South Korean te’n lungphona nei in President aki tawpsakding ngen uh

South Korean te’n lungphona nei in President aki tawpsakding ngen uh

Oct. 30, 2016: South Korea uliante gamtatsiatna/a thanghuai a gamtatna (scandals) lai poimawh thusim a kipholak khiatna hangin zan in President Park Guen-hye in a senior secretary 10 tawpsak hi. Hih a tanghanghuai a gamtatna hangin South Korea mipi tul tampi ten zan in S.Korea khuapi Seoul ah lungphona nei in, President Park a kitawpna dingin ngetna nei uh hi.

President Park in a senior secretary sawm a tawpsak hangin a lawm hoih mahmah gamvai a kigolh den biakna makai tanu khat tawpsak lo se hi. Lungphona nei ten, “Kua in president zaa len lian hiam?” “Park Geun-hye kitawp in,” ci-in awng ngeingai uh a, lungphona nei ten City Hall ah candle light vigil a nei khit un downtown Seoul ah lungphona nei uh hi. Police ten kumpi deih lo-a lungphona nei pen mi 9,000 hi ding a, a beisa kha panin kumpi deih lo-a lungphona neihna lak panin a tam penna hi lai hi ci uh hi.

“Park in president dingin a thuneihna khahsuah ta a, gam a uk theihna dingin citna nei lo hi,” ci-in Soengam khuapite mayor leh opposition Minjoo Party member Jae-myung Lee in lungphona neite kiangah gen hi. Park in Pithai ni (Tuesday) in a thugen ding a lawm hoih Choi Soon-sil a puahphat/etdik (edit) sak manin president zum leh cabinet a zaa lente a laihna (reshuffles) dingin phutna lianpi tuak hi. TV panin maisakna a nget hangin gam vai tawh kisai leh ama deihna bek tawh vaihawm hi ci-in gensiatna tampi tuak hi.

Upadi banga nasemmi (Prosecutors) ten Choi Soon-sil’ naseppihte tampi thusitna nei in a, a innte uh-ah thukanna neihna dingin va buluh sak uh a, Choi’ nonprofit foundations (NGO) a neih zum nih zong buluh sak uh hi. Choi in non-profits foundation a bawlna ding a thanghuai a gamtatna leh golhguk la in hun tomno sungin corporate-te (companies) tung panin huhna sum $70m val ngah hi.

Choi’ sitni ( lawyer) Lee Gyeong-jae in tu-in Choi Germany gamah om a, upadi banga nasemmi ten thusit dingin a sap uh leh South Korea ah hong ciah kik ding hi ci-in gen hi. Nung kal in South Korean newspaper ten Choi a interview na uh-ah Choi in presidential documents ka ma ngah khol ngei a, ahih hangin gamvai ah kigolh loin ka NGO adingin company ten sum hong piakna dingun ka nawh/vau ngei kei hi ci hi.

Choi’ pa pen Buddhist siampi (monk), biakna/upna tawh kisai a zek (cult) makai leh Christian pastor a sem ngei phamsa Choi Tae-min’ tanu hi a, Choi pen Park tawh 1970s kim panin na kilawmta uh a, Choi Tae-min pen Park’ thudot theihmi (mentor) ahi hi. South Korea gamah kiteelna kum kik ciangin om ding a, Park pen kumpi dingin a deih lo mi tam mahmah ta hi. -Associated Press/ Thang Khan Lian