Tangval ki phasak khat tangthu ~ Thawn Tuang

Tangval ki phasak khat tangthu ~ Thawn Tuang

College a kah tangval khat hong ki phasak pianpah hi. Mawtaw zong Sport Car hong deih pianpah hi. A pa in a tapa deihlam thei gige hi. Ahi zongin a tapa college hong man kumin pa in Sport Car leisa in koihsak sitset hi. Ahi zongin a tapa theisak nailo hi.

Tangval ki phasak pa zong sang a manni(Graduate ni, boih ngahni) hong tungta hi. Ka pa in ka mawtaw deih hong leisak ding hi cih lam-en mahmah hi. A pa’n a tapa a laisimna inndei sungah samin, hih bangin ci hi. “Nang bang tapa kong neih khak hampha kisa mahmah ingh. Angtang mahmah ingh,” ci-in a tapa a it, angaihna te hong gen hi. Tua khit ciangin a tapa khut tungah hoihtak-a kitun sitset bung khat letsongin pia hi. Tangvalno pa in zong bang hi peuhmah ding hiam cih theihnopna lianpi tawh tua letsong hong en pah hi.

Tua leh savun tawh hoihtak-a kituam, a tungah tangvalnopa’ min kham meel a pua laimal (embossed in Gold) tawh a kigelh, Laisiangtho bu khat amuh ciangin a tapa hong lungkia mahmah hi. A heh hong suak lua mahmah hi. “Pa, nang’ sum tampi nei napi kei ading Laisiangtho bu khat bek hong pia ding maw” ci-in tua Laisiangtho nusia-in inn pan hong taikhia hi. Kum tampi sung mun dang khat ah om in hong lawh cing hi. Mihau khat hong suak hi.

Hun hong paito in a pa si cih a zakteh a tai khiatna inn ah hong ciah hi. A pa laithupite hong zongin kum tampi lai-a a nusiat Laisiangtho bu hong mukik kha hi. Khitui takkeuhkeuh sa-in Laisiangtho bu hong leem hi. Tua laitakin Laisiangtho bu sung pan tawhtang (mawtaw tawh) khat hong kiakhia hi. Tua tawhtang tungah card neu khat zong kikhih a, a zuakpa’ min zong kigelh hi. Tangvalpa’ deih mahmah sports car zuakpa min ahihi. Tua card tungah a graduate ni zong kigelh-in ‘SUM KIPIA SIANG KHIN’ (PAID IN FULL) cih zong kigelh hi.

Tangvalpa in kei ka Sang manin ka nu leh pa neumuh in ki phasak kha ing aa, ka nu leh pa deihsakna tel khalo kaive maw ci-in hong kap khia hi. Ka nu leh pa in ki lung tuaktak in ka tapa in Lai Siangtho hong simsak nuam ban-ah Pasian zahtak in ka ki phat hetlo ding cih hong deihsak aive maw ci-in thu hong phawk khia hi. Tua ni a ki panin Lai Siangtho simsim in ki phasak nawnlo in Pasian thu sungah nopsakna ngahlawh hi. Ki phatsakna in man neilo ahihna leh Lai Siangtho lungsim takpi tawh a simte ki phasak ngeilo hi cih hong mu khia hi.

Man a ki piasa Mawtaw pen Lai Siangtho sung a etloh manin Tangvalpa adingin Mawtaw tanlawh ban-ah a ki sik hangin man neih nawnlo hi. Gup ngahna ding man hong ngenlo Zeisu in hong tatkhiatna thu Lai Siangtho bangin i nuntak keileh a man neihlo mihing ki hi thei hi. Lungdam, Thawn Tuang (Nashville TN USA)