Malaysia, Johor ah Operasi lutin gamdangmi 514 kiman, Myanmar pawlkhat kihel

Malaysia, Johor ah Operasi lutin gamdangmi 514 kiman, Myanmar pawlkhat kihel

Malaysia, Johor Baru sungah nungkal Weekend sungah Operasi nasiatak in lutkawikawi a, gamdangmi phalna kician aneilo illegal akigawm in mi 514 kiman cih NST pan kiza hi. Zingsang khuavak madeuh in Operasi alut uh hi a, tua Operasi pen Codenamed “Op Gegar and Op Sapu” ci uhhi.

Malaysia gamsung Immigration lamsang ah alianpen ahi Immigration Department director-general Datuk Seri Mustafar Ali ngiatin makaih in, Immigration Officers bekbek akigawm in 115 Officers takin gamdangmi amuhkhempeuh bansik ngekngek uhhi.

Tua Immigration Officers te honkhat pen Putrajaya panin apaingiat uh hi a, Johor sung aom Immigration Officers honkhattawh ki pawlkhawm in Operasi alut ahihi.

Tebrau IV Industrial Area leh Kota Tinggi sung aom zintunbuk Hostels nihleh cikimek sakna Massage Parlours 5 sungteng aom gamdangmi nasem Foreign Workers akigawm in mi 1399 te thusitna kinei hi. Operasi pen zankim Midnight panin akipan hi a, zingsang khuavakma 4am hunpawl in mansiangpan hi.

Immigration Director-general in agenna ah thusitna aneih khempeuh lakpan in mi 514 te kimansuak cihi. Tuate lakah pasal 490 kihel uh a, numei pen 24 ahi uhhi. Matsuak athuakte pen Bangladesh, Indonesia, Nepal, Myanmar, China, Thailand, India cihbang gamtuamtuam panin Malaysia gamsung ah phalna kician neilo in nasep aguksep uh hi a, Immigration Act 1959/63 thukhun tawh akiman cihi.

Pawlkhat tepen Malaysia gamsung ah Visit in hongpai in omsuak, Overstay cihleh “Section 15(1)(c) of the Immigration Act” thukhun tawh akituaklo honkhat akiman cihi.

Tuaban ah Travel Document akician aneilo, Work Permit kician aneilo zong honkhat kiman ci a, akiman khempeuh pen avek un Setia Tropika aom Home Ministry Complex ah kipuak cih kiza hi.

Malaysia Immigration Department te’n “Rehiring Programme” cihkhat nei uh a, tuavai tawh kisai in illegal immigrants akigawm in mi 600,000 te’n Signed up hongbawl uhhi ci’n Mustafar in genkhia hi. Tuciangciang mi 150,000 tepen tua Rehiring Programme Process pen mansiangta cihi.

Tua Rehiring Programme pen 31 December 2017 ni ciangin ahun abeiding hi a, gamdangmi nasemte leh nasep aguan te (Foreign workers leh Employers) te’n amanlang in Register bawlmengmeng uhhi. Hih bawltheihhun Deadline pen kikhinto loding hi ci’n Mustafar in genbeh hi.

Tuaban ah E-card (Enforcement Card) akici abawlte zong maikum 15 February 2018 ciangin ahun abeiding hita a, tuatezong Rehiring Programme ah Register abawlkik uh kulding cihi.

Tuaban ah Malaysia gamsung aom nasepnei Boss (Employers) te’nzong Permit neilo illegal immigrants peuhmah nasep guankei uhhen. Tuabangin nasep aguan aomleh Immigration Act thukhuntawh kizui in liausum RM10,000 panin RM50,000 kikal ki liausak theihi. Tuabek thamlo in thongzong kumkhat ki kiasakthei a, liausum leh thongdaan zong anih in ki piathei hi ci’n Mustafar in Warning piaknazong neikhia hi.

More: Kuala Lumpur, Jalan Alor sungah Operasi lutin mi 440 kiman

Tuabek thamlo, thukhun zuilo Boss tepen aneihsa innlelo Assets khempeuh kumpi in laksakthei bekthamlo, Bank Account zong ki khakcip sakthei hi, tuapen “nti-Money Laundering Act” thukhunzui in akisemthei ahihi ci’n genbeh hi. Sawltak #zomidaily