Upna leh Kammal (1) ~ Rev. Fr. Damian Dal

Upna leh Kammal (1)

Laisiangtho sungah ‘Thu in mihing asuak hi,” (Jn 1:14) ci in, honghilh hi. Tua ‘Thu’ in Pasian ahihi (Jn Jn 1:1-3), naci lai hi. Hih Laisiangtho munte in eite banghong hilh hidinghiam cih tawm ihlungngai khawm dinghi.

Amasa in ‘Thu in Pasian ahihi,’ cihthu ih endinghi.
“Akipatcil in ‘Thu’ a om hi” (Jn 1:1) ci in, Laisiangtho sungah nakigelh hi. Nakhempeuhte in thu hangin pianghi naci lai hi( Jn 1:1ff). “Thu” hangin, apiang bang omhiam ci in, ih nisim nuntakna ih etciang, lamdang ihsakha dinghi. Ahi zongin, hoihphatak ih ngaihsutkik ciangin, ‘thu’ hangin nakhempeuh apian na ihmu taktak thei hi.’Thu’ cih kammal sungah, namnih kikhen thei hi: i) Pasian’ Thu leh ii) Mihing’ thu cih ahihi. Lamkhat pan in genleng, Pasian Kammal (Dei Verbum), leh mihing kammal (the word of human) cih ahihi.

Misiangtho Paul agen na-ah: Topa’ thu, Topa’ kammal in kilemna, kipawlkhawm theihna, kilawm taakna leh khat le khat mawh kimaisak natawh pumkhat suakna sungah hong tunpih hi (Cf. 2Cor 5:18-20) na ci hi. Pasian ii ‘Thu’ or Pasian’ Kammal (Dei Verbum) ahi Topa Jesu mihing hongsuahna tawh, Pasian kiangpan kilemna, Pasian tawh kipawl kiktheihna ding thupha, Pasian leh mawhnei mite kilawmtaak theihna ding thupha bekthamlo in, Pasian in eite mawhna hongmai sakna tawh amahtawh pumkhat hongsuak sakkikna ahi gupkhiatna thu hongpuak in, amahmah Gupkhiatna apia pa, Gumpa hongsuak hi.

Mihing’ thu ahihkei leh mihing kammal ahih leh Pasian thu tungah kinga in, Pasian thu sungah zungkha in, Pasian thu ahi Jesu Topa tungah akilamh kammal leh thu (Cf. Col 2:6-7) ahih kei leh; kitelkhialhna, kitotna, kilemlohna, kikhenna cih siatna te nisim naisim in piangsak hi. Tua ahih manin, mihingte kammal, mihingte deihbawl thu hangin, innkuan sung, u le nau sung, khua le tui, minam khat le khat, gam khat le gamkhat kitawngin, kisatin, kikhen in, kido in nisim naisim in eimau muntek leh eimau dinmun tawh kituak in, mihing thu leh mihing kammal pan hongpai siatna te, pua lah liangin, sila bangin ih omhi.

Pasian thuleh Pasian kammal in suahtakna hi in, mihing thu leh mihing kammal in sila hongsuaksak hi. Pasian kammal leh Pasian thu in minam gamgi, beh le phung gamgi cihte satpai in, Pasian minam khat hongsuak sak hi napi in, mihing thu le mihing kammal in, nupa kal nangawn ah gamgi phutin, u le nau sungsuak khat te kikal ah gamgi phut in, khua khat le khat kikal ah gamgi phut ahih manin, tua gamgi akantan zolo, tua gamgi aphulkhia zolo mitampi te in, tua gamgi ah sihna, natna, khasiat lunglen na, bawlsiatna, etneuna, mudahna leh simmawh na thuakin om uhhi. Tua mite sungah ahehpih huai penpen mite in, nu le pa sungthu athei lo, u le nau sungthu athei lo, lungsim siangtho naupangte ahi uhhi (Gentehna nu le pa hong kikhen ciang).

Nisim in ihzakthu, ihmuh thu, ihsim thu, ihgen thu te in, ihnuntakna sungah natampi hongsem den in, tua thu in thutampi piangsak hi. Ihzak thu in eite nuntakna sung leh, nuntakna tungah vanglian nasem pa ahih lam telhuai mahmah hi. Ihzak thuin, hongkhasia sak in, hongdahsak, hongnuamsak, hong lungdamsak, hongthapia leh honglapsang mahbangin, ih genthu in zong mite tungah tua mahbang thute piangsak ahihlam aphawkhuai mahmah thu ahihi. Tua ahih manin, ‘Thu’ in ihnuntak na khempeuh honguk ahihi. Ihzakthu, ih muh thu, ihsim thu in Pasian thu le Pasian kammal ahih zawhden ding leh, tua Pasian thutawh akituak kammal le thuhoih thupha te ahihden theihding nakpi tak in thupi hi.

Pasian a umtaktak mite in agen thu le angaihsut nate uhah, upna ki uksak uha, midangte in ahih leh, pilna, theihna leh ngaihsutna te masuan in upna leh uk uhhi. St Anselm, a great theologian, in agen na-ah, upna in theihna leh telna lamah hongpai pih ding hizaw hi, naci hi. Upna in ihgen thu, ihzakthu, ihmuhthu, ihsim thu ihtuak thu te tungah ukzawh na vangliatna anei ding ahihi. Tua hi leh, ih up Pasian thu eite sungah nungta takpi in, eite mahmah in, thu in mihing asuak hi acih, Pasian kammal leh Pasian thu leitungah anungtasak mihing te ihhi taktak dinghi.

Rev. Fr. Damian Dal