Migina khat suahnading akisam thuthum ~ Dr. Do Suan Mung

Migina khat suahnading akisam thuthum ~ Rev. Dr. Do Suan Mung

Dinmun kician neihna
Pasian mai leh mite maiah migina khat suah nadingin dinmun kician neih loh phamawh hi. Danzila in kumpipa zu le sa tawh a pumpi a thaanghuai sak loh na’ng khensatna nei hi(Dan.1:8). Danzila lawmte thum in zong kumpipa bawl milim maiah kun loh ding na khensat uh hi. Sih a kul leh zong si zaw dingin khauh tak in ding uh hi. Nungzui te leh Tapidaw masate in zong mi thu sangin Pasian thu mangzaw ding ci- in lungsim khensatna nei uh hi. Pasian mai a miginate peuhmah in dinmun kician nei in tua dinmun sihpih ngam uh hi.

Tuhun teh mi tampi in dinmun kician nei meel loin a baih theithei, a nuam theithei zui uh hi. Mi a tam zaw paipaina peuhah pai lel uh hi. I phawk ding khatah migina kici peuhmah mipi tawh ton lozaw-in mipi tawh kilamdanna nei uh hi.Tuhun teh sangnaupangte bang in Pasian um ing ci napi laivuan teh midangte mah bangin etteh uh hi. Lai etteh pen guktakna hi a, Pasian maiah mawhna hi. Guktakna tawh tan 10 cih genloh B.A., M.A., Ph.D. keek i ngah zongin Pasian thupha kisang peuhmah lo ding hi. Pasian in degree sang neite thupha pia hi loin Ama deih banga gamtate thupha pia hizaw hi.

Sumbawl pawlkhat in zong Pasian thei lote nasepte mah semin Pasian deih loh, kumpi deih loh vante tawh sum zong uh hi. Hun tomno sung a hoih ding a bang khaphial zongin a tawpna ah mawhna thaman siatna ngah mah ki- at veve ding hi. A beisa hunah i muh theih ding tampi om khin ahih manin kidop huai, ngaihsut huai mahmah hi. Sangnaupang hi taleng, sumbawl hi taleng, kumpi nasem hi taleng, Pasian’ nasem hi taleng a maan banga nuntak ding thupipen hi. Inn ah i om a khual ah i om zongin, ei kia ihi a, milak ahi zongin, a baih a, a haksa zongin, a dik a maan a gamtat ding pen Pasian maiah migina hihna lianpen hi. Zawtahte, Danzila te, Modecai te Pasian in a laptoh pen dinmun kician nei-in a maan banga a nuntak man uh ahi hi.

Tupna neihna

Tupna i cih pen a kimu thei lo khat muhna, a up ngam huai lo khat upna leh a pang thei lo ding khat pian sak zawhna ahi hi. Migina suah nadingin tupna neih loh phamawh hi. Mizawng penpa i cih pen pya khat beek a neilopa hi lo a, tupna khat beek a neilopa hizaw hi. Mikangte in i tupna zah lang bang bek kitung na ci uh hi. Tua ahih leh tupna khat beek nei kei leng koi ciang i tung zen tam?

Zawtah in Pasian piak mangmatna tungtawnin ni khat ni teh milian khat suak ning cih upna leh tupna na nei hi. Tua tupna in haksatna tampi phul sak zo hi. Davuih in Goliath that zo ning cih upna leh tupna nei a, Pasian in that zo sak takpi hi. Joshua leh Caleb te in Canaan gam kila zo ding upna leh tupna nei uh a, amau gel bek mah Canaan gam lut zo uh hi. Elisha i Elijah zaluahpa suah ding tupna nei a, Elijah’ za luah takpi hi.

Pasian mizat D. L. Moody tan guk bek ahi hi. Pasianmizat lian suah ding tupna nei a, suak takpi hi. D. L. Moody z ah a Pasian mizat mi tam het lo hi. Moody a sih ding ciangin a ta te a lupna kiangah sam a, “Tate aw, Pas ian tawh na pan nak uh leh natupna uh lian sak un” ci-in vaikhak hi. “Pasian thu puakkhia sangmangte` Pa ” a kici India a Pasian` thu a puak masa William Careypen khedap khui ahi hi.

Hi Pasian mizatpa thubulphuh in, “Pasian ading na lianpi tum inla Pasian kiangpanna lianpi mah lamen ngam in” ci hi. Pasian in a tupna taangtung sak a, India gam leh leitung bupah Pasian mizatlianpi khat hong suak hi. Migina, mi thupi icihte in midangte muh loh mu-in, midangte tup loh a tumte ahi hi. Leitung thu ah zongtupnakician neite bek mah khuasuak hi. Tupna neite Pasian in nang gina kei teh, pil kei teh, siam kei teh cihet loin a ut, a tup bangun piang sak lel hi. Tua ahih manin Pasian muanna tawh tupna lian khat nei ta ni.

Hanciamna

Mi pawlkhat in tupna nei pongin ahi zongin a tangtunnadingin hanciam nuam lo uh hi. Hanciamna kihel lo tupna p en tupna hi loinsunmang hi lel hi. Sunmang matmat lel tawh kikhuasuak lo din g a, Pasian mai-ah zong mi gina kitang ngei lo ding hi. Nasep hanciam ding, thanuam ding, kuhkal dingpen Paunak Lai siangtho sungah tam veipi hong kihanthawn hi. T uhun teh piangthak dingpen “Dahpa Khuang” sa kha uh hi.

I luplupsa a khuang tum ziau ziau tawh i duh i deih teng in hong zuan naainaai ding bang khatin um leh gen mawk uh a, tua pen Laisiangtho hong hilhna tawh kilehbulh linlian hi. I biak Pasian pen nasep hanciam Pasian hi a, A tate zong tua bang dingin hong deih hi. Hamciamna om loin Pasian’ mai, mite’ maiah migina kisuak zo lo ding hi.

Abraham Lincoln suah ni khatin tadensa ah lim khat kisuai hi. Mualdawn khatah America kumpite’ teenna Innpi(The White House) omin mual bulah bukno sia khat om hi. Tua inn tegel kahlei khat tawh kizom hi. Lim nuaiah hih lai kigelh hi. “Kahlei tung kahin a dawn a innpi kitung thei lai hi. ahi zongin a dawn tun nading khua-ul tampi luan kul hi.”

Abraham Lincoln pen mizawng mahmah panin lungkia lo a a hanciamna tawh kumpi a suak ahi hi. Pasian muanna tawh a hanciam nuamte adingin hih leitung ah ngah zawh loh ding na khat zong om lo a, tun zawh loh ding mun khat beek om lo hi.

I gensa teng enkik pak leng: Pasian’ mai leh mite maiah migina suah nadingin, dinmun kician neihna, tupna lian neihna leh hanciamnate kisam hi. Rev. Dr. Do Suan Mung (Principal, FBTS)