Geel geel tu gipgiap ~ Evan. Suangh Dal
Ka neu lai vua, ka nu in taangthu ong gen: Cing Khup a sih khit teh a omna misi khua ah Ngam Bawm hawh zel ci. Ngam Bawm in a om nading sawlbuk no khat lamin a innka ding dolkungno khawng phuk mengmeng-in gual phei tiltel mengmeng ci. A sawt teh Cing Khup in u Ngam Bawm aw, i zia kibang thei mahmah kei in, hong si phot in ci. Ngam Bawm zong a inn ah ciah-in a lupna tung pan a teipi a kam sungah a zum lamin kia suk sakin si hi ci.
Tua ciangin a kha misi khua Cing Khup kiang va tung pah-a hih innpi, hih dolcialte kua lam hiam a cih leh Cing Khup in na nuntak lai-a nangma lam teng lian bek mah hi ei U Bawm aw, Nangma lamsa teng mah hi ei, U ci hi, ci.
Tulaitak-a i sep ziau, i gelh ziauziau, i gen ziauziau teng mah hipah pah-a, geel geel-a sepkhiat ngei loh teng kiciamteh ki record thei lo hi. Vantungah thamanh ding zong tua cileh, ka tua cih ciang, mai kum ciang, ka hauh ciangh, ka pil ciangh, ka genban nawn het loh ding ciangh, thupha ka ngah leh, Thi ထီ (lottery) ka pauh ciang, tansawm ka on ciang, B.A, M.A, M.Th, Doctor, Ph.D, ka ngah ciang,
inn manh teng ka piak zaw uh ciangh, mawtaw manh teng ka loh zawh uh ciangh, zi ka neih ciangh, pasal ka neih ciangh, ta tua zah ka neih ciangh, ka kum hong tam leh, leh leh leh, khua hun hong hoih ciangh, ciangh ciangh ciangh, etc., cih pekpekte hi loin tu-a na sep bangbang, nasep zahzah, na piak khiat zahzah teng bek mah a na kiciamteh pahpah, kha mattan (မှတ်တမ်း) a na kiten pahpah hizaw cih thu…
Lottery Thi (ထီ) pauh leng – Thiထီ pauh lecin bek sem ding naih cianga a pauh (ပေါက်) lo na hi
Kawlgam hong hoih leh – Kawlgam hong hoih leh bek a sem pan ding hi mawk naih cianga hong hoih ngei lo aive, cih khawng.
I geel geel teng hi loin i sep suk pahpah teng bek mah a kimang ahi hi. Geel lopi a sem gawp ding cihna lah hipah lo. Ngam Bawm in zong a sep suk mengmeng teng bek mah a mu kik ahi hi. Tua ahih manin tua na geelna hoih te sem suk giapgiap ngam lecin bangzah ta-in hoih zaw kan lai ding hi lo ahi hiam? Geel geel tu gipgiap lo e! Evan. Suangh Dal
Comment piaknop aomleh...