Vondeih Kep Ding – 23 (Pau Khan Kap)

Vondeih Kep Ding – 23

Kong it Tawngno,

“ Pa aw, nong laikhak leh nong sum khak na ngah ung.” Ka nu in na pa kiang ah, “lungdam mahmah ung cih na gen lai in,” cih laigual tomno na gtalk panin nong nusiat in ka lung hong nuam tuam sak mahmah hi. Banghang hiam cih leh mi pawlkhat te in gamdang pan in innlam sum khakkhak hi napi-in inn lam te’n a ngah khit uh ciangin bangmah zaksak kikna thu gen kik nawn lo ahih manin a khak te pen lung patua giauguai sa-in om sak den a, ahi zongin no tua dan hilo in hong za sak kik tangtang hi uh teh!

Na pa ka lung patauh ding a lung hi mawh tawntung na nu mahmah tung ka lungdam a, na nu cih bangbang in lai hong khak nang tung ah zong ka lungdam hi. Khanglui te’n, “ Nu leh Pa thu mang, a nahlawh peek,” ci hi.

‘Nidang hun khat lai-in, Saaipi khat leh Zusa khat Lei khat tung ah hong ton khawm uh ci hi. Tua leh lei a kan khit uh ciangin Zusa in Saai’ kiang ah, “ Zawl, eite nih taktak in lei i kan khop taktak ciang, a kipuk lo bek mah hi mawk ei, ling damdam liang,” ci se hi.’ Tawngno, hih tangthu tom mahmah na pi-in leitung mite nuntak zia hong lak khia hi. Na pa’n hih ka sim khak ni-in abei sa hun a ka tuah ngei khat ka phawk kha kik hi. Hong gen leng:-

‘ Malay ah ka om lai-in ka nasep na gei ansai ah eimi te khat in zong nasem hi. Sun ka khawl hun uh kituak ahih manin innlam thu peuh ka kikum khawm thei zel uh hi. Ama’n gamvak ka uuk ci-in, a Vom mat, a Sai mat khawng hong gen in sabet uuk lo ka hih hangin zaknop ka sa mahmah hi. Ahi zongin US ka tun ciangin a khuapi pawl khat te tawh kimu in, “ Na khuapih Pa Lian ( Thang Kap Lian ) na paukhankapthei na vua, ko Malay ah kilim kholh peuhmah, a Saai mat khawng, a Vom mat khawng hong gen ciang thau kap zong siam leh kilawm sa’ng,” ci-in ka va gen leh, “ tua pa’n tua dan a hong gen maw! Ama mat hilo pi, amah an a huan sak ding a a zui bek hi ei, ko mutpu ci hive ung,” hong cih sak lel tak hi.’

Zusa dan mi leitung ah a na tam mahmah na hi mawk ei! Ke’n hong thugen te um takpi hiveng.

Tawngno, thu hong kigen khempeuh um khin gai pah ken la, sang khin gai pah pah keng. Na pa dan in dangnal khat peuh, a ciaknuam mikhat peuh um kha ding hi teh!

Na it,
Na Pa

April 30, 2014
Columbus, OH