Sum kimangsak S$45,650 aneipatung a apkikleh pahtawina mohthoh 2 bek kipia :-)

Sum kimangsak S$45,650 aneipatung a apkikleh pahtawina mohthoh 2 bek kipia 🙂

Thailand, Bangkok khuapi sungah mawtaw nungzui “Bus Conductor” khatin Bus sungah Backpack iptawh aki nusiakha sum lompikhat mukhia hi. Tua sumpen avekin akigawm Thai Baht 1.12 Million (S$45,650) tak hi a, aneipa kiangah a apkikleh pahtawina nektheih mohthohnihbek pia cih The Nation pan kiza hi.

Tua Bus Conductor asempen numeikhat hi a, kum 50 aphakhin Sumon Mathidol kici minnei khat ahihi. Nung Sunday ni in thupiang hi a, asummuh vaitawh kisai avekin Mueang Samut Prakan Police Station ah genkhia in, aneipa zong apkik khin hi.

Sumlom anusiakha pen nausuak siavuan Gynaecologist Doctor khat hi a, Racha District, Chon Buri vengsung pan ahihi.

Tua Doctor pa’n Sunday zingsang in sumlom ipdim in puakawm in, Samut Prakan’s Mueang District sung aom Bank khatah sumkhakding “Transfer” dingin apaikhia ahihi.

Si Racha panin Bangkok kikal Bus tawh tuang a, Bang Na Intersection atun ciangin Air-conditioned Bus No. 511 tungah tuangkik leuleu hi. Tua Bus sungah anungzui pen Sumon Mathidol ahihi.

Doctor papen Samut Prakan atun ciangin asum koihna thungip nusiakha in, Bus tungpan kumsukziau hi. Tuapan in Bank azuat ciangin asum koihna ippen atutna anuailian ah anutsiat khaklam phawkkikpan cimawk hi. Bank ah sum Transfer dingin apaipen Bus tungah asum koihna ip anusiakha ahihi.

Sumlom amukhia Bus Conductor Sumon Mathidol in Police te tungah agenna ah Bus khawlna Terminus atun uhciangin Bus sungteng siansuahding in inn aphiat laitak in amukhia cihi. Tua ciangin Depot Chief tungah sumlom kamu ci’n zasakpah a, sumneipa bangci kankhiatding cih kikumpah uhhi.

Tuazawh asawtlo in sumneipa pen Bus Depot ah akanding in hongpailian a, tuaciang in sumnei taktak ahihlam Bank Passbook tawh kiciantak in lakthei ahih manin, asumlom teng aneipa tungah apkikpah uhhi.

Depot Chief ii gennatawh kizui in sumneipa leh summunu anih un Police Station ah paikhawm uh a, Record bawlsak uhhi. Sumneipa pen lungdamlua in nektheih mohthoh 2 bekbekpia cilawmlawm hi.

More: Myanmar leh Thai gamsung ah vankham tampi ki haltum

Hih thuthang asimkha Netizens te’n Doctor papen cilna lawmlawm e cihpah ngeinai uhhi. Ahi zongin sum amukha numeinu in pahtawina adeihman in a apkik hilozaw in, thuman in agamta ahih manin Pasian in tuasangin atamzaw pahtawina piading hi. Sumdeihlua mahmahkhat hileh aneipa tungah apkiklo ngelngel dinghi. Zomi te thuman in gamtatding ki hanthawn denni. ZD Sawltak #zomidaily