah I tuh theihna in nang leh kei I pankhopna hang ahih manin 2018 ah zong mapang khawm dingin kong zawn phapha uhhi. ZSM a ding panpih na zong kipia thei a, mimal, Khua kipawlna leh Pawlpi mintawh ki pia thei hi.

ZSM ading Pawlpi, Khua & Mimal a panpih na hong pia te

• 1. Mualnuam Khua Kipawlna RM200
• 2. Zam Sawm Thang (Suangpi) RM50
• 3. HCCF Pawlpi RM350
• 4. Myanmar Mission Church RM300
• 5. MBF Pawlpi RM300
• 6. Shalom Christian Fellowship-KD RM300
• 7. Mualbeem Innkuan– Malaysia RM200
• 8. Chanthagyi Khua Kipawlna RM100
• 9. ZEM Pawlpi RM500
• 10. Zomi Adventist Church Malaysia RM300

Kidawm Kidawm! Care and diligence bring luck

Buipi leikeei in zong khuangai cihte na nuntakpihni pen na khantoh kipatni hi. Warning ih kipiak nak leh thusia alang kipelh hi, acih mahbangin, Ngalulok bang a ka inn kalo pek ning VS mi kidawm, thukhual, thu khinkhai mite nuntakna pen tonglehlaam in kikhai hi. Ih innsung ih vengsungah Malaysia Minthang OPRASI hong tunloh nading kingaihsun pha ni.

UNHCR VAI MIPI TAWH KIMUH KHOPNA KINEI

19-01-2018 (Friday) ni 10am-1pm dong Pudu veng, Senthang biakinn ah mipi te tawh UNHCR thuthang vai kimuh khopna ICC makaihna tawh kinei hi. ICC- (Independent Chin Community ih cih ZAM, ACR, CRC, FRO,DAI, hih community 5 ki pawlna UN te hong lawhna min hi. Hih kimuh khopna tungtawn in mailam ah Topa’n a hoih pen lampi hong gelsak nangin thungetna ah zong phawk ciat ni. USA pan a kisam Mr. David (Chin TV Media) a om sungin UN vai mipi a ding haksatna sungkhia nuam ing, kasep theih om intehna cih leh hih namuh phetin hong zasak in.

MERCHANTRADE VISA PREPAID CARD ZAM Ah KIBAWL DING

Merchantrade Visa Prepaid card pen 24 January 2018 (Wednesday) ni-in ZAM zum ah kibawl thei ding hi. A bawlnuam khempeuh in ZAM ah hong zasak pah un. Phone No. ‎03 2142 6659. May bank leh CIMB bank ah kithun theinailo ahihmanin Merchantrade Center te ah ut hunhuh in nang tawh a kinai pen na munah kithun thei hi. Chines New year khit pawl ah Petrol pump leh 7/11,leh KK, cihte ah sum thun theih dingin ngimna zong om hi. A zatdan, sumthun dan a tello ten ZAM ah hong zasak un. Hih Merchant Trade lim na muhna mun peuh ah sum kithun/ top up thei hi, na kihilh sawn un.

ZAM ZUM AH THUNGETNA KINEI

Zomi’ Taangmi Thungen Pawl, 13-January 2018 (Saturday), Pasian nasem te tungah genzawhloh lungdamna ih pulaak hi. Zomi bup ading ZAM zum ah Khathak nipi 2 Saturday sial in thungetna ah nongzong nong kihel na dingin itna tawh kong zawn uh hi.

UNHCR Card Rejected Ngahten ZAM Ah Hong Paipih Un

Ginneihlohpi a UNHCR ten reject na/ San zawhlohna lai hong piak leh ZAM ah hong paipih un. ZAM a hong kipuka khempeuh Card No.,UN No. leh hih lim / Picture te limtak hong kikepsak ding a, khasim in UN leh a kisai na munte ah kizasak kawikawi ding hi. Hih lim a na muh bangin na min, man/phot,leh UN card No. atuanna card pen meihtu/ copy limtak kem in , munkhat peuhah mawk nutsiat ken. Ih deihkikna a om kha ding hi. Na UN ID uh nadeih hunhun a na ettheih dingin mun kician khat ah kem un. Hih tawh kisai natel kei leh ZAM zum ah hong pai in.

