Surprise ~ Zomi Quavadis
Lungdam takin ka it mahmah ka zi tawh innah ka ciah uh hi. An neek kuan ciangin ka nu zum kah hong tunga, a kithawi sungin ko nupa in sabuai ah neek ding teng ka koih uh hi. Ka zi pen Zomi mah hi a, ahizongin Zopau in pau thei lo hi.
Ka nu hong lut a, ka zi in na nohset pah a, Mangpau tawh na hopih hi. Ka nu in en guauguau hi. Tua ciangin kei khiangah “Hih maw na zi? Kua mi ahia?” ciin hong dong hi. “Zomi himah!” ciin ka dawng hi. “Zomi hibuang Zopau in pau thei lo cih bang! A bangcia hibangbang inn sungah hong ciahpih na hiam?” hong ci leuleu hi.
“Nu aw, ka it mahmah ahihna tawh teenpih in hong ciahpih ka hihi. Tua ahihmanin ama theih Mangpau tawh kiho zaw ni!” ka cih ciangin ka nu pen nuam tuak het lo hi. Puam beubau in an ne a, “Hih pen Zomi bangkua sung ahihi. Zopau lo buang pau dang kizangh lo ding hi!” ci ziau hi. Ka dawng nawn kei hi. Ka zi in bel noptuaksa het lo hi.
Ankham kuan ciangin ka nu in, “Nitaak nai 7 ciang Ice-cream sai ah Ice-cream ne khawm ding hihang! Vai dang na hawm kei un” hong ci hi. “Nu aw, nai 8 ciang cizaw ni! Ko geelsa khat nei ungh. Ka nupa un va vaak pak nungin, tua khit ciangin ih innkuan in na cihna munah Ice-cream ne khawm ni. Hong sawt het lo ding hi ungh” ka cih leh ka nu pen heh lua kisa hong kap dektak liang hi. “Pah malam aw! Kei na nu sangin na zi thupizaw hivaak maw!” hong ci giap hi. “Hi kei veh aw nu! Hong theisiam dih ve!” ka cih hangin ka nu in kamkhat zong pau loin hong pai khiatsan ziau hi.
An neek khit ciangin ka zi tawh ka vaak khia uh a, ka hih ding teng uh ka man khit uh ciangin van pawlkhat leiin ka ciah kik uh hi. Ka nu in hong muh ciangin ka zi van tawi pen kawk in, “Ka tapa thalawhsa sum teng neektum sak sawm na hiam? Tu mahmahin ciah pah in!” ciin hawl khia hi. Ka zi in dawng vet loin khitui naptui tawh inn sungah lut a, avan teng kithawi pah hi. Kei zong ka nu naih phei pah in, “Nu aw, a bangci liang na hiam? Ka it mahmah ka zi pen banghangin ong hici bawlsiat sak mawk na hiam? Bang khialhna nei ahiam?” ciin ka dong hi.
“Na neihsa a ne tum ding bekin na zi hong pai ahihi…” ciin ka nu in thu tampi hong gen hi. “Nu aw, ka zi in tua bang lungsim nei lo hi. Thei nuam takpi na hileh tuni ka va vaakna uh vai hong gen ning. A masa in ka zi pen ei Zomi ahihangin a nulehpa in sihsan baih lua hi. Tua ciangin Mangkangte nupa khat in ta bangin kem uh hi. Zopau a theih lohna pen tua hang ahihi. Tua ciangin tuni ka va vaakna uh vai pen ka zi in naupaai hi.
Numei maw pasal cih a va en sak hi ungh. Tun na lungdam mahmahna ding khat om hi. Tua pen nu aw, tupa a nei ding na hi ta hi. Tua ciangin ka zi vantawi pen nang aa ding ahihi. Zingciang na Birthday, kum 56 na cinni hi. Tua dinga kong leisak uh ahihi. Hihte kong gen pah nop lohna uh pen nang adingin SURPRISE a suak sak nuam ka hi uh hi…” ka ci hi. Tua ciangin ka nu in, a khitui hong nuul a, “Aw! Hikhong maw!” kah aw tawh hong ciin hong kawi hi.
Tua khit ciangin ka zi khiangah va pai a, “Buahno aw, khial lua ingh! Nong maisak zo diam?” ciin va thuum hi. Ka zi in kap kawm mahin “Hong telsiam ingh. Hong maisak ingh nu aw!” ciin na dawng hi.
More: Nainganzi Ciamnuih ~ Zomi Quavadis
Tua khit ciangin a van guansa teng tawh pai khia dingin kithawi a, ka nu in a khut pan lenin “Ka tanu aw, koiah pai sawm na hiam? Hilai na inn hi. Hilai na ciahna ding mun ahihi. Nang tawh, ka tapa tawh, ka tupa tawh ih innkuanin ih omna dinga Pasian hong piak pen hih ih inn ahihi” ci hi. Tua khit ciangin ka nu in ka zi pom in nam a, ken zong amau nih kawi in ka nuta thum un lungdamna luankhi ka nuul khawm uh hi. Zomi Quavadis
Comment piaknop aomleh...