Malaysia Subang Gas puakkham lakah ah Myanmar 6 kihel, mi 2 sikhin

Update: Malaysia Subang Gas puakkham lakah ah Myanmar 6 kihel, mi 2 sikhin

Malaysia, Subang Jaya vengsung ah nungkalsung in Gas puakkham a, mi 8 bang meikang in liamgawp uh cih kiza hi. OldTown White Coffee te ii neihsa anhuanbuk sungpanin Gas apuakkham hi a, tua aliamte lakah Myanmar gammi 6 tak nakihel khamawk uhhi.

Tua Myanmar aliam akanggawp mi 6 te lakah mi 2 pen huai luamahmah uh ahih manin tua liamma tawh hong nusiakhin uh cih Myanmar Social sisanhawm kipawlna panin kiza hi.

Tua asi nihte lakah khatpa pen amin Ko Khin Zaw kici a, Serdang Hospital panin September 27 ni in asi ahihi. Adang khatpa pen Ko Chain Ngein Lwin kici a, amahpen September 29 ni in asi cihi.

OldTown White Coffee Company te’n anasem te uh lunghimawh mahmah bilbel uh a, hongnusia Kawlgammi mi 2 ii innkuanpih tezong RM75,000 tuak piading uh cih kiza hi.

Asi te lakah Ko Khin Zaw ii aluanghawm pen Malaysia gamsung mahah kivuiding hi. Akhatzaw Ko Chain Ngein Lwin ahihleh Kawlgam aom innkuanpih tetawh aki kupkhop laitak hi a, Kawlgam puading maw, Malaysia ah vuiding cihpen kician nailo hi.

Subang Jaya vengsung Gas puakkham pen Oldtown Company te neihsa ci

Zanni Thursday in Malaysia, Subang Jaya vengsung ah Gas puakkham in mitampi liamgawp, meikanggawp uhhi. Tua Gas puakkhapna munpen Food Chain khat ii vankoihna Warehouse cihciang kigenkhia masa hi.

Tua Food Chain pen adang hilo in, OldTown White Coffee te’n zuakding in van akholna Warehouse khat ahihi. OldTown White Coffee pen Company lianpi khatmah hi a, Malaysia gamsung ah Restaurant Outlets akigawm in 200 valbang nei uhhi. Malaysia leh Indonesia gamsung ah Restaurant Outlets atampen inzong aki ciamteh ahihi.

Oldtown Bhd te’n hihvai tawh kisai agenkhiatna ah tuahsiatna pen Thursday zingsang 8am hunpawl in Jalan Subang 10, Subang Industrial Park ah apiang ahihi ci’n genkhia uhhi. Oldtown Company te neihsa ahi Emperor’s Kitchen Sdn Bhd’s (EK) kici Food Processing Unit khatah apuakkham cihi.

Hih Gas puahkhapna hangin OldTown White Coffee Outlets te ah zuakding nektheih akibawlna Production Floor bek sukha bilbel cihi. Tuatawh akizom in aomkhawm Operating Units, Administration Office te bangmah sukhalo cibilbel hi.

Fire Department, Police Department leh Oldtown Management te’n banghangin hihbang in Gas puakkham theihiam cihpen hoihtak kancianlai uh cihi.

Hih Gas puahkhapna hangin nasem te tampi liam in, zato tunlawh uhhi. Company panin zatui zaha akisam bangbangin Full Support kapiading uh cisam uhhi.

Video: Warehouse gas explosion injures eight

Aliam tepen Reports tuamtuam ah mi 7 acizong omin, mi 8 acizong om uhhi. Ahi zongin tuasung ah nasem aliam khempeuh pen Myanmar leh Nepal gammi vive cisawnsawn hi. Tulaitak avek un Serdang Hospital ah zato kilumsak cih kiza hi.

Hih tuahsiatna hangin Malaysia gamsung aom OldTown White Coffee outlet te ah nektheih lamsang “Food processing operation” kikhawlphot ahih manin, kitasam theiding cihi. Ahi zongin dawntheih lamsang ahi Coffee leh Beverage tepen bangmah tasapna omloding hi ci’n Oldtown te’n genkhia hi.

Related: Malaysia, Subang Jaya ah Gas puakkham in mi 8 nakliam mahmah, Myanmar kihel

Malaysia gamsung ah Oldtown Outlet tampi aom mahbangin, Outlet pawlkhat ah Myanmar te inntekthei zawzenta uhhi. Zomi pawlkhatzong Oldtown Outlet ah asem om uhhi. Ahi zongin zanni Subang Jaya vengsung Gas puahkhapna ah Zomi te kihelsamlo hileh kilawm hi. Sawltak #zomidaily