Thuthak tomkim ~ The Tedim Post (22 Aug)

News In Brief: Thuthak tomkim ~ The Tedim Post (22 Aug)

Rakhine gamah Covid-19 natna ngah 22 ki behlapna hangin Sittwe Township a om mipite in vak khiat loh ding (Stay at Home) thukhun zuih dingin Cidamna lam thunei ten tangko uh hi.

Myanmar gam sungah COVID-19 natna lungno khat ahi aki lawh baih mahmah lungno pen gam pua lam pan hong ciahte tungpan kimu ahih manin mipite kidophuai mahmah hi cih Cidamna lam tawh kisai thunei ahi Dr. Zaw Than Tun in mipite tungah gen hi.

2020 kiteelpi ah mee pia nuam gampua lam a om mipite in mee apiak kholh theih nading in Embassy ah form 15 tawh a siau mimal 109,000 val phata hi, cih thu kiza hi. Mee sazian ah min kihel loh manin form 3 tawh a siaukik gampua lam a om mimal zong 1,000 valta hi.

Myanmar gam Kumpi in December kha dong COVID-19 hangin sumlut tawm tuam ahih manin meisum kha khat in unit 150 manta hong peng sak uh hi, ci in meilam tawh kisai thunei ten tangko khiatna nei uh hi.

China(Sen) gamah guahtui tamluatna hangin August 18, 2020 ni-in mipi 100,000 val bang munsangna lam ah kikhin uh hi, cih thu kiza hi.

Africa Nitumna lam Mali gamah galkap ten kumpi thuneihna la in a kumpipa leh Chief Minister pa uh a panmun panin khawl uh hi, cih thu kiza hi. Galkap lam pan kiteel thakna ka bawl ding uh hi, ci-in zong mipi tungah kamciam pia uh ci hi.

Japan gam Tokyo Khuapi ah khualum luatna hang tawh ni 9 sungin mimal 26 in sihlawh uh ci hi. A si atam zaw pen Kum 70 val vive ahi uh hi.

USA gam, California ah khuahun sat luatna hangin mun 29 ah gam katna piang a, Acres 120,000 val bang kang tum ci hi.

More: 2020 kum ih Zogam MP ding kua ihteel tam? ~ Thang Za Tuan

August 20, 2020 ni Leitung bupah Covid-19 natna ngah Tein 220 val(22,473,382), asi Tein 7 val (789,103) leh adam kik Tein 140 val (14,373,971) phata hi. Source : 7day news, , Eleven Media, The Myanmar Times, VOA Burmese, USA Today. Thukai khawm : Lia Lu Lun, Lia Shang Shang.