Sweden, Stockholm khuapualam ah Bomb puakkham, mi 1 si, 1 liam

Sweden, Stockholm khuapualam ah Bomb puakkham, mi 1 si, 1 liam

Sweden gam ii Capital khuapi ahi Stockholm City khuapualam aom Metro Station khatah apuakkham omin, mi khat si a, adang mikhatzong liam cih AFP pan kiza hi. Sunday ni in thupiang hi a, hih buaina pen migilo te ngongtat sawmna “Terrorist Attack” hiloding hi ci’n Police te’n genkhia uhhi.

Police Spokesman Sven-Erik Olsson in agenkhiatna ah kum 60 gualpawl papi khatin leilak panin vankhat atopleh tua vanpen puakkham cihi. Tuaciangin amanlang in zato ah kipuak a, ahi zongin siveve hi.

Adang numei kum 45 aphakhin khatzong hih apuakkham hangin amaiteng liam hi ci’n Police te’n genkhia hi.

Hih apuakkham pen Sunday zingsanglam in Sweden khuapi ii apualam aom Huddinge, Varby gard station ah apuakkham ahihi.

Police te’n tua apuakkham apianna munteng hoihtak in omcippah uh a, Bomb zonsiam Bomb Squad te’nzong adang apuakkhamthei van aomhiam ci’n zongpah uhhi.

Expressen and Aftonbladet Newspaper te genkhiatna ah tua apuakkham vanpen khutlot Bomb “Hand Grenade” namte hiding ci uhhi.

Technicians te’n hoihtak in akancian, a etcian laitak uh hi a, koipan bangci bangin thupiang cihpen genkhiattheih omnailo cihi. Tuaban ah hih apuakkham vanpen asipa leh aliamnu te ngimna tawh aki puakkhamsak hiloding hi. Migilo te gamtatna Terrorism zong hiloding hi ci’n Police Spokesman in genbeh hi.

Ageinai ah aomkha khuasungmi khat ahi Milorad Jencic in agenna ah hih thupiang pen kamit tawh kamukha a, ki lauthawng mahmah hi. Abeisa 1990s leh 2000s hunsung inzong hihbangdan tuahsiatna ki nawkkha ngei hi. Khuasung migilo “Gangs” te gamtatna hiding hi. Tuabang migilo te adaicip khinta in akituat hi a, hihbangin hong gamtatkik uhpen lamdang kisa mahmah hi ci’n genkhia hi.

More: Thai ah Myanmar nupi khatin kum 7 aphapan atanu sikkhau tawh khihcip

Sweden gampen European Country lakah migilo Criminal Gangs te’n Hand Grenade alimzak penpen gamkhat hi ci’n nungkum in aki khahkhia Swedish Police Report tungtawn in kiza hi. Tua Hand Grenade te pen Yugoslavia gampanin alut kici hi. Abeisa 2016 August khasung inzong Gothenburg Area sungah Hand Grenade hangin pasalno kum 8 khatin sihlawh hi. Sawltak #zomidaily