Taiwan ah huihpi guahpi hangin mi 1 si, adang mi 2 mangciplai

Taiwan ah huihpi guahpi hangin mi 1 si, adang mi 2 mangciplai

Northern Taiwan ah zanni Friday ni in huihpi leh guahpi kithuah in nawkgawp a, khuasung lamzikpi te luitawh kibangliang in tui dimzihziah cih AFP pan kiza hi. Hih khuahun siatna hangin mi 1 in sihlawhkhin a, adangzong mi 2 bang mangciplai kici hi.

Nai 11 sungin guahtui 600 millimeters in buaksuk zuahzuah ahih manin, inn leh mawtaw tampi tui in tumcip hi.

New Taipei City pen ahuaisiat penna mun hi a, tualai ah Rescuers te’n siluang khat mukhia uhhi. Tua asipen numei hi a, Motorcyclist khat hiding in ki ummawh hi.

Taiwan National Fire Agency te genkhiatna ah hih khuahun siatna hangin aliamzong mi 5 bang omding ci uhhi.

Guahtui tamlua mahmah ahih manin, khuasung lamzikpi te tungah tui dimgawp in mawtaw hawlte’n mawtaw te nusia in taisan uhhi. Lamzikpi tungah mawtaw leh tui dimcip hi.

More: Taiwan ah pasal khatin avengte muhna ah asanggamnu ngawng tansak

Taiwan gamsung alengding Local leh International Flights zong akigawm in 258 bang ki Cancel khin hi ci’n Taiwan Aviation Authorities te’n genkhia uhhi. ZD Sawltak #zomidaily