Spirit power leh Soul power kilamdan na thu tomno

Spirit power leh Soul power kilamdan na thu tomno

Spirit kici pen nam tampi pha hi. Lai hong let khia masa ten Kha ci uh hi. Spirit pen Mihing tung ah aom bang in Ganhing tung ah zong Spirit amah kom kom in kheltat nopna anei hi. Tua ahih man in upna pawl khat sung ah Spirit guak kigelh ngamlo in Holy cih amai kibeh lap a Holy spirit akici khasiangtho kici ahihi. Tua ahih man in mihing te in holy behlap in kha siangtho acih bang in ganhing sung om spirit zong khasiangtho mah asuak kik zel spirit ahihi.

Ataktak in spirit in mihing leh ganhing tung ah aom nuntakna nei khat ahih na kilang om hi a, Zo pau lian in gen ni ci leng, Gau,Kau,Liingpi ahihi. Hih Kammal te khangthak tee’n na thei het kei ding uh konglam en hi. Mikang pau ah Spirit lian bek pen zu akhauh mahmah mei bang in akuang thei zong Spirit ahihi.

Spirit pen atamzaw a nasep te in Dawi biak upna tawh akizom Guu leh Gau, Liing leh Kau cih nam te tawh a nungta kha gilo nam ahihi. Tua hi in Spirit in kisia sak, kipelh sak mite ading kimlai puuksak, tuuksak, amsak, Sinmawk/mawl, Lungmawk/mawl in koih theihna power nei hi. Tua hi a, Ngal Gam leh Hangsai te tangthu sung ah Dawikungpu tawh akidem hun in hidan spirit te power kinak zat mahmah ciang nei ahihi.

Soul leuleu ciang ei Pasian mi siangtho te upna sung ah aom ahi, Nuntakna asiangtho kha pumpi ahihi. Hih Soul pen mihing tung bek ah aom vantung pan in vanglian Pasian in hong koihsuk a siangtho kha tawh mihing nuntakna ahihi. Soul leh eite vanglian Pasian akizom tawn tung na sem khawm’ vantung mi, vantung galkap te zong akihel Soul ahihi.

Soul nasepna ah ahoih na lam vive tawh nuntakna hi a, Itna, Hehpihna,Cihtakna , Hanciamna, Alamdang nate bawlkhia’ theisak’ piang khia’ theisak, Mailam thu theikhol sak, Ciimna leh Pilna, Theih telna Siamna te a namkim te ahi’ nate piangkhia sak hi. Spirit in abawl theih natna namkim te Soul in Dam kiksak theihna vangliatna anei Soul ahi hi. Hih Soul tawh nuntakna anei mihing te in mailam saupi ading in muhkholh na, theih kholh na, leitung mihing te nuntakna, khuasakzia kipuah kikhel sak na apiang khia sak a, ngaihsun theih sakna anei Soul ahihi.

Spirit leh Soul anei tuak nuntakna te ah anih tuak in khua muhna, zakna neituak uh ahih hang in Spirit in mailam thu gelkholna na nei theilo spirit ahihi. Ganhing te en le hang avek in spirit nei uh hi a Pasian bawl bangbang nate tung kinga in nungta uh ahihi. Ahizong siatna bawl thei in puah kik theilo power anei hi. Soul ahih leh asiatna ding pan kidal kholhna, kigin kholhna ngaihsut siamna mihing tung ah akisam bang in kigin kholhna a neisak a siangtho kha nuntak na ahihi.

Tua ahih man in Pasian in eite hongbawl ciang in leivui tungman, nakguh bek tawh hong bawl hi lo a, a siangtho kha nuntakna tawh vantung pan in hong piansak ahihi. Ci le sa tawh a kikop khawm asiangtho kha nuntakna nei ihihi. Leitung ah upna namtampi te abulpi deih na telopi in ei bek upna tawh oneway in adang upna tel lo pi in mawk nialna in apau theilo, mit khua mulo, Lampai thei nailo, Abil vanglo uino suak tung tawh akibang mi tampi i om hi. Pasian minthang ta hen!

Hau Thang