WELCOME TO ZAM

Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang nading un itna lianpi tawh kong zawn uh hi.

PALAI TE KHASIM THUNGET KIZOM

ZAM palai te khasim thunget khopna kizom to a, NCA pawlpi kem Sia Kam Tawng in hong makaih hi. Siapa in zum nasep na tawh kisai feedback piakna leh Pasian kammal tawh thapiakna hong nei a, Malaysia om Zomi te a dingin thunget khopna zong kinei hi. Topa’n siapa hong zang semsem lai tahen.

KIMAT KIHEN NA TUAK LEH : Zomi te kimat kihen na tuak uh leh Sia Tuang Pu 016 254 4093
Sia Go Mang 018 202 1216

TUKAL SUNG PALAI TE BUAIPIH TE

• 1. Peter Khan (Saizang) HUKM
• 2. Thang Suan Mung (Pyidawtha) Kajang Hospital
• 3. Thang Gin Mang (Phaiza) HUKM
• 4. Khup Thawn Ding (Ngalbual) HKL
• 5. Hau Za Niang (Muizawl) Tungshin Hospital
• 6. Dim Nuam Cing (Tedim) Subang Clinic
• 7. Zo Sian Ngai (Thalmual) UN zum ah
• 8. Do Sian Tuang (Tuisanzang) UN zum ah
• Zato lam tawh kisai in vai khat peuhpeuh na neih leh Contact : Sia Khuppi 011 3563 2059 Sm CiiCing 0111 282 8482

ZAM ZUM AH HONG HAWH

Vangteh AG pawlpi kem siapa Rev. Thang Khen Mang-Laaitui in Malaysia hong zin sungin ZAM zum ah hong hawh in thungetsakna hong nei ahih manin kilungdam mahmah hi. Topa’n siapa a thupha tawh hong tuam semsem tahen.

ZOMI TE A DING NASEP

Kuchailama

• ah Nu mei 1 ki nawh deih hi.
• Office ah sem ding. Nasep hun-9am to 6pm
• Omna pia-Anpia lo. Offday-Every Sunday+Public holiday Khasum-Basic Rm-1600+Commission om.

Wanutama CenterPoint

• ah Kitchen ah Pasal 1 ki nawh deih. Nasep hun-7am-7pm, nai1 khawl
• Omna pia- Anvaak. Khasum-Rm1300

FOOD COURT Kotadamansara

• ah Numei 2, kinawh deih hi. Cashier 1- Tui Fiau 1
• Nasep hun- 10am-10pm =khawl hun om
• Kha sum –Rm1200 tawh ki pan ding Omna pia-Anvaak. Offday-Kal 1 Khatvei Off

ZAM Thupuak PDF File >>>

• NSK-MARKET ah Nasep kinawh deih hi.
• Banngi ah Ngasa suak na ah nasem ding mi 6 kideih hi.
• Taman Lenseng ah Ngasa/Voksa zuakna ah Mi6 kideih
• Sunggaibuluh ah Meh-teh meh-gahzuakna ah mi 6 kideih hi. Nasep hun- 8am-8pm, Khasum-Rm1400,tawh kipan ding. Offday- Kal1 Khatvei Off. Omna Pia- An Pialo

Western Food-Bukit Bintang

• ah numei (3) kideih hi.
• Khasum 1400, Omna pia, ann pia.
• Nasep hun nai 11 sung hi ding hi.
• Kal khat khat vei ta off ding hi.
• Nasep tawh kisai :Sia Khuppi – 016 3838 014, 01135632059

LUNGDAM KOHNA

1. Sanga (Suangsang) RM50

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi danin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hongpia tahen.