Tawh a kikalh lo Kongkhak ~ Job Cinpi
Tunnu Itna – Khuata daipam khat ah bang mah a nei lo nupi khat le a tanu a nuta un inn neu khat sungah teng uh hi. Inn sungah deihgawh theih ding van a om loh hangin a nu in nitak sim-in a inn kongkhak uh tawh bu thum bang tawh kalh bikbek den hi. A tanu adingin bang mah khantohna le kilamdanna a om thuah lo khata sung nuntak khuasakzia pen hong cimtakhuai mahmah ta hi.
A tanu in khuapi sung nuntak khuasakzia le khuapi sunga om mite thu Radio sung pan a zak a ngaihna tung tawnin khuapi sung a nop ding zia a mitkha ah a bawl ciangin khuapi sung ah teen ding lunggulh semsem hi.
Ni khat a tanu in ngaihsut khat hong nei a, zingsang a nu tawh ma-in khuapi sung zuan dingin a nu ihmu kaal-in a nu inn sung pan hong gelkhiasim ta hi. “Nu aw, hi banga ginalo na tanu na sung na lai pan pinag ngei lo hi ci-in na ciamteh mai in”
A dahhuai thu ah khuapi sung nuntak khuasakzia pen nungaknu upmawh le ngaihsut hong bang lo hi. Ommuan-in siatna lam a manawh hong suak ta hi. Siatna sung pan suakta zo nawn lo zah dongin buaina le siatna in a nawk gawp tak ciangin a mawhna hong kiphawk kik a, ahi zongin a nu inn pan a pai khiat zawh kum sawm bang hong val khin zo ta hi.
Khuapi sungah a om ding hi zo nawn lo ahih manin lungsim kitamzantakin a pianna khuata lam zuan-in a nu inn ah ciah dingin hong kithawi hi. Nitak khuamial zawh ciangin a pianna khuata hong tunga, zual vang kawm pan meilah tang a kimu a nu inn hong galmuh ta hi.
A nu inn a galmuh tak ciangin amah le amah a khialhna kiphawk semsem ahih manin ka nu in hong sang zo lai tam maw ci-in lunghimawhna tawh a nu khiang zuan-in hong ciah hi. Inn kong a tun tak ciangin kisuanna lianpi tawh “Nu aw” ci-in kingkhak khat vei hong k eu hi. A nu in dawng lo ahih manin a nih veina “Nu aw” ci-in kongkhak keu leuleu hi. A nih veina kongkhak a keuh lian leh lamdang a sak mahmah ding thu khat hong piang hi. Kuama hon loh-in kongkhak hong kihong khia hi.
“Nitak sim kongkhak tawhkalh ding khat vei zong a mangngilh ngei lo ka nu in bang hangin innkong khak lo ahi tam.”
Kong a kikhak loh a tanu in lamdangsa ahih manin kongkhak pan-in inn sung a et tum leh sual tungah guhtui kang dek liangin a gawng giugeu a nu mu hi. Delhpha kician mel zong nei loin a vot dekdak sual tungah lu le taw a cing khawm lo dial pan khat silh-in a ton khiukheu a nu a muh tak ciangin a tanu zong ki-ip zo nawn loin kap khia hi.
A tanu kahna aw a nu in a zak ciangin a mit damtak-in hong khia a, a nuta un kipom-in kap khawm uh hi. A kipom khawm uh mahin a tanu in, nu aw bang hangin kongkhak tawhkalh lo na hiam ci hi. A nu in, tunu bek a kalh lo hi keng, kongkhak ka kalh loh zawh kum sawm val bang pai khin ta hi. Inn pan na pai khit ni a kipan nong ciah kik ding hun lametna tawh khat vei zong kong ka khak nawn kei hi.
Bang hun ciangin ka tanu hong ciah kik tam ci-in nisim-in nong ciah ding kong lamen den a, kum sawm val bang a pai khit hangin ka lungsim sungah zanni mah tawh kibang kasa hi, ci-in a nu in dawng kik hi.
A nuta un a kiho khit uh ciangin a tanu zong ama lupna khaan sungah lut hi. A lupna khaan sung a tun ciangin a nu in amah bang zahtakin lamen-a ngakngak hiam cih tel zaw sem lai hi. Inn pan a pai khiat ma hun lai mah bangin a siangtho ding le a etlawm dingin a nu in a lupna khaan sung nisim-in puahsak den hi.
Hih thu pen Mat-suh-cian laibu sungah Nay Lin Oo in gelh a, kaimah Job Cinpi in ka Zomipihte ading deihsakna tawh kong let kik ahi hi. Tua ahih manin deihna kician nei lo, ngaihsutna thak khat zong hong pia zo lo ahih khak leh zong a gelh masate a siam lo ahi kei dinga kei a let kik pa a siam lo ka hi zaw ding hi. Job Cinpi (Zomi Laisim nuamte)
Comment piaknop aomleh...